قىتايداعى كوكپار تارتقان قازاق بالالارى جەلى قولدانۋشىلارىن قىزىقتىردى - شەتەلدەگى قازاق باسپا ءسوزى
استانا. KAZINFORM - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
تۇركيا مادەنيەت جولى فەستيۆالىنە 40 مىڭ ونەرپاز قاتىسادى - TRT
مادەنيەت جانە تۋريزم ءمينيسترى مەحمەت نۋري ەرسوي ستامبۋلدا «تۇركيا مادەنيەت جولى فەستيۆالى» باعدارلاماسىن ەگجەي-تەگجەيلى تانىستىردى. 8 ايعا سوزىلاتىن فەستيۆال اياسىندا 6 مىڭنان استام ءىس-شارا ۇيىمداستىرىلادى.
مينيستر الەمدە تەڭدەسى جوق جوبا دەپ اتاعان «مادەنيەت جولى فەستيۆالى» بيىل 16 قالادا وتەدى ەكەن.
بۇل تۋرالى تۇركيا راديو تەلەۆيزيا پورتالى حابارلادى.
سونداي-اق ەرسوي فەستيۆالگە قاتىساتىن ونەرپازدىڭ سانى بىلتىرعى رەكوردتىق كورسەتكىشتى جاڭارتاتىنىن ايتتى. ءمينيستردىڭ مالىمەتىنشە، 2023 -جىلى فەستيۆالگە قاتىساتىن ونەر ادامى سانى 34 مىڭعا جەتسە، ال بيىلعى قاتىسۋشىلار سانى 40 مىڭ ونەرپاز بولماق.
ايتا كەتۋ كەرەك، بيىل تۇركيا مادەني جولى فەستيۆالىن 13-21-ءساۋىر ارالىعىندا ادانادا اپەلسين گۇلى كارناۆالىمەن باستالماق.
بۇل فەستيۆالدىڭ ەڭ ماڭىزدى ەلەمەنتتەرىنىڭ ءبىرى 80-نەن استام ءتۇپنۇسقا تۋىندىسى بار پيكاسسونىڭ اسەرلى كورمەسىن باستى قوناق رەتىندە كۇتپەك. جانە 3 اي بويى ءارتۇرلى قالالارداعى ونەر سۇيەر قاۋىمعا تانىستىرۋ ارقىلى ەرەكشە تاجىريبەگە قول جەتكىزۋدى ماقسات ەتۋدە.
سونىمەن قاتار الەمگە تانىمال كوپتەگەن تۇلعانىڭ تۋىندىلارى فەستيۆالدىڭ ءسانىن كەلتىرمەك. بيىلعى جىلى ءىس-شارالار 600 دەن استام نىساندا وتەدى.
مەملەكەتتىك وپەرا جانە بالەت تەاترى ايگىلى انادولى اڭىزى «شاحمەران» دا العاش رەت ساحناعا قويىلادى.
بەيجىڭدە قىتايداعى «قازاقستان تۋريزم جىلىنىڭ» تۋريزمدى دامىتۋ جانە ينۆەستيتسيالاۋ فورۋمى ءوتتى - «حالىق گازەتى»
28-ناۋرىز كۇنى بەيجىڭدە قىتايداعى «قازاقستان تۋريزم جىلىنىڭ» تۋريزمدى دامىتۋ جانە ينۆەستيتسيالاۋ فورۋمى ءوتتى. قىتاي مەن قازاقستان ءوزارا تۇسىنىستىك تۋرالى ءبىرقاتار مەموراندۋمعا قول قويىپ، قىتايداعى «قازاقستان تۋريزم جىلىنىڭ» شىمىلدىعىن اشتى. فورۋمعا قىتايدىڭ مادەنيەت جانە تۋريزم ءمينيسترى سۋن ەلي مەن قازاقستاننىڭ تۋريزم جانە سپورت ءمينيسترى ەرمەك مارجىقپايەۆ قاتىستى.
بۇل تۋرالى وسى اپتادا قىتايدىڭ «حالىق گازەتى» دە حابارلادى.
