قىتايداعى تۇنگى بازاردا اتىس بولىپ، ەكى ادام قازا تاپتى

استانا. KAZINFORM - قىتايدىڭ حۋبەي پروۆينتسياسى، ۋحان قالاسىنداعى تۇنگى بازاردا 18 مامىر، جەكسەنبى كۇنى اتىس بولىپ، كەم دەگەندە ەكى ادام جاراقات الدى، ەكى ادام كوز جۇمعان.

سينگاپۋردىڭ «Lianhe Zaobao» باسىلىمىنىڭ حابارلاۋىنشا، 18-مامىر كۇنى كەشكە الەۋمەتتىك جەلىلەردە ۋحان قالاسىنىڭ تسياوكوۋ اۋدانى، چۋنجەن كوشەسىندەگى تۇنگى بازاردا جەرگىلىكتى ۋاقىتپەن ساعات 22:00 شاماسىندا كاۋاپ ساتاتىن تۇنگى بازاردا اتىس بولعانى تۋرالى بىرنەشە بەينەجازبا تارادى. كۋاگەرلەردىڭ ايتۋىنشا، قارۋلى ادام كەم دەگەندە ءتورت رەت وق اتقان، سالدارىنان ەكى ادام قازا تاۋىپ، قىلمىسكەر وقيعا ورنىنان قاشىپ كەتكەن.

جەلىدە تاراعان بەينەجازبادا اتىستان كەيىن وقيعا ورنىندا قان ىزدەرى مەن شاشىلعان زاتتار كورىنەدى. ءبىر ەر ادام ورىندىقتا وتىرىپ، باسى ارتقا قاراي شالقايعان كۇيدە ەس-ءتۇسسىز جاتىر. كۋاگەرلەردىڭ ايتۋىنشا، ورىندىقتاعى ەر ادامنىڭ باسىنا وق ءتيىپ، سول جەردە قازا تاپقان. تاعى ءبىر جارالانعان ەر ادام جەردە جاتقان، ول دا اۋىر جاراقاتتان كوز جۇمعان.

جەلىدەگى اقپاراتقا سايكەس، ورىندىقتا وتىرعان ەر ادام كاسىپكەر بولعان، ال جەردە جاتقان ەكىنشى جارالانعان ادام ونىڭ كولىك جۇرگىزۋشىسى ەكەن.

سينگاپۋردىڭ Lianhe Zaobao باسىلىمىنىڭ حابارلاۋىنشا، ۋحان قالاسىنىڭ پوليتسياسى قىلمىسكەردىڭ ۇستالعانىن حابارلادى، ءبىراق باسقا مالىمەتتەردى اشپادى.