سايت جەرلەۋ راسىمدەرىن ۇيىمداستىرۋعا قاتىستى حالىقتىڭ اقپاراتتىق قاجەتتىلىكتەرىنە باعىتتالعان.
ول ەل بويىنشا جەرلەۋ قىزمەتتەرىنىڭ اقپاراتتىق رەسۋرستارىن بىرىكتىرىپ، جانازا، ءمايىتتى جەرلەۋ جانە ەسكە الۋ شارالارىنا قاتىستى سۇراقتار بويىنشا سەنىمدى اقپارات پەن كەڭەس الۋعا مۇمكىندىك بەرەدى.
مينيسترلىك وكىلى سيۋي جەشەننىڭ ايتۋىنشا، ۆەب-پورتالدى ازىرلەۋ مەن ىلگەرىلەتۋگە ەلدەگى بارلىق ازاماتتىق اكىمشىلىك ورگاندار قاتىسقان.
ونىڭ سوزىنشە، جاڭا پلاتفورما جەرلەۋ راسىمدەرىن ۇيىمداستىراتىن ازاماتتارعا ءتۇرلى وڭىرلەردەگى قىزمەتتەردى جىلدام تابۋعا جانە ولاردىڭ باعاسىن ناقتى سالىستىرۋعا كومەكتەسەدى.
ۆەدومستۆو مالىمەتىنشە، كەلەسى كەزەڭدە سايتتىڭ مۇمكىندىكتەرى كەڭەيتىلىپ، ەكولوگيالىق جەرلەۋ تاسىلدەرىن دامىتۋعا جانە قىتايداعى مارقۇمداردى ەسكە الۋدىڭ وركەنيەتتى داستۇرلەرىن ناسيحاتتاۋعا باعىتتالادى.
قىتاي جىلدار بويى جەر رەسۋرستارىن ۇنەمدەۋ جانە قورشاعان ورتانى قورعاۋ ماقساتىندا ەكوجەرلەۋدى بەلسەندى دامىتىپ كەلەدى. 30-ناۋرىزدا جەرلەۋ قىزمەتتەرىنە قاتىستى جاقىندا قايتا قارالعان ەرەجەلەر كۇشىنە ەندى، وندا «ەكولوگيالىق جەرلەۋ تاسىلدەرى» تەرمينى ەنگىزىلدى.
نورماتيۆتىك اكتىلەر تەڭىزگە، اعاشقا، گۇلدەر اراسىنداعى نەمەسە شالعىنعا جەرلەۋدى تىكەلەي قولدايدى. قازىرگى تاڭدا قىتايدىڭ 28 اكىمشىلىك بىرلىگى ەكولوگيالىق جانە جەردى ۇنەمدەيتىن جەرلەۋ تاسىلدەرىن قولدايتىن نۇسقاۋلىقتار جاريالاعان، ولار سۋبسيديالار مەن ىنتالاندىرۋ شارالارىمەن بەكىتىلگەن.
مىسالى، شيان قالاسىندا ەكوجەرلەۋ ۇلەسى قازىرگى تاڭدا بارلىق جەرلەۋدىڭ 4,4 ىن قۇرايدى. قالا 2021 -جىلدان بەرى قوعامدىق پايدالى ءىس-شارا اياسىندا جەرلەۋدى سۋبسيديالاۋ باعدارلامالارىن ىسكە قوسىپ، ەكولوگيالىق جانە ىقشام جەرلەۋ نۇسقالارىن ىنتالاندىرۋ شارالارىن ەنگىزدى.
2023 -جىلدان باستاپ، «شيان فەنجەنيۋان» جەرلەۋ بيۋروسىندا ەكى ەكوجەرلەۋ راسىمىنەن بولەك، قالانىڭ ازاماتتىق باسقارماسى ءۇش جىل قاتارىنان جاعالاۋداعى چيڭداۋ قالاسىندا قايىرىمدىلىق تەڭىز جەرلەۋلەرىن ۇيىمداستىردى. وسى باستامالار ناتيجەسىندە 480 دان استام ادامنىڭ كۇلىن تابيعاتقا جەرلەۋ ارقىلى سوڭعى مەكەنىنە جەتكىزدى.
شيان - تەڭىزگە جەرلەۋدى قولدايتىن جالعىز قالا ەمەس. قىتايدىڭ بارلىق جاعالاۋلىق قالالارىندا وتباستار مارقۇم تۋىستارىمەن سوڭعى قوشتاسۋ رەتىندە وسى ءتاسىلدى تاڭدايدى.
بۇدان بۇرىن قىتايدا جاساندى ينتەللەكتىنى ەتيكالىق رەتتەۋدىڭ جاڭا ەرەجەلەرى بەكىتىلگەنىن جازعانبىز.