قىتايدىڭ مادەنيەت جانە تۋريزم ءمينيسترى سۋن ەلي تۋريزمدى دامىتۋ جانە ينۆەستيتسيالاۋ فورۋمى 2024 -جىلعى قىتايداعى «قازاقستان تۋريزم جىلى» اياسىنداعى ماڭىزدى ءىس-شارا ەكەنىن اتاپ ءوتتى.
قىتايلىق ءمينيستردىڭ مالىمەتىنشە، وتكەن جىلدىڭ مامىر ايىندا ق ح ر ءتوراعاسى شي جينپيڭ مەن ق ر پرەزيدەنتى قاسىم-جومارت توقايەۆ اراسىنداعى كەلىسسوزدەر بارىسىندا ول قىتاي- قازاقستان قارىم-قاتىناسى جاڭا «التىن 30 جىلدىقتى» اشقانىن جانە ەكى تاراپ ءداستۇرلى دوستىقتى بەلسەندى تۇردە ىلگەرىلەتىپ، ءوزارا ءتيىمدى ىنتىماقتاستىقتى تەرەڭدەتۋى كەرەك.
سونىمەن قاتار، قىتايدىڭ مادەنيەت جانە تۋريزم مينيسترلىگى قازاقستاندىق سەرىكتەستەرمەن بىرلەسىپ، ەكى مەملەكەت باسشىلارىنىڭ كونسەنسۋسىن جۇزەگە اسىرۋعا، قىتاي- قازاقستان تۋريستىك ىنتىماقتاستىعىندا ۇزدىكسىز جاڭا ناتيجەلەرگە قول جەتكىزۋگە جانە ەكى ەل حالقىنا باقىت جاراتۋعا جاردەمدەسۋگە دايىن ەكەنىن جەتكىزدى.
ال قازاقستاندىق مينيستر ەرمەك مارجىقپايەۆ قازاقستان تۋريستەردى تارتۋ ءۇشىن ءوزىنىڭ باي كوشپەلى مادەنيەتىن، جۇزدەگەن جىلدىق تاريحى مەن قايتالانباس تابيعي لاندشافتتارىن پايدالاناتىنىن ايتتى. سونداي-اق ول قىتايداعى «قازاقستان تۋريزم جىلى» - بۇل ەكى ەل اراسىنداعى دوستىق قارىم-قاتىناستى نىعايتۋعا كومەكتەسەتىن ماڭىزدى ءىس-شارا ەكەنىن ايتقان.
ايتا كەتەيىك، جوسپارعا سايكەس، 2024 -جىلى قىتايداعى «قازاقستان تۋريزم جىلى» اياسىندا 35-تەن استام ءىس-شارا وتكىزىلەدى.
يرانعا 300 مىڭنان استام شەتەلدىك ستۋدەنتتى تارتۋعا رۇقسات بەرىلدى - «Parstoday»
يراننىڭ ستۋدەنتتەر ءىسى جونىندەگى ۇيىمىنىڭ باسشىسى حاشەم داداشپۋر كەم دەگەندە 300000 حالىقارالىق ستۋدەنتتى تارتۋ ءۇشىن 200 دەن استام يراندىق ۋنيۆەرسيتەتكە رۇقسات بەرىلگەنىن حابارلادى. بۇل تۋرالى يراننىڭ «Parstoday» اقپارات اگەنتتىگى جازدى.
ءشاھيد بەحەشتي ۋنيۆەرسيتەتىندە وتكەن ەكىنشى سورايا ۇلتتىق فەستيۆالىندە اتالعان حاباردى حاشەم داداشپۋر جەتكىزدى.
ونىڭ ايتۋىنشا، يران ۋنيۆەرسيتەتتەرىندەگى جوعارى عىلىمي دارەجەلەر مەن عالىمداردىڭ ارقاسىندا ەلدىڭ 200-دەن استام ۋنيۆەرسيتەتى ستۋدەنتتىك ىستەر ۇيىمىنان حالىقارالىق ستۋدەنتتەردى تارتۋعا رۇقسات العان. سونداي- اق الداعى بەس جىلدا 320000 حالىقارالىق ستۋدەنتتى وقۋعا الامىز دەپ ۇمىتتەنەدى.
