قىتايدا تاعى دا حالىققا پىشاقپەن شابۋىل جاسالدى، بۇل - بيىلعى سەگىزىنشى وقيعا
استانا. قازاقپارات - 16-قاراشادا قىتايدىڭ شىعىسىنداعى جياڭسۋ پروۆينتسياسىنداعى ۋنيۆەرسيتەتتە كوپشىلىككە پىشاقپەن شابۋىل جاسالىپ، كوپتەگەن ادام قازا تاپتى. بۇل - قىتايداعى بيىلعى ءدال وسىنداي سەگىزىنشى جاعداي، دەپ جازدى CCTV اقپارات كوزى.
قىتاي اقپارات قۇرالدارىنىڭ حابارلاۋىنشا، شابۋىل 16-قاراشاعا قاراعان ءتۇنى بولعان. شابۋىل بولعان جەر ۋسي پوليتەحنيكالىق كاسىپتىك- تەحنيكالىق كوللەدجى بولسا، شابۋىل جاساعان - 21 جاستاعى كوللەدج ستۋدەنتى.
شابۋىل جاساماس بۇرىن قانىشەر سيۋي ينتەرنەتتە ماقالا جاريالاپ، ونىڭ ۋنيۆەرسيتەتى بەلگىلەنگەن زاۋىتتا كۇنىنە 16 ساعات جۇمىس ىستەۋگە ءماجبۇر ەتكەنىن جانە جۇمىس اقىسىن الا الماعانىن جازعان.
قىتاي پوليتسياسى 16-سى كۇنى تۇندە الدىن الا تەرگەۋدەن كەيىن كۇدىكتى سيۋيدىڭ (ەر ادام، 21 جاستا، كوللەدجدىڭ 2024 -جىلعى تۇلەگى) مەكتەپكە كوڭىلى تولماي، قوعامعا قارسى كەك الۋ نيەتى بولعاندىقتان شابۋىل جاساعانىن حابارلادى.
شابۋىل ناتيجەسىندە بارلىعى 8 ادام قازا تاۋىپ، 17 ادام ءارتۇرلى دارەجەدەگى جاراقات العان.
قىتاي پوليتسياسى قىلمىسكەردىڭ ۇستالعانىن جانە قىلمىستىق ءىس بويىنشا تەرگەۋ ءجۇرىپ جاتقانىن حابارلادى.
جۋىردا قىتايدىڭ گۋاڭدۋڭ پروۆينسياسىندا كولىكپەن ادەيى حالىقتى سوعىپ كەتكەن شابۋىل تۋرالى حابارلاعان بولاتىنبىز. بۇل شابۋىل بارلىعى 35 ادامنىڭ ءومىرىن قيدى.
ءبىر جىل ىشىندە قىتايدا قاراپايىم ادامدارعا قارسى وسىنداي زۇلىم شابۋىلدار كوپ بولدى:
10-ماۋسىمدا قىتايدىڭ جيلين قالاسىنداعى ساياباقتا ءتورت ا ق ش ازاماتىنا پىشاقپەن شابۋىل جاساپ، جاراقاتتادى؛
24-ماۋسىمدا جياڭسۋ پروۆينسياسىنىڭ سۋجوۋ قالاسىندا مەكتەپ اۆتوبۋسىن كۇتىپ تۇرعان جاپوندىق اناسى مەن بالاسىنا شابۋىل جاسالدى، ناتيجەسىندە مەكتەپ اۆتوبۋسىنىڭ جۇرگىزۋشىسى حۋ يۋپيڭ قايتىس بولدى؛
18-قىركۇيەكتە شىنجىندەگى جاپون مەكتەبىنىڭ وقۋشىسى مەكتەپكە بارا جاتقان بالاعا بەلگىسىز قىتايلىق ەر ادام شابۋىل جاساپ، ءولتىرىپ كەتكەن؛
30-قىركۇيەكتە قىتايدىڭ شاڭحاي قالاسىنداعى Walmart سۋپەرماركەتىندە ەر ادام تۇتىنۋشىعا پىشاقپەن شابۋىل جاساپ، ءۇش ادامدى ءولتىرىپ، 15 ادامدى جاراقاتتادى؛
8-قازاندا پىشاق ۇستاعان ەر ادام گۋاڭجوۋ قالاسىنداعى تيانحى اۋدانىنداعى باستاۋىش مەكتەپتىڭ كىرەبەرىسىندە ەكى باستاۋىش سىنىپ وقۋشىسى مەن ەرەسەك ايەلگە شابۋىل جاسادى؛
28-قازاندا قىتاي استاناسى بەيجىڭدەگى حايديان اۋدانىنداعى جۋنگۋانچۋن №3-باستاۋىش مەكتەبىنىڭ قاقپاسىنىڭ الدىندا ادامدارعا پىشاقپەن شابۋىل جاسالدى، بەس ادام، ونىڭ ىشىندە ءۇش باستاۋىش سىنىپ وقۋشىسى جارالاندى.
اۆتور
مۇقتار مۇرات