قىتايدان كەلگەن ستۋدەنت ق ر- دىڭ ۇرىمجىدەگى كونسۋلدىعىنا العىس ايتتى
قىتايدان كەلىپ، استاناداعى ەۆرازيا ۇلتتىق ۋنيۆەرسيتەتىنە ءبىلىم الىپ جاتقان ستۋدەنت، ەدىل ەربول ۇلى ءوزىنىڭ قازاق ەلىنە ۋاقىتىلى كەلۋىنە كومەكتەسكەن قازاقستاننىڭ ۇرىمجىدەگى كونسۋلدىعىنا العىس ايتتى. بۇل تۋرالى ول الەۋمەتتىك جەلىدە جازدى.
«ارمىسىزدار، ارداقتى اعايىن، قۇرمەتتى قازاق ەلى. مەن شەتتە تۋىپ وتكەن قانداستارىڭىزدىڭ ءبىرىمىن. جاقىندا قازاق ەلىنە ورالىپ، ءوزىم ارمانداعان استاناداعى ەۆرازيا ۇلتتىق ۋنيۆەرسيتەتىنە وقۋعا ءتۇستىم. وسى ورايدا، مەن قازاقستاننىڭ ق ح ر- داعى ەلشىلىگى، ۇرىمجىدەگى كونسۋلدىعىنا ەرەكشە العىسىمدى بىلدىرەمىن. مەن وقۋعا كەشىگىپ جاتقانىمدى، كەزەكتىڭ كوپتىگىنە ۇلگەرمەي جاتقانىمدى ايتىپ، ءوتىنىش جازعان ەدىم. كونسۋلدىق ۆيزامدى كەزەكسىز اشىپ بەردى. سونىڭ ارقاسىندا وقۋعا كەلىپ، وسىندا الاڭسىز ءبىلىم الىپ جاتىرمىن. اسىرەسە ديپلومات بولات سىرلبايەۆتىڭ كومەگىمەن مەنەن باسقادا كوپتەگەن ستۋدەنتتەر جانە باسقادا ەرەكشە جاعدايى بار ادامدار كەزەكسىز ۆيزا اشتىرىپ، قازاق ەلىنە كەلگەنىنە كۋا بولدىم. سىزدەردىڭ جۇمىستارىڭىزعا تەك ساتتىلىك تىلەيمىن! قانداستارمىزدىڭ قازاق ەلىنە كوپتەپ كەلۋىنە ءوز ۇلەستەرىڭىزدى قوسا بەرىڭىزدەر» ، - دەپ جازادى ەدىل ەربول ۇلى.
ايتا كەتەيىك، بۇعان دەيىن قىتايداعى قانداستاردىڭ كوشىنە ۇرىمجىدەگى ديپلوماتتار كەدەرگى كەلتىرىپ وتىرعانى جانە ۆيزالار ساتىلىپ جاتقانى تۋرالى اقپاراتقا قازاقستاننىڭ ق ح ر- داعى ەلشىلىگىنىڭ كونسۋلدىعى تۇسىنىك بەرگەن بولاتىن.