يران ستۋدەنتتەر ىستەرى ۇيىمىنىڭ باسشىسى ەلدەر اراسىنداعى مادەني ايىرماشىلىقتاردى قابىلداۋىمىز كەرەك دەپ توقتالعان. اتاپ ايتقاندا، كەز كەلگەن ەلدەن يرانعا كىرگەن ستۋدەنت ءوز ەلىنىڭ كوورديناتتارىمەن يراندا پايدا بولادى جانە يران ۋنيۆەرسيتەتتەرىندە ولاردىڭ قاتىسۋى ءۇشىن قاجەتتى دايىندىق بار.
ايتا كەتەيىك، قازىرگى ۋاقىتتا يراننىڭ 32 وبلىسىندا 2183 جوعارى ءبىلىم بەرۋ ورتالىعى بار.
سونداي-اق وسى اپتادا «Parstoday» - دە «يراننىڭ ەكونوميكالىق ءوسىمى ارتتى» دەگەن تاقىرىپتاعى اقپارات جاريالاندى.
حالىقارالىق ۆاليۋتا قورى ءوزىنىڭ ستاتيستيكالىق اقپاراتىندا يراننىڭ سوڭعى جىلدارداعى ەكونوميكالىق ءوسىمىنىڭ ارتقانىن جاريالادى.
يراندىق ب ا ق-تىڭ حابارلاۋىنشا، حالىقارالىق ۆاليۋتا قورى جاريالاعان ستاتيستيكالىق مالىمەتتەرگە سايكەس، يراننىڭ 2013-2021-جىلدىڭ سوڭىنا دەيىن (11-شى جانە 12-ۇكىمەتتەر) ورتاشا جىلدىق ەكونوميكالىق ءوسىمى 1,5 پايىزدى قۇراعان.
«حالىقارالىق ۆاليۋتا قورىنىڭ 1981 -جىلدان بەرى يراننىڭ ەكونوميكالىق ءوسىمى تۋرالى جاريالاعان ستاتيستيكاسىنا سايكەس، ەڭ تومەنگى ەكونوميكالىق ءوسىم قاسيەتتى قورعانىس داۋىرىندە %0,9 بولدى، بۇل ەلدىڭ سوعىس جاعدايلارىن ەسكەرگەندە قالىپتى جاعداي. ءبىراق سوعىستان كەيىن يراننىڭ سەگىز جىلداعى ەڭ تومەنگى ەكونوميكالىق ءوسىمى 2013 -جىلدان 2021 -جىلدىڭ سوڭىنا دەيىن بولدى»، دەپ جازادى «Parstoday» اقپارات اگەنتتىگى.
الماتىداعى «كوك توبە» ساياباعىندا وزبەكستاننىڭ تۋريستىك الەۋەتى كورسەتىلدى - «ءوز ا»
وزبەكستاندىق ب ا ق-تىڭ حابارلاۋىنشا، الماتى قالاسىنىڭ كورىكتى جەرلەرىنىڭ ءبىرى «كوك توبە» ساياباعىندا وزبەكستاننىڭ تۋريستىك الەۋەتى تانىستىرىلدى.
اتالعان ءىس-شارانى وزبەكستاننىڭ باس كونسۋلدىعى «Uzbekistan Airways» كومپانياسىمەن بىرلەسىپ قازاقستاننىڭ جەتەكشى تۋروپەراتورلارى مەن الماتى قوناقتارى مەن قالا تۇرعىندارى ءۇشىن ۇيىمداستىرعان.
ءىس-شارادا وزبەكستانداعى تۋريزم سالاسىنداعى جەتىستىكتەر، تۋريستىك باعىتتار مەن تاريحي ەسكەرتكىشتەردى ساقتاۋ، زاماناۋي قوناق ءۇي ينفراقۇرىلىمىن دامىتۋ تۋرالى اقپاراتتىق ماتەريالدار ۇسىنىلعان. قوناقتار شىعىستىڭ ۇلتتىق مادەنيەتىمەن تانىسۋعا مۇمكىندىك الىپ، وزبەك ۇلتتىق تاعامدارى - ءداستۇرلى پالاۋ جانە شىعىستىق تاتتىلەرىنەن ءدام تاتتى.
