قىتايدىڭ وڭتۇستىك-باتىسىندا سۋ تاسقىنىنان التى ادام قازا تاپتى

استانا. KAZINFORM - ساعات 11:00 دەگى جاعداي بويىنشا قىتايدىڭ وڭتۇستىك-باتىسىنداعى گۋيچجوۋ پروۆينتسياسىنىڭ جۋنتسزيان ۋەزىندە بولعان كۇشتى سۋ تاسقىنى سالدارىنان التى ادام وپات بولدى، دەپ جازادى شينحۋا.

بۇل تۋرالى جەرگىلىكتى سۋ تاسقىندارىنا قارسى شتابتىڭ باسپا ءسوز قىزمەتى حابارلادى.

سەيسەنبى كۇنىنەن باستاپ جۋنتسزيان ۋەزىن سوڭعى 50  جىلداعى ەڭ كۇشتى سۋ تاسقىنى باسىپ قالدى. بىرنەشە وزەندەردىڭ سۋ دەڭگەيى كۇرت كوتەرىلدى. سۋ اعىنىنىڭ ەڭ جوعارى كورسەتكىشى سەكۋندىنا 11360 تەكشە مەترگە جەتتى.

پروۆينتسياداعى تومەنگى اۋدانداردىڭ كوپ بولىگى سۋ استىندا قالىپ، بىرنەشە اۋىلدىق وكرۋگتەر مەن ەلدى مەكەندەردىڭ ينفراقۇرىلىمىنا ۇلكەن زيان كەلدى. بۇل اۆتوكولىك قوزعالىسىنا كەدەرگى جاساپ، بايلانىس قىزمەتتەرىنىڭ بۇزىلۋىنا، تۇرعىنداردىڭ قيىن جاعدايعا تاپ بولۋىنا اكەپ سوقتى.

قازىرگى تاڭدا ۋەزد ورتالىعىنداعى سۋ دەڭگەيى قاۋىپتى دەڭگەيدەن تومەندەدى. سونداي-اق، تاسقىنعا قارسى كۇرەس اياسىندا ارنالاردى تەرەڭدەتۋ مەن درەناج جۇمىستارىن جۇرگىزۋ، ەپيدەميالاردىڭ الدىن الۋ ماقساتىندا زالالسىزداندىرۋ شارالارىن ۇيىمداستىرۋ، اپاتتان كەيىن قالپىنا كەلتىرۋ جانە قايتا قۇرۋ جۇمىستارى جۇرگىزىلدى. سونىمەن بىرگە، سۋ تاسقىنى كەزىندە جوعالعان ادامداردى ىزدەستىرۋ جۇمىستارى ۇيىمداستىرىلدى.

ەسكە سالساق، قاتتى جانە تولاسسىز جاۋعان جاڭبىر مەن وزەندەردىڭ جوعارعى اعىسىنان كەلگەن سۋ كولەمىنىڭ ارتۋى سالدارىنان قىتايدىڭ وڭتۇستىك-باتىسىنداعى گۋيچجوۋ پروۆينتسياسىنىڭ ەكى ۋەزىندە كۇشتى سۋ تاسقىنى بولدى. سەيسەنبى كۇنى ساعات 14:30 داعى مالىمەت بويىنشا جۋنتسزيان جانە سۋنتسزيان ۋەزدەرىندە تيىسىنشە 48900 جانە 32000 ادام ۋاقىتشا ەۆاكۋاتسيالاندى.

قىتاي بيلىگى سۋ تاسقىنىنان زارداپ شەككەن گۋيچجوۋ پروۆينتسياسىنا 100 ميلليون يۋان بولگەنى بەلگىلى بولدى.

ەكى كۇن بۇرىن گۋيچجوۋ پروۆينتسياسىندا تاسجول كوپىرى قۇلاپ، جۇك كولىگىنىڭ جۇرگىزۋشىسى قيراعان كوپىردە ءىلۋلى تۇرعان كولىك كابيناسىندا قالىپ قويعانىن حابارلاعان ەدىك.