عالىم ونىڭ شەشىمىن تاپقاندارعا ءوز جالاقىسىنان اقشالاي سىياقى بەرۋگە دە دايىن. ول زەرتتەۋلەرىندە جاساندى ينتەللەكتىنى دە پايدالانىپ، ونى «ءبىلىمدى ءارى زەرەك اسپيرانتقا» تەڭەيدى.
South China Morning Post باسىلىمىنىڭ جازۋىنشا، بيىل جارىق كورگەن 400 بەتتەن اساتىن جيناققا ماتەماتيكانىڭ ءالى دە زەرتتەۋدى قاجەت ەتەتىن كوپتەگەن ماسەلەسى ەنگەن. سۋن جيۆەي عىلىمي قاۋىمداستىقتى وسى بولجامداردىڭ شەشىمىن ىزدەۋگە شاقىرىپ وتىر. ال كەيبىر ەسەپتەردى دالەلدەپ شىققاندارعا جەكە قاراجاتىنان سىياقى ۇسىنعان.
جاساندى ينتەللەكتىنى «زەرەك اسپيرانت» دەپ سانايدى
سۋن جيۆەيدىڭ پىكىرىنشە، جاساندى ينتەللەكت زەرتتەۋشىلەرگە كومەكتەسىپ، كۇندەلىكتى قايتالاناتىن ەسەپتەۋلەردى اۆتوماتتاندىرۋعا مۇمكىندىك بەرەدى. سونىڭ ارقاسىندا ماتەماتيكتەر ۋاقىتىن جاڭا ادىستەر مەن تەوريالاردى ازىرلەۋگە جۇمساي الادى.
عالىم كۇردەلى ماتەماتيكالىق ەسەپتەردى شەشۋ ءۇشىن جاساندى ينتەللەكتىنى دە قولدانادى. ول ج ي- ءدىڭ جۇمىسىن ءوزى باسقارىپ، ينتەرنەتكە قوسىلۋىن شەكتەيدى. سەبەبى جۇيە ەسەپتىڭ ءالى شەشىلمەگەنىن ءبىلىپ قويسا، ونى شەشۋگە تىرىسپاي قويۋى مۇمكىن.
مەن جاساندى ينتەللەكتىنى وتە ءبىلىمدى، ەڭبەكقور ءارى زەرەك اسپيرانت رەتىندە قابىلدايمىن، - دەيدى ماتەماتيك.
ونىڭ ەسەپتەۋ قۇرالدارىنا دەگەن قىزىعۋشىلىعى 2005-جىلى باستالعان. ال 2009-جىلى Mathematica باعدارلاماسىن مەڭگەرىپ، ونىڭ كومەگىمەن مىڭداعان جەكە جاعدايدى تەكسەرۋگە مۇمكىندىك العان.
سۋن جيۆەي عىلىمنىڭ دامۋى تەك دايىن سۇراقتارعا جاۋاپ تابۋمەن شەكتەلمەيتىنىن ايتادى. ونىڭ پىكىرىنشە، جاڭا سۇراقتار قويا ءبىلۋ جانە زەرتتەۋگە دەگەن قىزىعۋشىلىق تا ماڭىزدى ءرول اتقارادى.
عالىم جاساندى ينتەللەكتىنىڭ دامۋىنا بايلانىستى ماتەماتيكتەرگە الاڭداۋدىڭ قاجەتى جوق دەپ ەسەپتەيدى.
جاساندى ينتەللەكت كەز كەلگەن ماتەماتيكالىق ەسەپتى شەشە المايدى. سوندىقتان ماتەماتيكتەرگە دۇربەلەڭگە ءتۇسۋدىڭ قاجەتى جوق، - دەيدى ول.