سونداي-اق وسى اپتادا «ءوز ا» - دا «وزبەكستان 52 ەلگە توقىما ونىمدەرىن ەكسپورتتادى» دەگەن تاقىرىپتاعى اقپارات جاريالاندى.
ستاتيستيكا اگەنتتىگىنىڭ مالىمەتىنشە، وزبەكستان 2024 -جىلدىڭ قاڭتار- اقپان ايلارىندا 519,4 ميلليون دوللارعا توقىما ونىمدەرىن ەكسپورتتاعان.
بۇل كورسەتكىش جالپى ەكسپورتتىڭ 14,3 پايىزىن قۇراپ، وتكەن جىلدىڭ وسى كەزەڭىمەن سالىستىرعاندا 3 پايىزعا وسكەن.
«ەكسپورتتالعان توقىما ونىمدەرىنىڭ ىشىندە نەگىزگى ۇلەستى دايىن توقىما بۇيىمدارى (37,4 پايىز) جانە ءجىپ (47,7 پايىز) الدى. 2024 -جىلدىڭ قاڭتار- اقپان ايلارىندا الەمنىڭ 52 ەلىنە توقىما ونىمدەرىنىڭ 496 ءتۇرى ەكسپورتتالدى»، - دەپ جازدى وزبەكستاندىق ب ا ق.
كوكپار تارتقان بالالار جەلى قولدانۋشىلارىن قىزىقتىردى - «Harajorga»
كوكپار تارتۋ - شينجاڭداعى از ساندى ۇلتتاردىڭ ءداستۇرلى ات سپورتى ويىندارىنىڭ ءبىرى. اتالعان ويىن كوبىنەسە مەرەكە- مەيرامداردا نەمەسە تويلاردا وتكىزىلەدى. كوكپار - ەرلىكتى سىنايتىن باسەكە ءتۇرى. شينجاڭداعى مال شارۋاشىلىعىن كاسىپ ەتكەن وڭىرلەردەگى بالالاردا كوكپار ويىنىن وينايدى، - دەپ حابارلايدى قىتايدىڭ «Harajorga» الەۋمەتتىك جەلىسى.
اتالعان اقپارات كوزىنىڭ دەرەگىنشە، 25-ناۋرىز كۇنى حوتاندا ءبىر توپ بالا كوكپار تارتىپ ويناعان ۆيدەوسىن جاريالاعان. ولاردىڭ اتپەن شاپقىلاپ، اسىر-سالىپ ويناعاندارى الەۋمەتتىك جەلى قولدانۋشىلارىن قىزىقتىرعان.
«كۇرەس كۇشتى سىنايدى، كوكپار ەرلىكتى سىنايدى. باقتاشىلاردىڭ بالالارى 3-4 جاسىنان باستاپ كوكپار تارتۋعا ماشىقتانادى. مىنا بالانىڭ قامشىنى تىستەگەن بەينەسى قانداي ادەمى. كوكپار جارىسى شاپشاڭدىقتى، قىراعىلىقتى، ات ۇستىندەگى تەپە-تەڭدىكتى ساقتاۋدى تالاپ ەتەتىن، قاتەرى دە بار ۇلتتىق ات ويىندارىنىڭ ءبىر ءتۇرى سانالادى»، - دەپ جازدى قىتايلىق ب ا ق.
بۇل اقپاراتتا اتقا ءمىنىپ كوكپار ويناپ جۇرگەن جەتكىنشەكتەردىڭ بىرنەشە ۆيدەوسى جاريالانعان. سولاردىڭ بىرىندە كوكپارشىلاردىڭ كيىمىن كيگەن 4-5 جاستاعى قازاق بالاسى، ۇلكەن بولعاندا تايعا ءمىنىپ، كوكپار تارتىپ، چەمپيون بولعىسى كەلەتىنىن ايتادى.
اۆتور
بەيسەن سۇلتان ۇلى