قىتايدا ليتي كەنىنىڭ ءىرى قورى تابىلدى

استانا. KAZINFORM - حۋنان پروۆينتسياسىندا قىتايداعى ەڭ ءىرى ليتي كەن ورىندارىنىڭ ءبىرى انىقتالدى. بۇل تۋرالى Kazinform اگەنتتىگى ءوڭىردىڭ جەر رەسۋرستارى دەپارتامەنتىنە سىلتەمە جاساپ حابارلايدى.

حۋنان پروۆينتسياسىنداعى لينۋ ۋەزىنىڭ تسزيتسزياوشان تاۋ ماسسيۆىندە جۇرگىزىلگەن گەولوگيالىق بارلاۋ جۇمىستارى ناتيجەسىندە كولەمى 490 ميلليون توننا بولاتىن ليتي كەنى انىقتالدى. بۇل كەندەگى ليتي توتىعىنىڭ كولەمى 1,31 ميلليون توننا دەپ باعالانىپ وتىر.

اتالعان كەن ورنى رۋبيدي، ۆولفرام جانە قالايى سىندى ستراتەگيالىق ماڭىزدى ىلەسپە ەلەمەنتتەرگە دە باي. بارلىق انىقتالعان رەسۋرستار بۇرىن مەملەكەتتىك قور ەسەبىنە ەنگىزىلمەگەن.

جوبا جەتەكشىسى چەن چجيتسياننىڭ ايتۋىنشا، بۇل جولى تاۋلى ايماقتا اۋىر بۇرعىلاۋ جابدىقتارىن اۋىر سالماقتى ۇشقىشسىز ۇشۋ اپپاراتتارى ارقىلى جەتكىزۋ تەحنولوگياسى العاش رەت قولدانىلىپ، جۇمىستىڭ تيىمدىلىگى ايتارلىقتاي ارتقان.

حۋنان پروۆينتسياسى مينەرالدىق رەسۋرستار ينستيتۋتىنىڭ پروفەسسورى سيۋي يميننىڭ ايتۋىنشا، بۇل ليتي كەن ورنىنىڭ اشىلۋى چەنچجوۋ قالالىق وكرۋگىندە جاڭا ەنەرگيا كوزدەرىنە ارنالعان وندىرىستىك بازا قۇرۋ ءۇشىن مىقتى رەسۋرستىق نەگىز قالايدى.

قازىرگى تاڭدا ليتي - ەلەكتروموبيلدەر، سمارتفوندار، نوۋتبۋكتەر جانە باسقا دا قۇرىلعىلاردا قولدانىلاتىن ليتي-يوندى اككۋمۋلياتورلاردى وندىرۋدە نەگىزگى مەتالداردىڭ ءبىرى سانالادى. سوڭعى مالىمەتتەرگە سايكەس، قىتايدىڭ راستالعان ليتي قورى جاھاندىق كولەمنىڭ ,5 قۇرايدى. بۇل كورسەتكىش بويىنشا قىتاي الەمدە ەكىنشى ورىندا تۇر.

بۇعان دەيىن ساراپشىلار مەن ترەيدەرلەر ليتيي باعاسى ەكى جىلدىق كۇرت تومەندەۋدەن كەيىن تۇراقتانا باستايدى دەپ بولجاعان بولاتىن.

ايتا كەتەلىك قىتاي اسكەري تەحنيكاسىن ەكسپورتتاۋعا نيەتتى ەكەنىن ءبىلدىردى.