قىتايدا سۋ تاسقىنى سالدارىنان 80 مىڭنان استام ادام ەۆاكۋاتسيالاندى
استانا. KAZINFORM - قاتتى جانە تولاسسىز جاۋعان جاڭبىر مەن وزەندەردىڭ جوعارعى اعىسىنان كەلگەن سۋ كولەمىنىڭ ارتۋى قىتايدىڭ وڭتۇستىك- باتىسىنداعى گۋيجۋ پروۆينتسياسىنىڭ ەكى ۋەزىندە كۇشتى سۋ تاسقىنىنا اكەلىپ سوقتى، دەپ جازادى شينحۋا.
بۇل جەرگىلىكتى تۇرعىنداردى جاپپاي ەۆاكۋاتسيالاۋعا ءماجبۇر ەتتى.
سەيسەنبى كۇنى ساعات 14:30 داعى مالىمەت بويىنشا جۋنتسزيان جانە تسۋنتسزيان ۋەزدەرىندە تيىسىنشە 48900 جانە 32000 ادام ۋاقىتشا ەۆاكۋاتسيالاندى. ەكى ۋەزدە دە سۋ تاسقىنىنا بايلانىستى توتەنشە جاعدايعا ارەكەت ەتۋ دەڭگەيى ەڭ جوعارى - ءبىرىنشى دەڭگەيگە كوتەرىلدى.
جۋنتسزيان ۋەزى، «سۋنچاو» دەپ اتالاتىن اۋىلدىق فۋتبول ليگاسىمەن تانىمال. بۇل ليگا 100 دەن استام اۋىلدىق جانە قالالىق كوماندالاردى بىرىكتىرەدى جانە ەلدىڭ تۇكپىر- تۇكپىرىنەن جانكۇيەرلەردى تارتادى. وسى ۋەزگە دۇيسەنبى كۇنى ساعات 20:00 دەن باستاپ نوسەر جاۋىن جاۋعان. سەيسەنبى كۇنى ساعات 14:00 دەگى مالىمەت بويىنشا دۋليۋتسزيان وزەنىندەگى ءبىر گيدرولوگيالىق ستانتسيادا سۋ دەڭگەيى قاۋىپتى مەجەدەن اسىپ، 6,68 مەترگە جەتكەن.
«سۋنچاو» ليگاسىنىڭ ماتچتارى وتەتىن فۋتبول الاڭىن شامامەن ءۇش مەتر تەرەڭدىكتە سۋ باسقان.
فۋتبول الاڭىنىڭ ماڭىندا تۇراتىن جەرگىلىكتى تۇرعىن لۋن تيان سەيسەنبى كۇنى تاڭعى 8 دە ويانعاندا، ءۇيىنىڭ ءبىرىنشى قاباتىندا سۋ بەلىنە دەيىن كوتەرىلگەنىن ايتتى.
- سۋ وتە جىلدام كوتەرىلدى، سول سەبەپتى مەن ءۇشىنشى قاباتتا قۇتقارۋشىلاردى كۇتتىم. تۇستەن كەيىن مەنى قاۋىپسىز جەرگە جەتكىزدى، - دەدى لۋن تيان.
قۇتقارۋ جۇمىستارىنا ءورت سوندىرۋشىلەر مەن ەرىكتىلەردەن قۇرالعان توپتار تارتىلىپ، ولار ەكى ۋەزدە دە قايىقتار مەن ارنايى جابدىقتاردى پايدالاندى.
سەيسەنبى كۇنى ساعات 16:00 دەگى مالىمەت بويىنشا گۋيچجوۋ پروۆينتسياسىنىڭ توتەنشە جاعدايلاردى باسقارۋ دەپارتامەنتى اتالعان ەكى ۋەزگە تەمىرجول جانە تاس جول ارقىلى توتەنشە جاعداي كەزىندە كومەككە قاجەتتى زاتتار جونەلتتى. ونىڭ ىشىندە 30 مىڭ بوتەلكە اۋىز سۋ جانە 10 مىڭنان استام قاپتاما جەدەل دايىندالاتىن كەسپە بار.