قىتايدا ۇشاتىن كولىكتەر قولدانىسقا بەرىلەدى

 قىتايدا درون سالاسى قارقىندى دامىپ كەلەدى. اسىرەسە ەلدىڭ وڭتۇستىك-شىعىسىنداعى شەنچجەن قالاسى كوش باستاپ تۇر. مۇندا ۇشۋ اپپاراتتارى تاماق تاسۋدان باستاپ ادام تاسىمالداۋعا دەيىن قولدانىلادى.

مىناۋ ۇشاتىن ەلەكترلى تاكسي. 100 مەتر بيىكتىككە كوتەرىلىپ، ساعاتىنا 130 شاقىرىم جىلدامدىقپەن ۇشا الادى. تۇرعىندار ونىمەن شەنچجەننەن وڭتۇستىككە قاراي 150 شاقىرىمداي جەردە ورنالاسقان چجۋحاي قالاسىنا 17 مينۋتتا-اق جەتەدى. ادەتتە بۇل شاھارعا كولىكپەن بارساڭ، 3 ساعات ۋاقىت كەتەدى. ۇشاتىن تاكسي العاش رەت بىلتىر شەنچجەن قالاسىندا سىنالدى. ەندى قاجەتتى ينفراقۇرىلىم جۇيەلەرى قۇرىلىپ جاتىر. ال 2030 -جىلعا تامان كورشى ەلدە 100 مىڭعا دەيىن ۇشاتىن كولىك قولدانىسقا بەرىلمەك.

چجاو ۆەنتسزيۋان، ونەركاسىپتىك قاۋىمداستىق وكىلى: -

 ءبىز العاشىندا قالا ماڭىنداعى اۋدانداردان باستادىق. كەيىن قالانىڭ ىشىندە دە قىزمەت كورسەتۋگە كىرىستىك. ۇشۋ اپپاراتتارى اۋەلدە جۇكتى جەتكىزۋگە عانا قولدانىلىپ كەلگەن ەدى. ەندى ادامداردى تاسىمالداۋعا دايىندالىپ جاتىرمىز.

 شەنچجەندە ۇشۋ اپپاراتتارى اۋىل شارۋاشىلىعى سالاسىندا كەڭىنەن پايدالانىلادى. مۇندا درونداردىڭ كومەگىمەن ەگىس القاپتارىنا ءدارى سەبىلەدى. بۇل تىڭايتقىشتاردى ۇنەمدەۋگە كومەكتەسەدى. ولاردى قولدانعاننان بەرى ەگىس القاپتارىنان جينالاتىن ءونىم دە ارتقان. سونىمەن قاتار درون ادامداردى الماستىرىپ، جۇمىس كۇشىنىڭ تاپشىلىعىن شەشۋگە سەپتىگىن تيگىزگەن. ال قالادا دروندار تاماق تاسۋ ءۇشىن ءجيى قولدانىلادى. وتكەن جىلدىڭ سوڭىندا جەرگىلىكتى بىرلەستىك ۇشۋ اپپاراتتارىنىڭ كومەگىمەن ازىق-تۇلىك تاسىمالىنىڭ 50 دەن اسا باعىتىن ىسكە قوستى. قىزمەتكە سۇرانىس ارتىپ، 200 مىڭ تاپسىرىس ورىندالعان.

 لي شيپەن، تسيفرلىق ەكونوميكا عىلىمي- زەرتتەۋ ينستيتۋتىنىڭ ءبولىم باسشىسى:

 - ستاتيستيكاعا سۇيەنسەك، بىلتىر قازان ايىندا شەنچجەندە دروندار ورتا ەسەپپەن كۇنىنە 8 مىڭ رەت ۇشىرىلاتىن. الەم ەلدەرىنىڭ بىردە- ءبىر قالاسى ءالى مۇنداي كورسەتكىشكە جەتكەن جوق. جالپى كەيىنگى جىلدارى قىتاي بيلىگى تومەن بيىكتىكتە ۇشاتىن اپپاراتتاردى دامىتۋعا دەن قويىپ جاتىر. ول بيوتەحنولوگيا، جاساندى ينتەللەكت جانە 6G بايلانىسىمەن قاتار ەكونوميكانىڭ ماڭىزدى باعىتىنىڭ ءبىرى دەپ تانىلعان. 

 https://24.kz