قىتايدا وتەتىن قىسقى ازيا ويىندارىنىڭ فاكەلى مەدالدارى تانىستىرىلدى
استانا. قازاقپارات - 2025-جىلى حاربين قالاسىندا وتەتىن IX قىسقى ازيا ويىندارىنىڭ فاكەلى جانە مەدالدارى، سونداي-اق ءانۇرانى رەسمي تۇردە بەلگىلى بولدى.
شينحۋا اگەنتتىگىنىڭ حابارلاۋىنشا، قىسقى ازيا ويىندارى الاۋىنىڭ فاكەلى تاقىرىبى - «سەرپىن»، بۇل قىسقى ازيا ويىندارى ومىرشەڭدىك پەن قۇشتارلىققا تولى دەگەن ماعىنانى بىلدىرەدى. الاۋدىڭ جالپى ۇزىندىعى شامامەن 735 م م، ۇستىڭگى ديامەترى شامامەن 115 م م.
الاۋدىڭ ءپىشىنى گۇلدەگەن سيرەن گۇلى سياقتى، قىتاي قىزىل، كۇلگىن، مۇزدى اق جانە ت. ب. تۇستەردى پايدالانىپ، حەيلۋنتسزيان جانە قابىلداۋشى قالا حاربيننىڭ قار-مۇز مادەني ەرەكشەلىكتەرىن سيپاتتايدى.
قىسقى ازيا ويىندارىنىڭ مەدال تاقىرىبى - «جارىس رۋحى». مەدالدىڭ الدىڭعى جاعىندا جارىس جولىنىڭ يىلگەن ءپىشىنى جانە IX قىسقى ازيا ويىندارىنىڭ ەمبلەماسى بەينەلەنگەن.
مەدالدىڭ ارتقى جاعىندا يابۋلي قار شاڭعى ايماعىنىڭ تاۋلارى مەن ورماندارى ۇلكەن جانە كىشى حينگان تاۋلارىنىڭ جەر بەدەرىمەن بىرىكتىرىلىپ، حاربين «كۇن ارالى» ساياحات ايماعىنىڭ «كۇن قاقپاسى» كەسكىنى بەينەلەنگەن.
IX قىسقى ازيا ويىندارىنىڭ ءانۇرانى «حاربين قارى» دەپ اتالادى. ءاننىڭ ءسوزى مەن مۋزىكاسى «مۇز بەن قاردىڭ ارمانى ءبىر، ال ازيانىڭ جۇرەگى ءبىر» تاقىرىبىمەن تىعىز بايلانىستى، ازيا ەلدەرى مەن ايماقتارى حالقىنىڭ بىرلىك پەن سۇيىسپەنشىلىككە، بەيبىت دامۋعا جانە ادامزاتتىڭ ورتاق بولاشاعىن بىرلەسىپ قۇرۋعا دەگەن كوزقاراسىن بىلدىرەدى.
IX قىسقى ازيا ويىندارى 2025-جىلدىڭ 7-14-اقپانى ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى.
سپورتشىلار 12 سپورت ءتۇرى بويىنشا 64 مەدال جيىنتىعىن ساراپقا سالادى.
بۇعان دەيىن حابارلاعانىمىزداي، ءدۇبىرلى دودا تاريحتا ەڭ كوپ ەل قاتىسقان قىسقى ازيادانىڭ ءبىرى بولماق. قازىرگى ۋاقىتتا 34 ەل/ايماقتان 1500 گە جۋىق سپورتشى ءوتىنىش بەرىپ ۇلگەردى.
اۆتور مۇحتار قاليموللا ۇلى