قىتايدىڭ تانىمال بلوگەرى قازاقستان تۋريزمنىڭ ەلشىسى اتاندى

استانا. قازاقپارات - Kazakh Tourism قىتايدىڭ تانىمال ينفليۋەنسەرى تاوتاوعا «قازاقستان تۋريزمىنىڭ ەلشىسى» مارتەبەسىن تابىس ەتتى. بلوگەر ءوزىنىڭ 7 ميلليوندىق اۋديتورياسىنا ەلىمىزدىڭ باي مادەنيەتى مەن تابيعاتىن تانىستىرىپ كەلەدى.

قىتايلىق ينفليۋەنسەر قازاقستاننىڭ 3 وڭىرىمەن تانىسىپ ۇلگەردى. ول العاش رەت ەلىمىزگە 2024 -جىلى دۇنيەجۇزىلىك كوشپەندىلەر ويىندارىندا كەلگەن. بۇل جولى تاوتاو شىعىس قازاقستان جانە الماتى وبلىستارىنىڭ بىرەگەي تابيعي جەرلەرىن، استانا مەن الماتىنىڭ اينالاسىن ارالاپ ءجۇر.

تاوتاو اتقا مىنۋگە ەرەكشە قىزىعادى جانە ەلىمىزدىڭ مادەنيەتى مەن تابيعاتىنا باسا كوڭىل بولەدى. بلوگەر ءوز جازبالارىندا قازاقتىڭ ءداستۇرلى كيىمدەرى مەن ۇلتتىق اسحاناسىن، بۇركىتپەن اڭ اۋلاۋ ءتارىزدى بىرەگەي ساتتەرىن كورسەتەدى.

- مۇنداي قۇرمەتتى مارتەبەنىڭ بەرىلگەنىنە اسا قۋانىپ، ريزاشىلىعىمدى بىلدىرەمىن. بارىنشا كوپ ادام قازاقستان جايلى ءبىلسىن جانە كەلسىن دەگەن نيەتپەن اسەم تابيعاتتارىڭىز بەن ۇلتتىق تاعامدارىڭىزدى كورسەتۋدى جالعاستىرامىن، - دەيدى تاوتاو.

 2018-جىلدان بەرى Kazakh Tourism «ق ر تۋريزمىنىڭ ەلشىسى» باستاماسىن جۇزەگە اسىرىپ كەلەدى. بۇل قازاقستاندى تارتىمدى تۋريستىك باعىت رەتىندە ىلگەرىلەتۋگە، الەمنىڭ تۇكپىر-تۇكپىرىندەگى ساياحاتشىلار نازارىن ەلىمىزدىڭ تابيعي جانە مادەني بايلىعىنىڭ الۋان تۇرلىلىگىنە اۋدارۋعا باعىتتالعان. وتكەن جىلى قۇرمەتتى ميسسيانى جاپوندىق بلوگەر يۋدجي ناتسۋما قابىلداعان ەدى.

- تۋريزم ەلشىلەرى ينستيتۋتى - ۇلتتىق تۋريستىك برەندتى شەتەلدە ىلگەرىلەتۋدىڭ ماڭىزدى قۇرالى. ولاردىڭ اراسىندا تۋريستىك يندۋستريانىڭ، مادەنيەت جانە ءبىلىم بەرۋ، مەديا سيفرلىق كەڭىستىك وكىلدەرى بار. قازاقستان تۋريزمىنىڭ ەلشىلەرى الەمنىڭ ءبىرقاتار مەملەكەتىندە بار. ولار وزدەرىنىڭ ۇلكەن ىقىلاسىمەن جانە اقىسىز نەگىزدە ەلىمىزدى كوپشىلىككە تانىتىپ كەلەدى، - دەدى «Kazakh Tourism» ۇ ك» ا ق باسقارما ءتوراعاسى قايرات ءسادۋاقاسوۆ.

ايتا كەتەيىك، بۇگىن ەلوردادا «تاتۋ كورشى جانە دوستىق: بولاشاققا قادام قىتاي-ورتالىق ازيا گۋمانيتارلىق الماسۋ» فورۋمى ءوتتى.

قىتاي مەن ورتالىق ازيا ەلدەرى اراسىندا كونتەنت جاساۋ، تەحنولوگيالارمەن الماسۋ جانە مادەني باعىتتاعى بىرلەسكەن جۇمىس ايرىقشا وزەكتى بولا تۇسكەن.

اۆتور

ايجان سەرىكجان قىزى