19 ادامعا ارنالعان اۋە كەمەسىن قىتايدىڭ مەملەكەتتىك COMAC اۆياتسيالىق كورپوراتسياسى ازىرلەپ جاتىر. جاڭا ۇشاقتىڭ باستى ەرەكشەلىگى - ءداستۇرلى قوزعالتقىشتاردىڭ ورنىنا ەلەكتر جۇيەسىن پايدالانۋى.
شەتەلدىك The War Zone باسىلىمىنىڭ مالىمەتىنشە، الەۋمەتتىك جەلىدە تاراعان سۋرەتتەردەن CE-25A ۇشاعىنىڭ تولىق كولەمدەگى ۇلگىسىن كورۋگە بولادى. اۋە كەمەسى قىزىل جانە قارا تۇسكە بويالعان، ال كورپۋسىنىڭ بويىمەن كۇمىس ءتۇستى جولاق جۇرگىزىلگەن. سونداي-اق ۇشاقتا COMAC جانە CE-25A جازۋلارى مەن B-0EFH تىركەۋ ءنومىرى بار.
سۋرەتتەردى العاشقىلاردىڭ ءبىرى بولىپ قىتايلىق اۆتوبلوگەر حان لۋ جاريالاعان بولۋى مۇمكىن. دەگەنمەن ولاردىڭ شىنايىلىعى ازىرگە رەسمي تۇردە راستالعان جوق. فوتوسۋرەتتەردى بىرنەشە جاساندى ينتەللەكت مودەلى ارقىلى تەكسەرۋ بارىسىندا قولدان جاسالعانىن كورسەتەتىن ايقىن بەلگىلەر انىقتالماعان.
ەلەكتر ۇشاعىنىڭ مۇمكىندىگى قانداي؟
COMAC كومپانياسى CE-25A جوباسىن العاش رەت 2023-جىلدىڭ قاراشاسىندا شاڭحايدا وتكەن قىتاي حالىقارالىق يمپورت كورمەسىندە تانىستىرعان.
ۇشاق قىسقا جانە ورتاشا قاشىقتىققا جولاۋشى تاسىمالداۋعا، سونداي-اق ىسكەرلىك ساپارلارعا ارنالعان. جاريالانعان تەحنيكالىق سيپاتتامالارعا سايكەس، ۇشاقتىڭ جىلدامدىعى ساعاتىنا شامامەن 400 شاقىرىمعا جەتەدى. ال ۇشۋ قاشىقتىعى 400-500 شاقىرىم بولادى دەپ جوسپارلانىپ وتىر.
CE-25A ۇشاعىندا كادىمگى تۋربوۆينتتى قوزعالتقىشتاردىڭ ورنىنا قاناتتارىنا ورناتىلعان 10 ەلەكتر جەلدەتكىشى قولدانىلادى. ولاردىڭ ءارقايسىسى ارنايى ساقينا ءتارىزدى ارنانىڭ ىشىندە ورنالاسقان.
مۇنداي جۇيە ۇشاقتىڭ اەروديناميكالىق مۇمكىندىكتەرىن جاقسارتىپ، بەلگىلى ءبىر ۇشۋ جاعدايلارىندا ەنەرگيانى ءتيىمدى پايدالانۋعا كومەكتەسۋى مۇمكىن. سونىمەن قاتار ەلەكتر قوزعالتقىشتارىنىڭ قۇرىلىسى ءداستۇرلى اۆياتسيالىق قوزعالتقىشتارعا قاراعاندا قاراپايىم بولۋى ىقتيمال.
جوبا قاشان ىسكە قوسىلادى؟
ازىرگە CE-25A ۇشاعىنىڭ العاشقى سىناق ۇشۋىن جاساعانى تۋرالى رەسمي اقپارات جوق. جاريالانعان سۋرەتتەردەگى اۋە كەمەسىنىڭ ناقتى قانداي ماقساتتا پايدالانىلاتىنى دا بەلگىسىز.
ماماندار ەلەكتر اۆياتسياسىن دامىتۋدا ءبىرقاتار تەحنيكالىق قيىندىق بار ەكەنىن اتاپ وتەدى. سونىڭ ەڭ باستىسى - اككۋمۋلياتورلاردىڭ قۋات سىيىمدىلىعى. قازىرگى باتارەيالار اۆياتسيالىق وتىنمەن سالىستىرعاندا الدەقايدا از ەنەرگيا ساقتايدى. بۇل ۇشاقتىڭ قانشا قاشىقتىققا ۇشا الاتىنىنا، جۇك كوتەرۋ مۇمكىندىگىنە جانە اۋەدە بولۋ ۋاقىتىنا اسەر ەتەدى.
بۇدان بولەك، قۋاتتى ەلەكتر جۇيەلەرىن سالقىنداتۋ، بىرنەشە قوزعالتقىشتىڭ ءبىر مەزگىلدە تۇراقتى جۇمىس ىستەۋىن قامتاماسىز ەتۋ جانە ولارعا تەحنيكالىق قىزمەت كورسەتۋ ماسەلەلەرى دە شەشىلۋى ءتيىس.
سوعان قاراماستان، CE-25A جوباسى قىتايدىڭ ەلەكتر اۆياتسياسىنا قىزىعۋشىلىعى ارتىپ كەلە جاتقانىن كورسەتەدى. ۇشاق جاپپاي وندىرىسكە شىقپاعان كۇننىڭ وزىندە، ونى ازىرلەۋ بارىسىندا جيناقتالعان تاجىريبە بولاشاقتاعى ازاماتتىق جانە اسكەري اۆياتسيا جوبالارىنا پايدالانىلۋى مۇمكىن.