قىتايدان كەلگەن كوكپارشىلار رەسەي كومانداسىنان جەڭىلىپ قالدى
استانا. KAZINFORM - استانادا ءوتىپ جاتقان V دۇنيەجۇزىلىك كوشپەندىلەر ويىندارىندا قىتايدان كەلگەن كوكپارشىلار جارىس جولىنان شىعىپ قالدى، دەپ حابارلايدى Kazinform ءتىلشىسى.
ىرىكتەۋ كەزەڭىندە رەسەي قۇراما كومانداسى مەن قىتاي ەلىنىڭ كوكپارشىلارى باق سىناپ، 4:1 ەسەبىمەن رەسەيلىك شاباندوزدار العا شىقتى.
«دۇنيەجۇزىلىك كوشپەندىلەر ويىندارىنا قىتايدىڭ «قازانات» ج ش س اتىنان كەلىپ قاتىسىپ جاتىرمىز. كوكپار، اۋدارىسپاق سەكىلدى ۇلتتىق ويىندارعا قاتىسۋ ءۇشىن، التاي، تارباعاتاي، ىلە وڭىرلەرىنەن ىرىكتەپ 25 سپورتشى الىپ كەلدىك. 2017 -جىلى ەكسپو حالىقارالىق كورمەسى اياسىندا وتكەن كوكپار ويىندارىندا 4-ورىن الىپ قايتقان ەدىك. بۇگىن جولىمىز بولمادى، ەندى باسقا سپورتشىلارىمىزدان ءۇمىت كۇتەمىز. كوشپەندىلەر ويىنى ساتىمەن ءوتسىن دەپ تىلەيمىز»، - دەيدى قىتايداعى قانداستاردان قۇرالعان كوكپار كومانداسىنىڭ جاتتىقتىرۋشىسى سەرىك ۇسەن ۇلى.
ايتا كەتەيىك، العاشقى كەزدەسۋ قازاقستان جانە وزبەكستان قۇراما كومانداسىنىڭ كوكپارشىلارى اراسىندا ءوتتى. قازاقستاندىق شاباندوزداردىڭ مەرەيى ۇستەم بولىپ، 16:0 ەسەبىمەن ايقىن جەڭىسكە جەتتى.
كوكپاردان 9 مەملەكەتتىڭ سپورتشىلارى ءوزارا مىقتىنى انىقتايدى. بۇل سپورت تۇرىنەن بارلىعى 104 سپورتشى قاتىسادى.
كوكپاردان باق سىنايتىن قۇرامالار: قازاقستان، ا ق ش، رەسەي، وزبەكستان، قىرعىزستان، ۆەنگريا، قىتاي، موڭعوليا جانە تۇركيا.
اۆتور
ريزابەك نۇسىپبەك ۇلى