قىتايدا كۇن 75 گرادۋسقا دەيىن ىسىدى

استانا. قازاقپارات- قىتايدا اۋا تەمپەراتۋراسى 75 گرادۋسقا دەيىن كوتەرىلدى. اپتاپ ەلدىڭ سولتۇستىك باتىسىنداعى شىڭجاڭنىڭ تۇرپان تاۋلارىندا تىركەلدى. مۇنداي جاعداي بۇرىن-سوڭدى بولماعان.

كۇننىڭ ىسۋى تۋريستەر مەن جەرگىلىكتى تۇرعىنداردىڭ ومىرىنە قاۋىپ تۋدىردى. ايماقتا توتەنشە جاعدايدىڭ قىزعىلت دەڭگەيى ەنگىزىلىپ، ەسكەرتۋ جاريالاندى.

سوعان قاراماستان تۋريستەر لەگى ازايار ەمەس. قايتا، كەرىسىنشە، ساياحاتشىلار سانى ارتا تۇسكەن. قىتايلىقتار كۇننىڭ ىسىعان ءساتىن پايدالانىپ، تۋريزمدى دوڭگەلەتىپ جاتىر. كاسىپكەرلەر قىزعان قۇمعا جۇمىرتقا ءپىسىرىپ، توننا-توننا سۋسىن، قاپ-قاپ مۇز ساتىپ، مول تابىسقا كەنەلدى. اسىرەسە 12 مەترلىك الىپ تەرمومەتردىڭ جانىندا فوتوسۋرەتكە تۇسۋگە قۇمارتۋشىلار كوپ.

تۇرپان مەتەورولوگيالىق وبسەرۆاتورياسى بۇل ايماقتا اپتاپ ءبىر اپتاعا دەيىن ساقتالاتىنىن مالىمدەدى.

لۋ تساو، تۋريست:

- مۇندايدى العاش رەت كورۋىم. كۇننىڭ ىسىعانى سونشالىق، ىستىق وشاقتا قاقتالىپ جاتقانداي اسەر الاسىڭ. بۇل - ەستە قالارلىقتاي عاجايىپ جاعداي.

مىناداي اپتاپ ءجيى بولاتىن ايماقتا جەرگىلىكتى تۇرعىندار قالاي ءومىر ءسۇرىپ جاتقانى تاڭعالدىرادى.

لان يۋنسيا، تۋريستىك اۋداننىڭ ماركەتينگ جونىندەگى ديرەكتورى:

- ىستىقتان قورعانۋدىڭ بار امالىن جاساپ جاتىرمىز. جەلدەتكىش جۇمىس ىستەپ، مۇز بەن سۋسىن ساۋداسى قىزىپ تۇر. الايدا بۇل ازدىق ەتىپ وتىر. توڭازىتقىشتار سۋىتىپ ۇلگەرمەيدى. مۇز دەمدە ەرىپ، اۋىزسۋ جىلىپ كەتىپ جاتىر. سونىمەن قاتار كۇننىڭ كوزىنەن قورعايتىن ءتۇرلى ءدارى- دارمەكتەر قورىن دا ارتتىردىق. ەڭ باستىسى - قاۋىپسىزدىك.

24.kz