قىتايدا تەمەكىدەن تاۋلىگىنە 2700-دەن استام ادام كوز جۇمادى

استانا. قازاقپارات - قىتايدا شىلىمنىڭ زاردابىنان ءولىم- ءجىتىم كوبەيدى. كورشى ەلدە جىلدا ءدال وسى جاعدايدان 1 ميلليوننان استام ادام كوز جۇمادى. ميلليونداعان تۇرعىن ءتۇرلى سوزىلمالى دەرتكە دۋشار بولعان.

ستاتيستيكا قىتاي قوعامىن ايتارلىقتاي الاڭداتىپ وتىر. زياندى ادەتپەن كۇرەسۋگە مەملەكەت دارمەنسىز. وعان بىرنەشە سەبەپ بار.

الەم بويىنشا تۇتىنىلاتىن تەمەكىنىڭ 43 پايىزى قىتايعا تيەسىلى. تەڭ جارتىسىنا ءسال جەتپەيدى. شىلىم شەگۋگە قارسى كۇرەس قاۋىمداستىعىنىڭ مالىمەتىنە ساي بۇل ەلدە 300 ميلليوننان استام ادام تەمەكى شەگەدى. ونىڭ باسىم كوپشىلىگى ەر ادامدار. ناقتىراق ايتساق 296 ميلليون. ال ەندى سونىڭ ىشىندە 26 پايىزى 15 جاستاعى جەتكىنشەكتەر. تەمەكىگە قارسى كۇرەس قىتايدا ەڭ وزەكتى ماسەلەنىڭ بىرىنە اينالعان. بۇگىندە زياندى ادەتتەن جاپا شەگەتىندەر ارتىپ كەلەدى. جىلدا شىلىمنىڭ كەسىرىنەن 1 ميلليوننان استام ادام كوز جۇمادى. تاعى 3 ميلليوننان استامى ءتۇرلى ايىقپاس دەرتكە شالدىعادى.

دەنساۋلىق ساقتاۋ مينيسترلىگىنىڭ مالىمەتىنە سايكەس وكپە راك اۋرۋىمەن اۋىراتىن 10 ادامنىڭ 9 وسى شىلىمنان ەكەنىن انىقتاعان. ماسەلەن، 2023 -جىلى تەمەكىدەن 1 ميلليون 33 مىڭ 300 ادام قايتىس بولدى. بۇل ەلدەگى سپيد، تۋبەركۋلەز، وزىنە قول سالۋ نەمەسە جول-كولىك اپاتىنان بولاتىن ءولىم-جىتىمنەن دە كوپ. ءتىپتى ءبارىن بىرگە قوساڭ دا شىلىمنان كوز جۇماتىندار سانى باسىم.

سيۋي جياحۋا، قىتايدىڭ تەمەكىگە قارسى كۇرەس قاۋىمداستىعىنىڭ قىزمەتكەرى:

- باتىستاعى ەلدەرگە قاراعاندا قىتايدا تەمەكى تارتاتىن ايەلدەر الدەقايدا از. ءبىراق ەر ازاماتتار وتە كوپ. ايەلدەر، اسىرەسە جاستار ءسان رەتىندە قاراپ، ەر ازاماتتارمەن تەڭ بولامىز دەپ ويلايدى. ءبىراق ول ولاي ەمەس. مۇنى كوپ جاعدايدا كەش ءتۇسىنىپ جاتادى. وسىنىڭ ءبارىن بىلە تۇرا مەملەكەت تۇبەگەيلى تىيىم سالا الماي وتىر. تەك شىلىم شەگۋدىڭ زيانى تۋرالى اقپاراتتاندىرۋ، تەمەكى تارتۋدى قويۋعا ارەكەتتەنگەندەرگە پسيحولوگيالىق كەڭەس بەرۋ سياقتى الەۋمەتتىك قولداۋ كورسەتۋدەن ارى بارا الماي وتىر.

كەيىنگى جىلدارى قوعامدا زياندى ادەت بەلەڭ الىپ بارا جاتقاندىقتان ءبىرقاتار شەكتەۋلەر قويىلعان. سالىق كوتەرىلىپ، اشىق جارناماعا تىيىم سالىندى. اقپاراتتىق ناسيحاتتاۋ دا كۇشەيتىلدى. الايدا ءبارى ناتيجەسىز. ءبىر سوزبەن ايتقاندا قىتاي بيلىگى تەمەكىگە قاتىستى قاتاڭ تىيىم سالا الماي وتىر. سەبەپ، قىتاي الەمدەگى ەڭ ۇلكەن تەمەكى ءوندىرۋشى جانە ەڭ كوپ تۇتىنۋشى ەل بولىپ سانالادى. ەلدە جىلىنا 2 ميلليون 600 مىڭ توننادان استام تەمەكى وندىرىلەدى. ءبىر ميلليون فەرمەر تەمەكى وسىرۋمەن اينالىسادى. قازىر تەمەكى ءوندىرىسى قىتاي ۇكىمەتىنىڭ ەرەكشە نازارىندا. وندىرىسىنەن تۇسەتىن جىلدىق تابىس 214 ميلليارد ا ق ش دوللاردان اسادى. ۇلتتىق قازىناعا تۇسەتىن سالىق تا قوماقتى. دەي تۇرا، دەنساۋلىق ساقتاۋ مينيسترلىگىنىڭ مالىمەتىنە ساي 2024 -جىلى ەلدە شىلىم شەگەتىندەر ازايعان. ءبىراق اۋىز تولتىرىپ ايتاتىنداي ەمەس.

ايتا كەتۋ كەرەك، شىلىم ونى شەككەن ادامعا عانا ەمەس، قورشاعان ورتا ءۇشىن دە اسا زيان. بۇكىل دۇنيەجۇزىندە جىل سايىن تەمەكىمەن بايلانىستى دەرتتەن 8 ميلليون ادام كوز جۇمادى. ونىڭ 70 پايىزى وكپە اۋرلارىمەن بايلانىستى.

24.kz