قىتايلىق ەكى دۇركىن وليمپيادا چەمپيونى ءتورت جىلعا جارىستاردان شەتتەتىلدى

استانا. KAZINFORM - قىتايلىق اۋىر اتلەت ليۋي سياوتسزيۋن دوپينگكە قارسى ەرەجەلەردى بۇزعانى ءۇشىن ءتورت جىلعا جارىستاردان شەتتەتىلدى. بۇل تۋرالى سپورتتىق تورەلىك سوتىنىڭ (CAS) رەسمي سايتىندا جاريالانعان حابارلامادا ايتىلعان.

2022-جىلدىڭ جەلتوقسان ايىندا ليۋي سياوتسزيۋن دوپينگ قولداندى دەگەن كۇدىكپەن ۋاقىتشا جارىستاردان شەتتەتىلگەن ەدى. سپورتشىدان جارىستان تىس ۋاقىتتا الىنعان سىنامادان پەپتيدتىك گورمون - ەريتروپوەتين (ە پ و) تابىلعان. شەتتەتۋ مەرزىمى 2022-جىلدىڭ 30-قازانىنان باستالدى. زىلتەمىرشىنىڭ 30-قازاننان 2022-جىلدىڭ 20-جەلتوقسانىنا دەيىنگى كورسەتكىشتەرى جويىلدى.

2023-جىلدىڭ 2-ساۋىرىندە بەينەكونفەرەنسيا رەجيمىندە تىڭداۋ ءوتتى. بۇل ءىستى قاراعان جالعىز تورەشى سپورتشىنىڭ دوپينگكە قارسى ەرەجەلەردى بۇزعانىن انىقتادى. ليۋي سياوتسزيۋن وزىنە تاعىلعان ايىپتىڭ ءبارى قيسىنسىز ەكەنىن العا تارتقانىمەن، شەتتەتۋ مەرزىمىن قىسقارتاتىنداي ەشبىر ءۋاج كەلتىرگەن جوق.

«تورەشى ءىستىڭ CAS- قا جىبەرىلۋى سپورتشىعا قاتىسى جوق سەبەپتەرمەن كەشىكتىرىلگەنىن مويىنداپ، شەتتەتۋ مەرزىمىن 2022-جىلدىڭ 30-قازانىنان، ياعني سىناما الىنعان كۇننەن باستاۋ تۋرالى شەشىم قابىلدادى. 2022-جىلدىڭ 30-قازانى مەن 20-جەلتوقسانى ارالىعىنداعى ونىڭ بارلىق ناتيجەسىنىڭ كۇشى جويىلدى»، - دەلىنگەن CAS حابارلاماسىندا.

ليۋي سياوتسزيۋن - وليمپيادا ويىندارىنىڭ ەكى دۇركىن چەمپيونى (2012، 2020)، بەس دۇركىن الەم چەمپيونى.