قىتايلىق اۆتوموبيل برەندتەرىنىڭ قازاقستانداعى بولاشاعى زور - شي جينكە

استانا. KAZINFORM - وتكەن جىلى العاش رەت الەمدەگى ەڭ ءىرى اۆتوموبيل ەكسپورتتاۋشىسى بولعاننان كەيىن قىتاي 2024 -جىلى اۆتوموبيل ەكسپورتىنىڭ ءوسۋ ءۇردىسىن جالعاستىردى.

قىتاي اۆتوموبيل وندىرۋشىلەرى قاۋىمداستىعىنىڭ ستاتيستيكالىق مالىمەتى بويىنشا، قىتايدىڭ اۆتوموبيل ەكسپورتىنىڭ كولەمى وسى جىلدىڭ شىلدە ايىندا 469 مىڭ داناعا جەتىپ، وتكەن جىلمەن سالىستىرعاندا 19,6 پايىزعا ءوستى.

قىتايدىڭ 2024 -جىلدىڭ العاشقى جەتى ايىندا كولىك قۇرالدارىنىڭ جالپى ەكسپورتى 3,26 ميلليون دانا بولدى (2023 -جىلدىڭ سايكەس كەزەڭىمەن سالىستىرعاندا (,8 ءوستى)، ونىڭ 700 مىڭى ەلەكترلى كولىكتەر.

سونىمەن بىرگە ورتالىق ازيا قىتايلىق اۆتوموبيل وندىرۋشىلەرى باعالاعان نارىقتىڭ بىرىنە اينالدى. ورتالىق ازياداعى ەڭ ءىرى نارىق قازاقستاندا قىتايدىڭ Great Wall Motors اۆتوكومپانياسى وتكەن جىلى 8824 كولىك ساتقان. Great Wall Motors حالىقارالىق بيزنەس دەپارتامەنتىنىڭ پرەزيدەنتى شي جينكە Great Wall Motors قازاقستاندىق نارىققا تولىق سەنىم ارتاتىنىن ايتتى.

«قىتاي مەن قازاقستان اراسىنداعى ەكونوميكالىق جانە ساۋدا قارىم- قاتىناستارى تەرەڭدەي تۇسكەن سايىن، قىتايلىق اۆتوموبيل برەندتەرىنىڭ قازاقستانداعى بولاشاعى زور بولادى دەپ ويلايمىن»، - دەدى ول.

قازىرگى ۋاقىتتا Great Wall Motors-تىڭ قازاقستاندا 20 ءىرى قالانى قامتيتىن 28 ديلەرلىك كەڭسەسى بار. كومپانيا وسى جىلدىڭ ءۇشىنشى توقسانىندا الماتى مەن استانادا جاڭا ديلەرلىك ورتالىقتار اشۋدى جوسپارلاپ وتىر.

2022-جىلدىڭ سوڭىنان باستاپ قىتايدىڭ تاعى ءبىر اۆتوكولىك كومپانياسى Geely Automobile قازاقستاندا ءىرى قالالاردى قامتيتىن 16 ديلەرلىك جانە اۆتوسالوندار اشتى. كاسىپورىن قازىرگى تاڭدا قازاقستاندىق نارىقتا 7 ۇلگىنى ۇسىنادى. Geely ورتالىق ازيا ەلدەرى قىتايلىق اۆتووندىرۋشىلەر ءۇشىن ماڭىزدى ءوسۋ قوزعالتقىشىنا اينالىپ وتىرعانىن ايتتى. كاسىپورىن قىرعىزستان نارىعىنا وتكەن جىلى كىرگەن، ەندى ءوز ونىمدەرىن وزبەكستان، تاجىكستان جانە تۇركىمەنستانعا ەكسپورتتاۋدى كوزدەپ وتىر.

ايتا كەتۋ كەرەك، قازاقستاندىق Orbis Kazakhstan كومپانياسى الماتى يندۋستريالىق پاركىندە تولىق تسيكلدى اۆتوموبيل زاۋىتىن سالۋدى جوسپارلاپ وتىر. جوبا اياسىندا ق ح ر- دىڭ Exeed جانە Kaiyi سەكىلدى برەندتەرى ءبىر ءوندىرىس الاڭىندا بىرىگەدى.

بۇدان بولەك، الماتىدا Chery, GWM (Haval) Changan اۆتوكولىكتەرىن شىعاراتىن مۋلتيبرەندتى Astana Motors Manufacturing Kazakhstan زاۋىتى سالىنىپ جاتىر. كاسىپورىن جىلىنا 90 مىڭ اۆتوكولىك شىعارادى دەپ جوسپارلانعان.

اۆتور

مۇقتار مۇرات