قىتايدان اۋعانستانعا قازاقستان ارقىلى تاۋار جەتكىزۋ ماسەلەسى تالقىلاندى
الماتى. KAZINFORM - الماتىدا 21-قازان كۇنى قازاقستاننىڭ ۆيتسە- پرەمەرى سەرىك جۇمانعارين مەن اۋعانستان ساۋدا جانە ونەركاسىپ ءمينيسترى نۋريددين ازيزي اراسىندا وتكەن ارنايى سالالىق پانەلدىك سەسسيالار مەن ەكىجاقتى كەزدەسۋدە قاتىسۋشىلار قىتايدان اۋعانستانعا تاۋار جەتكىزۋ لوگيستيكاسىنىڭ وزەكتى ماسەلەلەرىن جانە قازاقستان ارقىلى ترانزيتتىك جولمەن قايتارىمدى لوگيستيكانىڭ مۇمكىندىكتەرىن تالقىلادى. بۇل تۋرالى ق ر ساۋدا جانە ينتەگراتسيا مينيسترلىگىنىڭ باسپا ءسوز قىزمەتى ءمالىم ەتتى.
باستى ماسەلەلەردىڭ ءبىرى - لوگيستيكانى ارزانداتۋعا قاجەتتى ۆاگوندار مەن كونتەينەرلەردىڭ قايتارىمدى جۇكتەلۋى. ساۋدا جانە ينتەگراتسيا ۆيتسە- ءمينيسترى قايرات تورەبايەۆ كەزدەسۋدە اۋعانستاننان قازاقستانعا يمپورتتىق تاۋارلاردى قايتارىمدى جۇكتەۋگە قاتىستى قازاقستان تاراپىنان جۇرگىزىلگەن مۇمكىندىكتەر ءاناليزى تۋرالى ايتىپ بەردى. قازاقستان نەگىزىنەن جەمىستەر، كوكونىستەر، قۇرما، بۇرشاق جانە باسقا دا ازىق- تۇلىكتەردى يمپورتتاۋعا قىزىعۋشىلىق تانىتىپ وتىر. «قازاقستان تەمىر جولى» ۇلتتىق كومپانياسىنىڭ باسقارۋشى ديرەكتورى باۋىرجان ورىنباساروۆ بوس كونتەينەرلەر مەن ۆاگونداردى قايتارۋدىڭ ەكى نۇسقاسىن ۇسىندى.
«بوس كونتەينەرلەردى قايتارۋ قيىندىقتارىن ەسكەرە وتىرىپ، اۋعان تاراپىنا پويىزداردىڭ اينالمالى قوزعالىسىن ۇيىمداستىرۋ مۇمكىندىگىن قاراستىرۋدى ۇسىنامىز: ياعني، قىتايدان كەلگەن تاۋارلارى بار كونتەينەرلەر قازاقستان ارقىلى اۋعانستانعا بارادى، وندا اۋعان تاۋارلارىمەن جۇكتەلەدى، كەيىن كاراچي پورتى ارقىلى قىتايعا كەتەدى»، - دەپ حابارلادى باۋىرجان ۋرىنباساروۆ. - ەكىنشى نۇسقا - جۇك پويىزى اۋعانستانعا جەتىپ، اۋعان تاۋارلارىمەن جۇكتەلىپ، قازاقستانعا قايتادى، وندا جۇكتەلگەن تاۋارلارمەن قىتايعا جونەلتىلەدى.
كەزدەسۋ بارىسىندا ەكىجاقتى ساۋدا كولەمىن 3 ميلليارد دوللار ا ق ش-قا دەيىن ارتتىرۋ ماقساتىندا اۆتوتاسىمالدار مەن كارانتيندىك ونىمدەر تۋرالى قۇجاتتاردى ازىرلەۋ جانە قول قويۋ قاجەتتىلىگى تالقىلاندى.
تاراپتار قىتاي - قازاقستان - اۋعانستان مارشرۋتى بويىنشا اۋعان تاۋارلارىن تاسىمالداۋ ءۇشىن لوگيستيكالىق حاب قۇرۋ مۇمكىندىگىن قاراستىردى. بۇل تاسىمال لوگيستيكاسىن ەداۋىر ارزانداتۋعا مۇمكىندىك بەرەر ەدى. سەرىك جۇمانعارين اۋعان تاراپىنا قازاقستاننىڭ شيان قالاسىنداعى قۇرعاق پورت، ليانيۋنگان پورتىنداعى قازاقستان- قىتاي لوگيستيكالىق تەرمينالى جانە بولاشاقتا ءۇرىمشى قۇرعاق پورتىندا سالىنىپ جاتقان تەرمينالدىڭ مۇمكىندىكتەرىن پايدالانۋ ۇسىنىسىن ءبىلدىردى.
«ءبىز لوگيستيكانى جەڭىلدەتىپ، رەتتەي الامىز، ءبىراق ءبىزدىڭ ەكىجاقتى قاتىناستارىمىزدى ايتارلىقتاي جانداندىرۋ ءۇشىن وندىرىستىك كووپەراتسيا جوبالارى قاجەت»، - دەدى قازاقستان ۆيتسە-پرەمەرى.
كەزدەسۋ قورىتىندىسى بويىنشا تاراپتار قازاقستان مەن اۋعانستاننىڭ ايماقتىق فورۋمىن ۇيىمداستىرۋعا كەلىسىم جاسادى، وندا اۋعانستان پروۆينتسيالارى مەن قازاقستان ايماقتارى ءوزارا پايدالى كووپەراتسيا جوبالارىن تالقىلاي الادى.
2024 -جىلدىڭ قاڭتار- تامىزىندا قازاقستان مەن اۋعانستان اراسىنداعى ساۋدا اينالىمى 330,7 ميلليون دوللارعا جەتتى. قازاقستاننان اۋعانستانعا ەكسپورت 316,5 ميلليون دوللاردى قۇرادى، ونىڭ ىشىندە ۇن، كۇنباعىس مايى، تابيعي گاز جانە تىڭايتقىشتار بار. اۋعانستاننان يمپورت 14,1 ميلليون دوللاردى قۇرادى، نەگىزگى تاۋارلارى مينەرالدى سۋلار، جەمىستەر، شىرىندار جانە اليۋميني ونىمدەرى بولدى.
ەسكە سالا كەتەيىك، بۇعان دەيىن ەنەرگەتيكا مينيسترلىگى مۇناي ونىمدەرىن تەمىر جول كولىگىمەن ەكسپورتتاۋعا تىيىم سالۋدى كوزدەيتىنىن جازعان بولاتىنبىز.