ورتالىق قىتايداعى جياۋزۋ قالاسىندا ورنالاسقان سيىر ەتىنەن حوتپوت ازىرلەيتىن مەيرامحانالار جەلىسىنىڭ يەسى ما يانلي 24-قىركۇيەكتە بىرنەشە قىزمەتكەرىن جاڭا كولىكتەرىن الۋعا ەرتىپ بارعان. Henan TV تەلەارناسىنىڭ حابارلاۋىنشا، كاسىپكەر ءارقايسىسىنىڭ قۇنى 300 مىڭ يۋان (شامامەن 45 مىڭ ا ق ش دوللارى) بولاتىن BMW كولىكتەرىن ەكى اپتا بۇرىن تولىق تولەم جاساپ ساتىپ العان.
سىيلىق العان قىزمەتكەرلەردىڭ ءبىرى لي جە بۇل جاڭالىققا سەنەر-سەنبەسىن بىلمەگەنىن ايتقان. ونىڭ سوزىنشە، BMW سالونىنا بارا جاتقاندا ما يانلي وعان جاي عانا «ۇلكەن ويىنشىق» سىيلايتىنىن جەتكىزگەن. سول كۇنى اق ءتۇستى جاڭا BMW كولىگى ليدىڭ اتىنا راسىمدەلگەن. قىزمەتكەر كولىك ءۇشىن ەشقانداي اقى تولەمەگەن. سونىمەن قاتار كاسىپكەر سىيلىقتىڭ ورنىنا قانداي دا ءبىر كەلىسىمشارتقا قول قويۋدى تالاپ ەتپەگەن.
ما يانلي قىزمەتكەرلەرىنە كولىك سىيلاۋ يدەياسىن وتكەن قىستا ويلاستىرعانىن ايتقان. ول كومپانيانىڭ جەتىستىگىن ۇجىمنىڭ ورتاق ەڭبەگىمەن بايلانىستىرىپ، بيزنەستىڭ تابىسى قىزمەتكەرلەرگە دە تىكەلەي پايدا اكەلۋى كەرەك دەپ سانايدى.