«ماسەلەنىڭ باستاۋى تىم تەرەڭدە جانە كۇردەلى ەكەندىگىن الەۋمەتتىك جەلى ارقىلى اقپارات تاراتۋمەن عانا ماشىقتانعان كوپ ازامات پەن بەلسەندى بىلە بەرمەيدى. الدىمەن، ۇرىمجىدەگى سىرتقى ىستەر مينيسترلىگىنىڭ پاسپورتتىق- ۆيزالىق قىزمەتى رەسمي ديپلوماتيالىق مەكەمە بولىپ تابىلمايدى جانە قىزمەتكەرلەرى وزگە ديپلوماتتار سەكىلدى حالىقارالىق قۇقىق نورمالارىمەن قورعالماعان. سەبەبى ەكى ەل اراسىندا قول جەتكىزىلگەن ۋاعدالاستىققا سايكەس ۆيزالىق قىزمەت «قازاقستان تەمىر جولى» اكتسيونەرلىك قوعامىنا قاراستى پاسپورتتىق پۋنكت بولىپ تابىلادى. قازىرگى ۋاقىتتا سول جارتىلاي رەسمي مەكەمەدە ق ر سىرتقى ىستەر مينيسترلىگى ۇزاق مەرزىمدى ساپارعا جىبەرگەن 3 قىزمەتكەر وتباسىن ەلگە تاستاپ قانداستاردىڭ سۇرانىسىن قامتاماسىز ەتۋ ءۇشىن توقتاۋسىز ەڭبەك ەتۋدە. سەبەبى، شىڭجاڭدا تۇراتىن 1,5 ميلليون قانداستىڭ كەم دەگەندە 30 پايىزى قازاقستان ۆيزاسىن الۋعا نيەت بىلدىرگەن. ول دەگەنىڭىز ورتا ەسەپپەن - 300 مىڭ ادام. بۇل - تىم كوپ ءوتىنىش» ، - دەلىنگەن مەكەمە اقپاراتىندا.
ۆيزا بەرۋ تالابىنا سايكەس قانداستاردان قۇجاتتار سول پاسپورتتىق پۋنكتتە قابىلدانادى. الايدا، ونىڭ جۇمىس كەستەسىنە اسەر ەتەتىن جاعدايلار بار.
«قىتايدا اقپاراتتىق تەحنولوگياعا قويىلاتىن قاتاڭ تالاپتارعا بايلانىستى ۆيزالىق قولداۋ جاسايتىن جانە ۆيزانى باسىپ شىعاراتىن باعدارلاما ايىنا كەم دەگەندە 2-3 كۇن جۇمىس ىستەمەيدى جانە قىزمەت كورسەتۋ ساپاسىن قامتاماسىز ەتۋ ماقساتىندا ءار اپتانىڭ سارسەنبىسىندە قازاقستاننىڭ بۇكىل الەمدەگى كونسۋلدىق مەكەمەلەرى ۆيزاعا قۇجات قابىلداۋدى جۇزەگە اسىرمايدى. زاڭ تالابى سولاي.
اتالعان سەبەپتەرگە بايلانىستى پاسپورتتىق قىزمەت ءار كۇن سايىن كەزەك تارتىبىمەن 150 پاسپورت قابىلدايدى. ونىڭ سىرتىندا كوشى- قون شاقىرۋى بار جانە قىتايدان كوشۋگە رەسمي رۇقسات العان قانداستار كەزەك تارتىبىنەن تىس ۆيزاعا قۇجات تاپسىرا الادى.
وسى تۇستا قانداستاردىڭ كوشىنە سول ۇرىمشىدەگى ديپلوماتتار كەدەرگى كەلتىرىپ وتىر دەگەن اقپارات شىندىققا مۇلدە ساي كەلمەيدى. سەبەبى جىل باسىنان 500 قانداسقا كەزەكسىز كوشۋگە جاعداي جاسالدى. بۇلاردان وزگە قازاقستانداعى جاقىن تۋىسى قايتىس بولعان نەمەسە اۋىر حالدە جاتقاندىعىن راستايتىن انىقتاما ۇسىنعان قانداستاردان ۆيزاعا قۇجاتتار ونىڭ كەزەكتە بار- جوعىنا قاراماستان قابىلدانادى. اتالعانداردى قورىتىندالايتىن بولساق، اپتاسىنا كەم دەگەندە 750-800 پاسپورت قابىلدانىپ جاتىر. ءبىر جىلدا 200 كۇن ۆيزاعا قۇجات قابىلداعان جاعدايدا 160000 پاسپورت قانا بەرۋ مۇمكىن بولادى. ەندەشە، قازىرگى ۋاقىتتا قانداستاردىڭ سۇرانىسىن تولىق كولەمدە قاناعاتتاندىرىپ، ولارعا ۆيزانى بەرۋ مۇمكىن ەمەس»، - دەپ تولىقتىرادى كونسۋلدىقتان.