قىتايدا سيرەك كەزدەسەتىن ءىرى مەتال كەنىشى تابىلدى
استانا. KAZINFORM - قىتايدىڭ گەولوگتار توبى ەلدىڭ ىشكى موڭعوليا اۆتونومدى اۋدانىنان بۇرىن بەيمالىم بولىپ كەلگەن سيرەك كەزدەسەتىن مينەرالدىڭ ءىرى كەنىشىن تاپتى، دەپ حابارلايدى Xinhua.
حالىقارالىق مينەرالوگيا قاۋىمداستىعى رەسمي تۇردە Huanghoite-(Nd) دەپ اتاعان جاڭا مينەرال قۇرامىندا تەڭىز جەل گەنەراتورلارى مەن ەلەكتروموبيلدەرگە ارنالعان قوزعالتقىشتاردى قولدانۋدا شەشۋشى ەلەمەنت سانالاتىن جوعارى دەڭگەيدەگى نەوليمى بار كاربوناتتى مينەرال بولىپ تابىلادى.
جاڭالىقتى ىشكى موڭعوليا گەولوگيالىق زەرتتەۋلەر ينستيتۋتى مەن ۋحان گەولوگيالىق باقىلاۋ ۋنيۆەرسيتەتىنىڭ ماماندارى اشتى.
جەر قويناۋى الەمدەگى سيرەك كەزدەسەتىن مەتالدار كەنىشى بايان-وبو-نىڭ نەگىزگى بولىگىنىڭ ورتالىعىنان تابىلدى.
زەرتتەۋشىلەر توبىنىڭ جەتەكشىسى جاو لايشانىڭ سوزىنشە، بۇل جاڭالىق اتالعان كەنىشتىڭ كۇردەلى گەوحيميالىق قۇرىلىمى مەن باي رەسۋرستىق الەۋەتىن كورسەتەدى.
ايتا كەتەيىك، قىتاي جوعارى تەحنولوگيالىق ءوندىرىس بارىسىندا قولدانىلاتىن سيرەك مەتالداردىڭ ءىرى جەتكىزۋشىسى سانالادى.
وسىعان دەيىن قىتايدىڭ سيرەك مەتال ەكسپورتىنا قويىلعان شەكتەۋدى جەڭىلدەتۋى مۇمكىن ەكەنى تۋرالى جازدىق.