تسي گۋانپۋ قازاقستاندىق سپورتشىلاردىڭ چەمپيون بولعانىنا قۋانىشتى ەكەنىن جەتكىزدى.
- ءبىز قازاقستاندىق سپورتشىلاردىڭ جەڭىسكە دەگەن تالپىنىسىنىڭ كۋاسى بولدىق. بۇگىن، ولاردىڭ قانشاما جىلدان بەرى توككەن تەرىنىڭ اقتالعانىنا شىن جۇرەكتەن قۋانىشتىمىز. سىزدەردى وسى جەڭىستەرىڭىزبەن قۇتتىقتاعىمىز كەلەدى، - دەدى قىتايلىق سپورتشى.
ايتا كەتەرلىگى، ماراپاتتاۋ ءراسىمى كەزىندە، كۇمىس جانە قولا مەدال ەنشىلەگەن قىتايلىق سپورتشىلار قازاقستاندىق چەمپيوندارعا ايرىقشا قۇرمەت كورسەتتى.
- ولاردىڭ مىقتىلىعى ءبىزدىڭ قۇرمەتىمىزگە لايىق بولدى. مىنبەردە تۇرعانىمىزدا، ەكى شەتتە قىتايلىق سپورتشىلار، ال ورتادا قازاقستاندىق سپورتشىلار ەكەنىن بايقادىق. سول سەبەپتى، دوستارىمىزدى ەرەكشە تاسىلمەن قۇتتىقتاپ، قۇرمەتىمىزدى كورسەتكىمىز كەلدى، - دەدى تسي گۋانپۋ.
ونىڭ ايتۋىنشا، سپورتشىلار جارىس الاڭىندا قارسىلاس بولعانىمەن، ومىردە ءبىر-بىرىمەن دوس.
- ءبىز كوپتەگەن جىل بويى جارىس جولىندا قارسىلاس بولعانىمىزبەن، ومىردە دوسپىز دەپ ويلايمىن. مەن وسى كورسەتكەن قۇرمەتىمىز ارامىزداعى دوستىقتى نىعايتۋعا، بىرگە وسى سپورتتى دامىتۋعا ءوز ۇلەسىن قوسادى دەپ سەنەمىن، - دەدى قىتايلىق سپورتشى.
ەسكە سالايىق، قازاقستاندىق سپورتشىلار شەرزود حاشيربايەۆ جانە رومان يۆانوۆ فريستايل-اكروباتيكادان ەرلەر اراسىندا سينحروندى سەكىرۋ سىنىندا 97.92 ۇپاي جيناپ، ەل قورجىنىنا ەكىنشى التىن مەدال سىيلادى.
قازىرگى ۋاقىتتا، قازاقستان قۇراماسىنىڭ مەدالدار سانى 13 كە جەتتى.
اۆتور مۇحتار قاليموللا ۇلى