قىتايدا جۇمىسسىز جاستار كوبەيدى

استانا. قازاقپارات - قىتايدا جاستار اراسىندا جۇمىسسىزدىق دەڭگەيى تومەندەمەي تۇر، دەپ حابارلايدى 24KZ.

ەلدىڭ ۇلتتىق ستاتيستيكا بيۋروسىنىڭ مالىمەتىنە سايكەس قازىر جاستاردىڭ - عا جۋىعى جۇمىسسىز. اسىرەسە قالالاردا جاعداي قيىنداۋ. ەڭبەك نارىعىندا باسەكەلەستىك ارتقان.

جاستار جۇمىسسىزدىعىنا اسەر ەتكەن فاكتور كوپ. ەڭ ءبىرىنشى ماسەلە ءبىلىم بەرۋ جۇيەسىندە. كەيىنگى جىلدارى ەلدەگى جوعارى وقۋ ورىندارى مەن كوللەدج بىتىرگەن تۇلەكتەردىڭ ماماندىعى قازىرگى ەڭبەك نارىعىنداعى سۇرانىستارعا سايكەس كەلمەيدى. بۇل جاستاردى جۇمىسپەن قامتاماسىز ەتۋگە كەرى اسەر ەتىپ وتىر. وعان جىلدا جوعارى وقۋ ورىندارىن ءبىتىرىپ جاتقان ميلليونداعان تۇلەكتەر قوسىلادى. باسەكە وتە جوعارى. سونداي-اق جۇمىس ىزدەپ ءجۇرىپ قالعان جاستار تاجىريبەسىز بوپ شىعادى. ال كاسىپورىندار، مەكەمەلەر مەن ءوندىرىس ورىندارى بىردەن تاجىريبەلى جۇمىسشى العىسى كەلەدى.

وعان اۋىلدان جۇمىس ىزدەپ قالاعا كوشكەن تۇرعىنداردى قوسىڭىز. بيىل 30 ميلليون ادام قالاعا قونىس اۋدارعان. بۇل دا باسەكەلەستىكتى ارتتىرىپ وتىر. بۇگىندە جۇمىس تاپپاي جۇرگەندەردىڭ دەنى - 16 مەن 24 جاس ارالىعىنداعى جاستار. ەلدە ەڭبەك نارىعىندا پاندەميا كەزىندە بۇزىلعان تەپە-تەڭدىك ءالى كۇنگە دەيىن وڭالماي تۇر. كەيبىر ماماندىقتار جويىلىپ، كوپتەگەن مەكەمەلەر مەن كاسىپورىنداردا جاپپاي قىسقارتۋ ءجۇردى.

جاپپاي قىسقارتۋعا الىپ كەلگەن تاعى ءبىر فاكتور - كاسىپورىندار جۇمىسىنىڭ روبوتتاندىرىلۋى. ءوندىرىس ورىندارىنىڭ كوبى زاماناۋي تەحنولوگياعا كوشىپ اۆتوماتتاندىرىلعان. ناتيجەسىندە مىڭداعان جۇمىسشى كەرەكسىز بوپ قالدى. جىل باسىندا جالپى جۇمىسسىزدىق كۇرت ءوسىپ %6,1- عا جەتتى. ۇلتتىق ستاتيستيكا بيۋروسىنىڭ مالىمەتىنە سايكەس مەملەكەت ءبىرقاتار جوبانى جۇزەگە اسىرۋىنىڭ ارقاسىندا شىلدە ايىندا كورسەتكىش %5,4 تومەندەگەن. بۇل جونىندە ەڭبەك رەسۋرستارى جانە الەۋمەتتىك قامتاماسىز ەتۋ مينيسترلىگى بريفينگ كەزىندە مالىمدەدى.

يۋن دۋنلاي، ق ح ر ەڭبەك رەسۋرستارى جانە الەۋمەتتىك قامتاماسىز ەتۋ مينيسترلىگىنىڭ دەپارتامەنت ديرەكتورى:

- بيىل العاشقى جارتى جىلدىقتا 6,98 ميلليون جاڭا جۇمىس ورنى اشىلدى. وسىنىڭ ارقاسىندا شاھارلارداعى جۇمىسسىزدىق دەڭگەيى تومەندەدى. جىل سوڭىنا دەيىن 12 ميلليون جاڭا جۇمىس ورنىن اشۋ كوزدەلىپ وتىر. قىتاي جاستاردى جۇمىسپەن قامتۋ ىسىندە ءبىرقاتار مەملەكەتتىك جوبانى جۇزەگە اسىرىپ كەلەدى. قازىر كاسىبي دايارلاۋ جوبالارىن سۋبسيديالاپ، جاستاردى قولداۋعا كۇش سالىپ جاتىرمىز.

مەملەكەت قىتاي حالىق رەسپۋبليكاسى بولىپ قۇرىلعالى بەرى جۇمىسسىزدىق دەڭگەيى 3 رەت شارىقتاۋ شىڭىنا جەتكەن. ءبىرىنشىسى 1973 پەن 1979 -جىلدارى بولدى. ول كەزدە ءبىر مەزەتتە 15 ميلليون حالىق اۋىلدان قالاعا جاپپاي كوشكەن. وعان دەموبيليزاتسيالانعان 20 ميلليونعا جۋىق اسكەري قوسىلىپ، ەلدە جۇمىسسىزدىق ورىن الدى. ەكىنشىسى 1998 بەن 2001 -جىلدارى تىركەلدى. مەملەكەتتىك كاسىپورىنداردى رەفورمالاۋ جاپپاي وسى كەزەڭدە بولدى. سول توقىراۋ كەزىندە 26 ميلليون ادام قىسقارىپ كەتتى. بۇل مەملەكەتتىك كاسىپورىنداردا ەڭبەك ەتەتىن جۇمىسشىلاردىڭ تورتتەن ءبىر بولىگى بولدى. ءۇشىنشىسى پاندەميا كەزىندە تىركەلدى.

جالپى قىتايدا ءاربىر 20 جىلدا جۇمىسسىزدىققا قاتىستى توقىراۋ بولىپ وتىرادى. ماماندار 2024 -جىلدىڭ اياعىنا قاراي جۇمىسسىزدىق بۇدان تومەندەيدى دەپ بولجاپ وتىر. ول قىتاي حالقىنىڭ قارتايىپ بارا جاتقانىمەن بايلانىستىرىلادى. جۇرگىزىلگەن الەۋمەتتىك تالداۋعا سايكەس بيىل قىتايدا جۇمىسسىز جۇرگەن حالىق سانىنا قاراعاندا زەينەتكە شىعاتىندار كوپ ەكەن. ياعني جۇمىس ورىندارى بوسايدى دەگەن بولجام بار.