قىتايدا قازاقستاندىق تەننيسشىنىڭ قارسىلاسى ويىن كەزىندە ەسىنەن تانىپ قالدى
16:11, 21 - قىركۇيەك 2023
گۋانجوۋدا ءوتىپ جاتقان WTA 250 تۋرنيرىندە وقىس جاعداي تىركەلدى. قازاقستاندىق تەننيسشى يۋليا پۋتينتسيەۆانىڭ قارسىلاسى كلارا تاۋسون ويىن كەزىندە ەسىنەن تانىپ قالدى.
ەكىنشى سەتتەن كەيىن دات قىزى مەديتسينالىق ءۇزىلىس الدى. ال ءۇشىنشى پارتيا باستالعان ساتتە كلارا ەكى رەت قاتەلەستى. ارتىنشا كورتقا ەسىنەن تانىپ قۇلادى.
دارىگەرلەر تەننيسشىگە كومەك كورسەتىپ، ويىن الاڭىنان ارنايى اربامەن الىپ كەتتى. ناتيجەسىندە جارىستان شىعىپ قالدى. ويىن كەزىندە گۋانجوۋدا 30 گرادۋس ىستىق بولعان.
WTA رەيتينگىندە 81-ورىندا تۇرعان يۋليا پۋتينتسيەۆا كەلەسى ويىنىن نەمىس قىزى تاتيانا ماريگە قارسى وتكىزەدى. ول جارىستاعى فاۆوريت سپورتشىلاردىڭ ءبىرى.