قىتايلىق ب ا ق: شي جينپيڭنىڭ قازاقستان پرەزيدەنتىمەن ءبىرىنشى بولىپ كەزدەسۋىنىڭ تەرەڭ ءمانى بار

قىتايلىق ب ا ق قازاقستان مەن قىتاي باسشىلارىنىڭ كەزدەسۋى تۋرالى جازا كەلە، ق ح ر ءتوراعاسى شي جينپيڭنىڭ قازاقستان پرەزيدەنتى قاسىم- جومارت توقايەۆپەن ءبىرىنشى بولىپ كەزدەسۋىنىڭ تەرەڭ ءمانى بار ەكەنىن اتاپ ءوتتى، دەپ حابارلايدى kazinform.

قىتايدىڭ CCTV ارناسىنىڭ ءتىلشىسى ءوزىنىڭ بەينەرەپورتاجىندا بيىل «ءبىر بەلدەۋ، ءبىر جول» باستاماسىنا 10 جىل تولعانىن اتاپ ءوتتى.

«ءتوراعا شي جينپيڭ «ءبىر بەلدەۋ، ءبىر جول» ءۇشىنشى سامميتى قارساڭىندا ونداعان ەلدىڭ باسشىلارىمەن ەكىجاقتى كەلىسسوزدەر وتكىزۋدى جوسپارلاپ وتىر. بۇل كەلىسسوزدەردىڭ ءبىرىنشىسى قازاقستان پرەزيدەنتى توقايەۆپەن بولادى. ويتكەنى، «ءبىر بەلدەۋ، ءبىر جول» باستاماسى العاش بولعان جەر رەتىندە قازاقستاننىڭ قىتاي ءۇشىن ماڭىزى زور»، - دەدى ءتىلشى.

ب ا ق شي جينپيڭنىڭ 2013 -جىلى قازاقستان ەلورداسى استانادا سويلەگەن سوزىندە «جاڭا جىبەك جولىنىڭ ەكونوميكالىق بەلدەۋىن بىرلەسىپ قۇرۋ» باستاماسىن ۇسىنعانىن ەسكە سالدى.

قىتاي جۋرناليسى قازاقستان «ءبىر بەلدەۋ، ءبىر جول» جوباسى باستالعان جەر عانا ەمەس، سونىمەن قاتار بۇل ماڭىزدى حالىقارالىق باستامانىڭ جۇزەگە اسىرۋدىڭ ۇلگىلى قاتىسۋشىسى ەكەنىن اتاپ ءوتتى. بۇدان بولەك، «ءبىر بەلدەۋ، ءبىر جول» جوباسىن دامىتۋ ءۇشىن قىتايمەن كوپتەگەن بىرلەسكەن كۇش- جىگەر جۇمساپ جاتقانى ءمالىم ەتىلدى.

«قىتاي مەن قازاقستان جوعارى ساپالى بىرلەسكەن جۇمىس ارقىلى حالىقارالىق قاۋىمداستىققا ىنتىماقتاستىقتىڭ ۇلگىسىن كورسەتتى»، - دەدى ءتىلشى.

CCTV ارناسىنىڭ حابارلاۋىنشا، «ءبىر بەلدەۋ، ءبىر جول» باستاماسى ۇسىنىلعاننان كەيىن ءبىر جىل وتپەي جاتىپ، قىتاي مەن قازاقستان ليانيۋنگان لوگيستيكالىق ىنتىماقتاستىق ورتالىعىن قۇردى. بۇل «ءبىر بەلدەۋ، ءبىر جول» باستاماسى اياسىندا ءساتتى جۇزەگە اسىرىلعان العاشقى حالىقارالىق جوبا. جوبا دۇنيە جۇزىندەگى تەڭىزگە شىعا المايتىن ەڭ ءىرى مەملەكەت قازاقستاندى بايتاق تەڭىزبەن بايلانىستىرىپ، ورتالىق ازيا مەن الەم اراسىنداعى ەكونوميكالىق جانە ساۋدا بايلانىستارىن جاقىنداتا تۇسەدى.

CCTV تىلشىلەرى ۆيدەورەپورتاجدا قازاقستان مەن قىتايدىڭ ونجىلدىق بىرلەسكەن ىنتىماقتاستىعى ارقىلى ەۋروپا مەن ازيا ارقىلى تاسىمالداۋ باعىتىن قۇرىپ، حالىقارالىق لوگيستيكا جانە كولىك سالاسىنداعى ىنتىماقتاستىقتى جاڭا دەڭگەيگە كوتەرگەنىن ايتتى.

ءدال وسى سەبەپتى «ءبىر بەلدەۋ، ءبىر جول» ءۇشىنشى ءسامميتى قارساڭىندا ق ح ر ءتوراعاسى ءبىرىنشى بولىپ قازاقستان پرەزيدەنتىمەن كەزدەسۋدى ءجون كوردى.

اۆتور

مۇحتار مۇرات