قىتايداعى تابيعي اپاتتاردان كەلگەن شىعىن 7,5 ميلليارد دوللاردان استى
استانا. KAZINFORM - قىتايدا تابيعي اپاتتاردىڭ العاشقى التى ايداعى سالدارىنا قاتىستى رەسمي دەرەكتەر جاريالاندى، دەپ حابارلايدى Kazinform اگەنتتىگىنىڭ مەنشىكتى ءتىلشىسى قحر توتەنشە جاعدايلاردى باسقارۋ مينيسترلىگىنە سىلتەمە جاساپ.
مينيسترلىكتىڭ مالىمەتىنشە، التى اي ىشىندە ءارتۇرلى تابيعي اپاتتار 25,037 ميلليون ادامعا اسەر ەتكەن. تابيعي كاتاكليزمدەردىڭ سالدارىنان 307 ادام قازا تاپتى نەمەسە ءىز- ءتۇسسىز جوعالىپ كەتكەن دەپ ەسەپتەلەدى، 620 مىڭنان استام تۇرعىن شۇعىل ەۆاكۋاتسيالانىپ، قاۋىپسىز ايماقتارعا ۋاقىتشا ورنالاستىرىلعان.
ەل بويىنشا 29,6 مىڭ تۇرعىن ءۇي تولىعىمەن قيراعان، تاعى 347,2 مىڭنان استامى ءارتۇرلى دەڭگەيدە زاقىمدالعان. اۋىل شارۋاشىلىعى القاپتارىنىڭ 2,18 ميلليون گەكتارى زارداپ شەككەن. تىكەلەي ەكونوميكالىق شىعىن كولەمى 54,11 ميلليارد يۋانعا باعالانىپ وتىر - بۇل شامامەن 7,6 ميلليارد ا ق ش دوللارىنا تەڭ.
نەگىزگى شىعىن جەر سىلكىنىستەرى مەن تاسقىنداردان كەلگەن. سونىمەن قاتار، ەلدىڭ بىرنەشە ايماعىندا بۇرشاق، قۇرعاقشىلىق، تايفۋن، ۇسىك، بوران جانە ورمان ورتتەرى تىركەلگەن.
مينيسترلىك ءۇشىنشى توقساندا ءىرى توتەنشە جاعدايلاردىڭ تۋىنداۋ قاۋپى ءداستۇرلى تۇردە وسەتىنىن اتاپ ءوتتى. بۇل وندىرىستىك بەلسەندىلىكتىڭ ارتۋىمەن، تۋريستىك اعىمنىڭ كوبەيۋىمەن جانە كولىك، قوناق ءۇي مەن ويىن-ساۋىق سالالارىنا تۇسەتىن ماۋسىمدىق جۇكتەمەنىڭ ارتۋىمەن بايلانىستى.
شىلدە مەن تامىز ايلارىندا سۋ تاسقىنىنىڭ شارىقتاۋ ماۋسىمى باستالادى، بۇل كەزەڭدە نوسەر جاۋىن، اپتاپ ىستىق جانە تايفۋندار جيىلەيدى. بۇل قوسىمشا الاڭداۋشىلىق تۋعىزىپ وتىر.
ق ح ر بيلىگى بارلىق ءتيىستى جەرگىلىكتى مەكەمەلەرگە توتەنشە جاعدايلاردىڭ الدىن الۋ جانە مونيتورينگ جۇمىستارىن كۇشەيتىپ، قاۋىپ- قاتەرلەردى دەر كەزىندە انىقتاپ، حالىق پەن ينفراقۇرىلىمدى قورعاۋ شارالارىن قامتاماسىز ەتۋدى تاپسىردى.
بۇعان دەيىن قىتايدا قاتتى سۋ تاسقىنى سالدارىنان 80 مىڭنان استام ادام ەۆاكۋاتسيالانعانى حابارلانعان بولاتىن.