قىتايلىق كومپانيا شىمكەنتتە كولىك زاۋىتىن سالۋعا نيەتتى

شىمكەنت. KAZINFORM - قىتايلىق «Shaanxi Jingzhao carSpan» كومپانياسى شىمكەنتتە كولىك زاۋىتىن سالۋعا نيەت ءبىلدىرىپ وتىر. بۇل تۋرالى قالا اكىمىنىڭ ورىنباسارى ايدىن كارىموۆ شىمكەنت قالاسى دەلەگاتسياسىنىڭ قىتاي حالىق رەسپۋبليكاسىنىڭ شيان جانە ءۇرىمجى قالالارىنا جاساعان ساپارى قورىتىندىسىنا ارنالعان باسپا ءسوز كونفەرەنسياسىندا ايتتى.

24-26-ماۋسىم ارالىعىندا شىمكەنت پەن شيان قالالارى اراسىنداعى باۋىرلاس قارىم-قاتىناس ورناتۋدىڭ ءبىر جىلدىق مەرەيتويىنا بايلانىستى قازاقستاننىڭ شيان قالاسىنداعى باس كونسۋلدىعىنىڭ قولداۋىمەن شىمكەنت قالاسىنىڭ اكىمى باستاعان رەسمي جانە ىسكەر دەلەگاتسياسىنىڭ ەكى كۇندىك ءىس-ساپارى ءوتتى. دەلەگاتسيا مۇشەلەرى شيانداعى العاشقى ۇلتتىق تاعامدار جوباسى «جەتى تاندىر» مەيرامحاناسىنىڭ ىرگەتاسىن قالاۋ راسىمىنە قاتىستى. نىسان 2 ايدا ىسكە قوسىلادى دەگەن جوسپار بار. كەيىن شىمكەنت پەن شيان قالالارى كاسىپكەرلەرىنىڭ ساۋدا-ەكونوميكالىق فورۋمى ءوتتى. وندا قىتايلىق جەرگىلىكتى 30 دان استام جانە قازاقستاندىق 20 دان استام كاسىپكەر اراسىندا دەنساۋلىق ساقتاۋ، IT، مەتاللۋرگيا، قوعامدىق تاماقتانۋ، ءبىلىم، اۋىل شارۋاشىلىعى، ەلەكتر جابدىقتارىنىڭ جانە قۇرىلىس ماتەريالدارىنىڭ ءوندىرىسى سياقتى سالالارعا قاتىستى كەزدەسۋ وتكىزىلدى.

سونداي-اق فورۋم اياسىندا شىمكەنت ونىمدەرىن قىتاي تۇتىنۋشىلارىمەن كەڭ كولەمدە تانىستىرۋ ءۇشىن ۇلكەن جارمەڭكە ۇيىمداستىرىلدى. وندا شىمكەنتتە شىعارىلاتىن ونىمدەر ۇسىنىلدى. ودان بولەك شىمكەنت اكىمى قىتايدىڭ 6 ءىرى كومپانياسى وكىلدەرىمەن كەزدەسۋ وتكىزدى. ولاردىڭ العاشقىسى - «Jiangsu Xiandai Lighting Group Co., Ltd» كومپانياسى.

بۇل كاسىپورىنمەن جارىقديودتى كوشە لاندشافت شامدارى، كوشە شامدارىنىڭ تۇرلەرى، سيگنالدىق بايلانىس پەن ەلەكتر تىرەكتەرى، باقىلاۋ تىرەكتەرى، جول قاۋىپسىزدىگى قۇرالدارى جانە ەلەكترومەحانيكالىق جابدىق، كوپ فۋنكتسيالى كوشە شامدارى، قالالىق كەشەندى جابدىق، كۇن فوتوەلەكترلىك پانەلدەرى ءوندىرىسى بويىنشا جوبانى تالقىلادى.

«ەكىنشى كومپانيا - Shaanxi Jingzhao carSpan. اۆتوموبيل وندىرىسىنەن باستاپ، وعان سەرۆيستىك قىزمەت كورسەتۋگە دەيىنگى تولىق تسيكلدى اۆتوموبيل قۇراستىرۋ زاۋىتىن قۇرۋ جوباسى تالقىلاندى. قىتايلىق بۇل كومپانياعا قازاقستان - ۇلكەن نارىق. قىزىعۋشىلىق تانىتىپ وتىر. ەندى سوزدەرىنە قاراعاندا ناقتى ىسكە كوشەتىن ويى بار. سوندىقتان قالا اكىمى ولاردى شىمكەنتكە كەلىپ، وندىرىستىك الاڭدارىمەن، باسقا دا جالپى قالانىڭ تىنىس-تىرشىلىگىمەن تانىسۋ ءۇشىن ارنايى شاقىردى. جاقىن ارادا كەلۋىن كۇتەمىز. كەلىسسوزدەر ودان ءارى جالعاسادى. وزدەرىڭىز بىلەسىزدەر، قازىر قالامىزدا، جالپى ەلىمىزدە قىتاي اۆتوموبيلدەرى، ونىڭ ىشىندە ەلەكترواۆتوموبيلدەر كەڭىنەن دامىپ كەلەدى. سوندىقتان سەرۆيستەن باستاپ ونى جيناقتاۋ زاۋىتى بۇگىنگى كۇندە وتە وزەكتى»، - دەدى شىمكەنت اكىمىنىڭ ورىنباسارى.

