قىتايلىق كومپانيالار جامبىل وبلىسىنا ەرەكشە قىزىعۋشىلىق تانىتىپ وتىر
الداعى ۋاقىتتا وڭىردە ءىرى جوبالار جۇزەگە اسىرىلادى. جۋىردا جامبىل وبلىسىنىڭ اكىمى ەربول قاراشوكەيەۆ باستاعان وبلىس دەلەگاتسياسى قىتاي حالىق رەسپۋبليكاسىنا جۇمىس ساپارىمەن بارىپ قايتتى. وبلىس اكىمدىگىنىڭ رەسمي سايتىندا جاريالانعان اقپاراتتارعا سۇيەنسەك، ايماق باسشىسىنىڭ قىتايعا ساپارى وتە ءساتتى بولعان سىڭايلى، دەپ حابارلايدى Inbusiness.kz سايتى.
جالپى ەربول شىراقپاي ۇلى اكىمدىكتە وتكەن جيىنداردا، ايماقتارعا جاساعان جۇمىس ساپارلارى كەزىندە اۋدان اكىمدەرىنە، ءتيىستى باسقارما باسشىلارىنا ينۆەستيسيا تارتۋعا ايرىقشا نازار اۋدارۋدى ۇنەمى ايتىپ كەلەدى. ءتىپتى ءبىر جيىندا ينۆەستيسيا تارتۋعا ات ءۇستى قاراعانداردىڭ قىزمەتىمەن قوش ايتىساتىنىن قاداپ-قاداپ جەتكىزگەن بولاتىن.
ارينە، ايماق باسشىسىنىڭ تالابى وتە ورىندى. سەبەبى ينۆەستيسيا تارتۋ وبلىس ەكونوميكاسىن دامىتۋدىڭ نەگىزگى كەپىلى دەسەك تە بولادى. ينۆەستيسيا مەيلىنشە كوبىرەك تارتىلعان سايىن وبلىس ەكونوميكاسى وركەندەپ، حالىقتىڭ تابىسى ارتىپ، تۇرمىسى جاقسارا تۇسەدى.
وبلىس اكىمىنىڭ قىتايعا ساپارى كەزىندە دە بىرلەسكەن جاڭا ينۆەستيسيالىق جوبالاردى ىسكە اسىرۋعا باسىمدىق بەرىلىپتى.
ە. قاراشوكەيەۆ جۇمىس ساپارى بارىسىندا وبلىستىڭ ءىرى كاسىپورىندارىنىڭ باسشىلارىمەن بىرگە قىتاي حالىق رەسپۋبليكاسىنىڭ شاندۇڭ، حۋبەي جانە شينجاڭ پروۆينتسيالارىنداعى بيزنەس توپتارىنىڭ جانە جەتەكشى كومپانيالاردىڭ وكىلدەرىمەن 200 دەن اسا ىسكەرلىك كەزدەسۋ وتكىزگەن. كەلىسسوزدەر ناتيجەسىندە تاراپتار ۇزاقمەرزىمدى ءوزارا ءتيىمدى ارىپتەستىك قاتىناستاردى ارتتىرۋعا جانە جاڭا جوبالاردى ىسكە اسىرۋعا قىزىعۋشىلىق بىلدىرگەن.
اتاپ وتەر بولساق، شاندۋن پروۆينتسياسىنىڭ بىرنەشە كومپانيالارىمەن بىرگە جاڭارتىلاتىن ەنەرگيا كوزدەرى نىساندارىن سالۋ، مال ازىعىن ءوندىرۋ مەن اۋىلشارۋاشىلىعى تەحنيكالارىن شىعارۋ بويىنشا جوبالاردى ىسكە قوسۋ مۇمكىندىگى قاراستىرىلۋدا. بۇدان بولەك، بايزاق اۋدانىندا تراكتورلار قۇراستىرۋ ءىسى جوسپارلانىپ وتىر. ال فوسفور وندىرىسىندە كوشباسشى سانالاتىن حۋبەي پروۆينتسياسىنداعى كەلىسسوزدەر بارىسىندا «قازفوسفات» سەرىكتەستىگى مەن قىتايلىق «Wuhan Top Resources Holdings Co. Ltd» كومپانياسىنىڭ اراسىندا ىنتىماقتاستىق تۋرالى كەلىسىمگە قول قويىلدعان قازىرگى ۋاقىتتا اتالعان كومپانيامەن ەلەكتروموبيلدەرگە ارنالعان ليتي- تەمىر- فوسفات اككۋمۋلياتورلارىن ءوندىرۋ، «جاڭا جامبىل فوسفور» زاۋىتىندا وندىرىلەتىن سارى فوسفوردى قىتايعا ەكسپورتتاۋ جانە سارى فوسفور مەن قۇرامىندا فوسفور بار ءونىم وندىرەتىن جاڭا كەشەن سالۋ ماسەلەلەرى تالقىلانۋدا.
سونداي-اق قىتايلىق «BNK Group» جانە «NINGBO MENGKWA MACHINERY CO. ,LTD» كومپانيالارىمەن كەلىسىم بارىسىندا 2024 -جىلدىڭ سوڭىنا دەيىن جالپى قۇنى 4,4 ميلليون ا ق ش دوللارىن قۇرايتىن تامشىلاتىپ سۋارۋ جۇيەلەرى مەن پوليەتيلەن قۇبىرلارىن شىعاراتىن زاۋىت سالۋ جوسپارلانۋدا.
ال بوروتالا موڭعول اۆتونوميالىق وكرۋگىندەگى ساپار قورىتىندىسى بويىنشا سۋمەن جابدىقتاۋ، كارىز جانە سۋارۋ جۇيەسىنە ارنالعان ءتۇرلى ديامەترلى قۇبىرلاردى ءوندىرۋ ءىسىن دامىتۋ جوسپارى قارالعان.
ياعني الداعى ۋاقىتتا وبلىستا جاڭا ءوندىرىس ورىندارى بوي كوتەرىپ، سان سالانىڭ دامۋىنا تىڭ سەرپىن بەرەدى دەپ كۇتىلۋدە. ە. قاراشوكەيەۆتىڭ قىتايعا ساپارىنىڭ قانشالىقتى قايىرلى بولاتىنىن الداعى جىلدارى كورەتىن بولامىز.