قىتايدا ماسا ارقىلى چيكۋنگۋنيا بەزگەگى تاراپ جاتىر

استانا. KAZINFORM - قىتايدىڭ وڭتۇستىگىندەگى گۋاندۋن پروۆينتسياسىنىڭ فوشان قالاسىنىڭ دەنساۋلىق ساقتاۋ باسقارماسى چيكۋنگۋنيا بەزگەگى ىندەتى تۋرالى حابارلاما جاريالاپ، اۋرۋعا شالدىققاندار سانى 1200 گە جۋىقتاعانىن مالىمدەدى.

قىتايلىق chinanews.com.cn اقپاراتتىق پورتالىنىڭ مالىمەتىنە سۇيەنسەك، فوشان قالاسىنىڭ چانچەن، نانحاي جانە شۇندە اۋداندارىندا چيكۋنگۋنيا بەزگەگى ىندەتى تىركەلگەن. 2025-جىلدىڭ 18 -شىلدەسىنە دەيىن شۇندە اۋدانىندا 1 161، نانحاي اۋدانىندا 16، ال چانچەن اۋدانىندا 22 جاعداي انىقتالعان.

چيكۋنگۋنيا بەزگەگى - چيكۋنگۋنيا ۆيرۋسىنان تۋىندايتىن جەدەل جۇقپالى اۋرۋ. ول نەگىزىنەن ماسانىڭ شاعۋى ارقىلى تارالادى. بارلىق جاستاعى ادامدار ىندەتتى جۇقتىرۋى مۇمكىن. اۋرۋ بەلگىلەرىنە جوعارى تەمپەراتۋرا، بۋىندار مەن بۇلشىقەتتەردىڭ اۋىرۋى جانە تەرىدەگى بورتپەلەر جاتادى. چيكۋنگۋنيا بەزگەگىمەن اۋىرعانداردىڭ كوپشىلىگى جەڭىل فورمادا اۋىرادى جانە شامامەن ءبىر اپتادا جازىلادى. اۋىر جاعدايلار مەن ءولىم-ءجىتىم سيرەك كەزدەسەدى.

گۋانچجوۋ بيلىگى ىندەت تىركەلگەن ءۇش اۋداندا «بارشا تۇرعىنعا ۇندەۋ» جاريالاپ، ولاردى دەمالىس كۇندەرى ماسالاردىڭ كوبەيۋ وشاقتارىن جويۋعا جانە ەرەسەك ماسالاردى جويۋعا بەلسەندى قاتىسۋعا شاقىردى.

بۇعان دەيىن قىتايدا ماسا ارقىلى تارالاتىن قاۋىپتى ۆيرۋستىڭ ءورشۋى بايقالعانىن جازعان ەدىك.