سونىمەن قاتار قازاقستان مەن قىتاي كاسىپورىندارى اراسىنداعى ىنتىماقتاستىق پەن الماسۋعا ىقپال ەتەتىن ۇيىم بولىپ سانالاتىن «قازاقستان - قىتاي كاسىپورىندار اليانسىمەن» ىنتىماقتاستىق پلاتفورماسىن قۇرۋ، ىسكەرلىك ساپارلاردى ۇيىمداستىرۋ جانە ساۋدا - ەكونوميكالىق فورۋمدار وتكىزۋ ارقىلى ەكى ەل ەكونوميكاسىنىڭ وركەندەۋى مەن دامۋ ماسەلەلەرى تالقىلاندى. ال «Xian Typical Elevator Co., Ltd.» كومپانياسىمەن ليفت ءوندىرىسى بويىنشا زاۋىت سالۋ جوباسى، «Shaanxi Foreign Trade Import and export Group Co., Ltd.» كومپانياسىمەن كوتەرمە ساۋدانى، تەحنولوگيالار مەن ازىق-تۇلىك يمپورتىن جانە ەكسپورتىن، قويما، كولىك قىزمەتتەرىن، جەتكىزۋ تىزبەگىن باسقارۋ قىزمەتتەرىن، حالىقارالىق كونتەينەرلىك تاسىمالداردى ەكسپەديتسيالاۋ بويىنشا ەكىجاقتى ىنتىماقتاستىق مۇمكىندىكتەرى ايتىلدى.

«China Communications Construction Company Limited (CCCC) Tianjin Dredging Co., Ltd.» كومپانياسىمەن پورتتار مەن سۋ جولدارىن تەرەڭدەتۋ، جەردى مەليوراتسيالاۋ، گيدروتەحنيكالىق قۇرىلىستار مەن ىرگەتاستاردى جوبالاۋ، ىزدەستىرۋ، جوبالاۋ، كەڭەس بەرۋ جانە ەكولوگيالىق تەرەڭدەتۋ، سونداي-اق جابدىقتار وندىرىسىنە، ينۆەستيتسيالارعا، جىلجىمايتىن مۇلىكتى دامىتۋ، حالىقارالىق تاسىمالدار، ترانزيتتىك ساقتاۋ بويىنشا ەكىجاقتى ىنتىماقتاستىق مۇمكىندىكتەرى تالقىلاندى.

ايدىن كارىموۆتىڭ ايتۋىنشا، فورۋم جانە ەكىجاقتى كەزدەسۋ ناتيجەسىندە جالپى قۇنى 17,6 ميلليون ا ق ش دوللارى بولاتىن كەلىسىمدەر جاسالىپ، قۇجاتتارعا قول قويىلدى. اتاپ ايتقاندا:

- «Invest Shymkent» ج ش س جانە «China-Kazakhstan Enterprises Alliance Committee group» اراسىندا ءوزارا تۇسىنىستىك تۋرالى مەموراندۋم؛

- «KazFerroGroup» ج ش س جانە «Shanxi Heynan New Metallurgical Electric Equipment Co. LTP» كومپانياسى اراسىندا فەرروقورىتپا پەشىن ساتىپ الۋ تۋرالى كەلىسىم (16,3 ميلليون ا ق ش دولل. )؛

- «JT Food Expert» جانە «Xi'an Gang Tong Tian Xia Dian Zi Shang Wu You Xian Gong Si» كومپانيالارى اراسىندا تاماقتانۋ سالاسىندا بىرلەسكەن كاسىپورىن قۇرۋ تۋرالى كەلىسىم؛

- «KazBioTech» ج ش س جانە «Alashankou city Haoyu Trading Co. Ltd» اراسىنداعى وسىمدىك مايىن ساتۋ تۋرالى كەلىسىم (1,3 ميلليون ا ق ش دولل. ).

ايتا كەتەيىك، بيىل كۇزدە شىمكەنت قالاسىندا ەكى قالانىڭ بيزنەس قاۋىمداستىعى وكىلدەرىنىڭ قاتىسۋىمەن اۋقىمدى فورۋم وتكىزۋ جوسپارلانىپ وتىر.

اۆتور

جانسايا تاۋەكەل قىزى