قىتايدان قازاقستانعا كەلگەن تۋريستەر سانى ءوستى: ەرمەك مارجىقپايەۆ ق ح ر تۋريزم مينيسترىمەن كەزدەستى

استانا. KAZINFORM – ق ر تۋريزم جانە سپورت ءمينيسترى ەرمەك مارجىقپايەۆ ق ح ر مادەنيەت جانە تۋريزم ءمينيسترى سۋن ەليمەن كەزدەستى.

ۆەدمستۆو اتاپ وتكەندەي، تاراپتار كەزدەسۋ بارىسىندا تۋريزم سالاسىنداعى ەكىجاقتى ىنتىماقتاستىقتى تالقىلادى.

«كەيىنگى جىلدارى تۋريزم سالاسىنداعى ىنتىماقتاستىقتى جانداندىرۋ، تۋريستىك اعىمدى ۇلعايتۋ ماقساتىندا ءبىرقاتار شارا قابىلداندى»، - دەدى مينيستر.

ماسەلەن، 2023-جىلى قىتايدان قازاقستانعا كەلگەن تۋريستەر سانى بىرنەشە ەسە ارتىپ، 367 مىڭ ادامعا جەتكەن. سونىمەن قاتار بىلتىر 311 مىڭ قازاقستاندىق تۋريست قىتايعا ساپارلاعان. بۇل - 2022-جىلعى كورسەتكىشپەن سالىستىرعاندا ەكى ەسە كوپ.

مينيستر قازىرگى تاڭدا قازاقستان مەن قىتاي اراسىنداعى اۋە رەيستەر سانى اپتاسىنا 44 رەيسكە دەيىن جەتكەنىن اتاپ ءوتتى.

«ق ح ر ءتوراعاسىنىڭ قازاقستانعا مەملەكەتتىك ساپارى اياسىندا ءبىز قىتاي مەديا كورپوراتسياسىمەن (СМG)ەلدىڭ تۋريستىك الەۋەتىن ىلگەرىلەتۋ ماقساتىندا تۋريزم سالاسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويامىز»، - دەپ اتاپ ءوتتى ق ر تۋريزم جانە سپورت ءمينيسترى كەزدەسۋ بارىسىندا.

ق ح ر مادەنيەت جانە تۋريزم ءمينيسترى سۋن ەلي «قىتايداعى قازاقستان تۋريزمى جىلى» اياسىندا ءىس-شارالار جوعارى دەڭگەيدە ۇيىمداستىرىلعانىن اتاپ ءوتىپ، ەكى ەل اراسىنداعى ەكونوميكالىق، ساۋدا جانە گۋمانيتارلىق بايلانىستاردى ودان ءارى دامىتۋ ءۇشىن تۋريزم سالاسىنداعى ىنتىماقتاستىقتى جالعاستىرۋعا دايىن ەكەنىن جەتكىزدى.

كەزدەسۋ سوڭىندا ەرمەك مارجىقپايەۆ قىتايلىق ارىپتەسىنە بيىلعى قىركۇيەكتە قىتاي حالىق رەسپۋبليكاسىنىڭ ۇلتتىق قۇراماسى ونەر كورسەتەتىن 5-دۇنيەجۇزىلىك كوشپەندىلەر ويىندارى وتەتىنىن ايتتى.

2024-جىلدىڭ جەلتوقسانىندا الماتىدا «قىتايداعى قازاقستان تۋريزمى جىلىنىڭ» جابىلۋ ءراسىمىن وتكىزۋ جوسپارلانۋدا.