قىتايلىق قازاق شەبەرىنىڭ 1 مينۋتتا سالعان ويۋى كوپشىلىكتى تاڭعالدىردى
استانا. KAZINFORM - وسى اپتادا قىتايدىڭ الەۋمەتتىك جەلىسىندە ايەل ادامنىڭ ءبىر مينۋتقا جەتپەيتىن ۋاقىتتا قازاقى ويۋ سىزعان ۆيدەوسى تارادى. بۇل ۆيدەوداعى سىزۋشى قىتايلىق بەلگىلى تىگىنشى، ديزاينەر جەڭىسگۇل نۇرداناقىن قىزى.
ۆيدەودان سىزۋشىنىڭ ساناۋلى سەكۋندتىڭ ىشىندە كولەمدى ويۋدى سالىپ شىققان شەبەرلىگىن بايقاۋعا بولادى.
ونىڭ ويۋدى سىزعان جىلدامدىعى مەن شەبەرلىگى كوپشىلىكتىڭ تاڭدانىسىن تۋدىرعان.
جەلى قولدانۋشىلارى «قازاقتىڭ كەستەلەۋ ونەرىندەگى تۇڭعىش تۇلعا»، «كەسكىندەمە سونشالىقتى كەزدەيسوق، ناتيجە وتە كەرەمەت»، «تەحنيكاسى قانداي كەرەمەت»، «نەدەگەن شەبەرلىك» دەگەن سەكىلدى پىكىرلەر قالدىرعان.
ايتا كەتەيىك، جەڭىسگۇل نۇرداناقىن قىزى شىڭجاڭ قازاقتارىنىڭ اراسىنان شىققان بەلگىلى تىگىنشى، ديزاينەر، قازاقتىڭ ۇلتتىق كيىمدەرىن تىگۋگە ۇيرەتەتىن ونەر مەكتەبىنىڭ ديرەكتورى، «تاسبۇلاق» شەبەرحاناسىنىڭ جەتەكشىسى.
شىڭجاڭدا تۇراتىن ءتۇرلى ۇلتتاردىڭ مەملەكەتتىك دارەجەدە مويىندالعان ماتەريالدىق ەمەس مۇرالارىن دارىپتەپ، جالعاستىرۋشى وكىلدەرىنىڭ اراسىندا قازاقتىڭ ۇلتتىق كيىمىن ناسيحاتتاۋشى مۇراگەر جەڭىسگۇل نۇرداناقىن قىزىنىڭ دا اتى دا بار.
ونىڭ ونىمدەرى تەك قىتايدا ەمەس، موڭعوليا، قازاقستان، تۇركياعا دا جىبەرىلەدى.
بۇدان بولەك، ءدال وسى ورتالىقتا دايىندالاتىن كيىم-كەشەكتەر مەن كيىز ۇيلەرگە مۇراجايلار تاراپىنان تاپسىرىس جوعارى.
«جەڭىسگۇل نۇرداناقىن - ۇلتتىق دەڭگەيدەگى ماتەريالدىق ەمەس مادەني مۇرا قازاقى كيىمدەرىنىڭ مۇراگەرى. ول ىلەدە تۇرادى، ونىڭ وتباسى ءۇش ۇرپاق بويى تىگىنشىلىكپەن اينالىسىپ كەلەدى. ول بالا كەزىنەن باستاپ اناسىنان كيىم تىگۋدى ۇيرەنگەن، ەسەيە كەلە ءوزىن قازاق حالىق مادەنيەتىن بەينەلەيتىن كيىمدەر مەن كيىز ۇيلەردى زەرتتەۋگە، وندىرۋگە جانە دامىتۋعا ارنادى. بۇل كاسىپپەن اينالىسقانىنا 20 جىلدان استى» دەپ جازادى قىتايلىق ب ا ق.
People.cn دەرەگىنشە، قازاقتىڭ ۇلتتىق كيىمدەرىنىڭ ەرەكشەلىكتەرىن زەرتتەۋ ءۇشىن جەڭىسگۇل اۋىلدىق جەرلەردى جانە جايلاۋلاردى ارالاپ، قازاق اقساقالدارىنىڭ ۇيىنە بارىپ، قازاق كوستيۋمىنىڭ مادەنيەتىنە بايلانىستى زاتتار مەن كىتاپتار جيناعان.
ءارتۇرلى جەرلەردە، ءارتۇرلى رۋلاردا كيىمدەردىڭ توقۋ ادىستەرى ۇقسامايدى. جەڭىسگۇل ۇلكەندەردەن كەڭەس سۇراپ، كەيدە ۇلگىلەردى سۋرەتكە ءتۇسىرىپ، كوپ ىزدەنگەن.
ول ىلە ايماعى قۇلجا قالاسىندا «تاسبۇلاق» ۇلتتىق كيىم كومپانياسىن قۇرىپ، ءداستۇرلى قازاق كيىمىن دامىتۋ جولىن كەڭەيتىپ قانا قويماي، سونداي-اق ەگىنشىلەر مەن مالشىلاردى جۇمىسپەن قامتىپ، تابىس ماسەلەسىن دە شەشكەن.
اۆتور بەيسەن سۇلتان