عالىمدار ج ي-دىڭ عىلىمعا ىقپالىن تالقىلاپ جاتىر
جاساندى ينتەللەكتىنىڭ عىلىمعا اسەرى ماتەماتيكتەر اراسىندا قىزۋ تالقىلانىپ جاتىر. قىركۇيەك ايىندا فيلدس مەدالىن العان 25 ماتەماتيك ج ي-دىڭ دامۋى عىلىمي زەرتتەۋلەرگە كەرى اسەر ەتۋى مۇمكىن ەكەنىن ەسكەرتتى.
عالىمداردىڭ اشىق حاتىندا ج ي ازىرلەۋشى كومپانيالار ءوز مودەلدەرىن كوبىنە بۇرىننان بەلگىلى ەسەپتەردى قانشالىقتى جاقسى شىعاراتىنىنا قاراپ باعالايتىنى ايتىلعان. الايدا عىلىم ءۇشىن دايىن ەسەپتەردىڭ جاۋابىن تابۋ عانا ەمەس، جاڭا ادىستەر ۇسىنىپ، تىڭ يدەيالار اشۋ دا ماڭىزدى.
ماتەماتيكتەر ج ي كومەگىمەن الىنعان ناتيجەلەردى اسىعىس جاريالاۋ ولاردىڭ دۇرىستىعىن مۇقيات تەكسەرۋگە، اۆتورلاردىڭ ۇلەسىن انىقتاۋعا جانە وزگە زەرتتەۋلەردەن الىنعان تۇجىرىمداردى اجىراتۋعا كەدەرگى كەلتىرۋى مۇمكىن دەپ الاڭدايدى.
سونىمەن قاتار عالىمدار جاساندى ينتەللەكتىنىڭ زەرتتەۋ جۇمىسىن جىلدامداتىپ، جاڭا مۇمكىندىكتەر اشاتىنىن دا جوققا شىعارمايدى. ولاردىڭ پىكىرىنشە، بۇل تەحنولوگيانىڭ عىلىمعا تيگىزەتىن اسەرى ونى ادامداردىڭ قالاي قولداناتىنىنا بايلانىستى.
OpenAI مالىمدەمەسى داۋ تۋعىزدى
بۇل پىكىرتالاسقا OpenAI كومپانياسىنىڭ ءوز مودەلىنىڭ مىڭجىلدىقتىڭ جەتى ماتەماتيكالىق ماسەلەسىنىڭ ءبىرى - ناۆە-ستوكس تەڭدەۋلەرىنە قاتىستى ماسەلەنى شەشكەنى تۋرالى مالىمدەمەسى دە سەبەپ بولدى. بۇل ماسەلە تەڭدەۋلەر شەشىمدەرى مەن ولاردىڭ تەگىستىگىنە قاتىستى.
وسى مالىمدەمەدەن كەيىن نيۋ- يورك ۋنيۆەرسيتەتىنىڭ پروفەسسورى تريستان باكماستەر OpenAI ماتەماتيك ليەۆەنت الپەگە ەكەۋىنىڭ ورتاق زەرتتەۋ جۇمىستارىنىڭ ناتيجەلەرىن پايدالانعان بولۋى مۇمكىن دەپ مالىمدەمە جاسادى.
باكماستەردىڭ ايتۋىنشا، OpenAI زەرتتەۋ ناتيجەلەرىن جاريالاۋدىڭ بىرنەشە نۇسقاسىن ۇسىنىپ، ەكى رەت الپەگەنى اۆتورلار تىزىمىنەن الىپ تاستاۋدى سۇراعان. دەگەنمەن پروفەسسور OpenAI ۇسىنعان دالەلدەمەنى كورمەگەنىن جانە كومپانيا ولاردىڭ زەرتتەۋ جوبالارىن Codex جۇيەسى ارقىلى پايدالانعان دەپ ناقتى ايىپ تاقپايتىنىن اتاپ ءوتتى.
مەن وزىمە نە ايتىلعانىن، ونىڭ قاشان بولعانىن جانە ماعان قانداي ۇسىنىس جاسالعانىن بايانداپ وتىرمىن، - دەدى باكماستەر.
el.kz