قىتايدىڭ حاربين قالاسى ا ق ش اگەنتتەرىنە ىزدەۋ جاريالادى
استانا. KAZINFORM - قىتايدىڭ حاربين قالاسى كيبەرشابۋىل ۇيىمداستىرۋ مەن قۇپيا اقپاراتتاردى ۇرلاۋعا قاتىسى بار دەگەن كۇدىكپەن ا ق ش-تىڭ ارنايى اگەنتتەرىنە ىزدەۋ جاريالادى.
حاربين قالالىق قوعامدىق قاۋىپسىزدىك باسقارماسى 16-ءساۋىر كۇنى Weibo الەۋمەتتىك جەلىسى ارقىلى جاريالاعان رەسمي حابارلامادان بەلگىلى بولعانداي، 2025 -جىلعى حاربيندە وتكەن IX قىسقى ازيا ويىندارى كەزىندە، ءدۇبىرلى دودانىڭ اقپاراتتىق جۇيەسى مەن حيلۋڭجياڭ پروۆينسياسىنىڭ ماڭىزدى اقپاراتتىق پلاتفورمالارىنا شەتەلدەن اۋقىمدى كيبەرشابۋىل جاسالعان.
حابارلامادا تەرگەۋ ناتيجەسى ا ق ش ۇلتتىق قاۋىپسىزدىك اگەنتتىگى ارنايى اقپاراتتىق وپەراتسيالار باسقارماسىنىڭ اگەنتتەرى كەتەرين ۋيلسون، روبەرت سنەللينگ جانە ستيۆەن دجونسوننىڭ اتالعان شابۋىلدارعا قاتىسقانىن دالەلدەيدى.
حابارلامادا سونداي-اق اتالعان اگەنتتەردىڭ قىتايدىڭ ماڭىزدى اقپاراتتىق ينفراقۇرىلىمدارىنا دا سان دۇركىن كيبەرشابۋىل ۇيىمداستىرعانى جانە Huawei سياقتى كومپانيالارعا باعىتتالعان كيبەرشابۋىلعا دا ات سالىسقانى قاداپ ايتىلدى.
حابارلاماعا سايكەس، قىتايعا قارسى كيبەرشابۋىل جاساۋ جانە قۇپيا اقپاراتتاردى ۇرلاۋ قىلمىستارىنا زاڭ بويىنشا قاتاڭ سوققى بەرۋ، ۇلتتىق كيبەرقاۋىپسىزدىكتى ساقتاۋ جانە حالىقتىڭ ءومىرى مەن مال-مۇلكىن قورعاۋ ماقساتىندا حاربين قالالىق قوعامدىق قاۋىپسىزدىك باسقارماسى اتالعان ءۇش كۇدىكتىگە حالىقارالىق ىزدەۋ جاريالاۋ جانە ءتيىستى سىياقى تاعايىنداۋ تۋرالى شەشىم قابىلداعان.
شينحۋا اگەنتتىگىنىڭ حابارلاۋىنشا، قىتايدىڭ كومپيۋتەرلىك ۆيرۋستارعا قارسى جەدەل شارالار جونىندەگى ۇلتتىق ورتالىعىنىڭ كومپيۋتەرلىك ۆيرۋستاردىڭ الدىن الۋ تەحنولوگيالارى بويىنشا ينجەنەرلىك زەرتحاناسى 3-ساۋىردە جاريالاعان ارنايى ەسەپكە سايكەس، 2025 -جىلدىڭ 7-14-اقپانى ارالىعىندا حاربين قالاسىندا وتكەن IX قىسقى ازيا ويىندارى كەزىندە، القالى شارانىڭ اقپاراتتىق جۇيەسى مەن حيلۋڭجياڭ پروۆينسياسىنىڭ اقپاراتتىق ينفراقۇرىلىمدارىنا شەتەلدەن جالپى 270,167 رەت حاكەرلىك شابۋىل جاسالعان. انىقتالعان شابۋىلداردىڭ c,24 ى، اتاپ ايتقاندا 170,864 ى ا ق ش-تان باعىتتالعان.
ناۋرىز ايىندا ءى ءى م كيبەرقىلمىسقا قارسى ءىس-قيمىل باسقارماسى جۇرگىزگەن جەدەل-ىزدەستىرۋ شارالارى بارىسىندا ءىرى كولەمدەگى الاياقتىق دەرەگى انىقتالعانىن جازعان ەدىك.
اۆتور
ەرلان مازان