قىتايدا ەڭ ءىرى اينالمالى ەلەكتر جەتكىزۋ جەلىسى سالىندى

استانا. KAZINFORM - جەكسەنبى كۇنى قىتايدا ەلدەگى ەڭ ءىرى ءشول - تارىم ويپاتىنىڭ اينالاسىندا ۇزىندىعى 4197 شاقىرىم بولاتىن اسا جوعارى كەرنەۋلى اينالمالى ەلەكتر جەتكىزۋ جەلىسىنىڭ قۇرىلىسى اياقتالدى، دەپ حابارلايدى شينحۋا.

بۇل جوبا شىڭجاڭ- ۇيعىر اۆتونوميالىق اۋدانىنىڭ وڭتۇستىگىندەگى ينفراقۇرىلىمدى دامىتۋداعى ماڭىزدى كەزەڭ بولىپ سانالادى.

750 ك ۆ كەرنەۋدە جۇمىس ىستەيتىن بۇل جەلى ەلدەگى وسى سيپاتتاعى ەڭ اۋقىمدى جوبالاردىڭ ءبىرى بولىپ وتىر. ول توعىز قوسالقى ستانتسيا مەن 10 مىڭعا جۋىق بولات تىرەكتەن تۇرادى. جوبانى جۇزەگە اسىرعان - قىتايدىڭ ۇلتتىق State Grid ەلەكتر جەلىلەرى كورپوراتسياسىنىڭ قۇرامىنا كىرەتىن سينتسزيان بولىمشەسى.

اتالعان جەلىنىڭ قۇرىلىسى 15 جىلعا سوزىلعان. كومپانيانىڭ مالىمەتىنشە، ونى 2025 -جىلدىڭ قاراشا ايىندا تولىقتاي ىسكە قوسۋ جوسپارلانىپ وتىر.

تارىم ويپاتىندا الەمدەگى ەكىنشى ءىرى جىلجىمالى قۇمدى ءشول - تاكلا- ماكان ءشولى ورنالاسقان. عاسىرلار بويى بۇل وڭىردە قۇمدى داۋىلدار وازيستەرگە قاۋىپ ءتوندىرىپ، ايماقتىڭ دامۋىنا كەدەرگى كەلتىرىپ كەلگەن.

رەسمي تۇلعالار مەن ساراپشىلاردىڭ پىكىرىنشە، بۇل جوبا شىڭجاڭنىڭ وڭتۇستىك بولىگىن دامىتۋعا سەرپىن بەرىپ، بۇكىل ەل بويىنشا جاڭا ەنەرگيا كوزدەرىن قامتاماسىز ەتە الادى.

ەلەكتر جەلىسى قۇمدى شولدەن باستاپ كۋنلۋن تاۋلارىنا دەيىنگى الۋان ءتۇرلى لاندشافتى بويلاي وتەدى.

جوبانىڭ جەتەكشىسى لي جيۋننىڭ ايتۋىنشا، قۇرىلىس ماتەريالدارىن تاسىمالداۋ ءۇشىن 50 مەترلىك قۇم توبەلەرىن كەسىپ وتەتىن جولدار سالىنعان. ال تاۋلى ايماقتاردا بولات تىرەكتەردىڭ شامامەن 3000 توننا كومپونەنتىن جەتكىزۋ ءۇشىن ارقان جولدارى پايدالانىلعان.

قورشاعان ورتاعا، اسىرەسە جەرگىلىكتى ءشول وسىمدىكتەرىنە اسەرىن ازايتۋ ماقساتىندا ينجەنەرلەر تىرەكتەردىڭ بيىكتىگىن وزگەرتىپ، مارشرۋتقا تۇزەتۋلەر ەنگىزگەن. سونىمەن قاتار، 480 مىڭ شارشى مەتردەن استام اۋماققا شوپپەن توقىلعان ارقان تورلار ارقىلى قۇم بوگەتتەرىن توسەۋ جوسپارلانىپ وتىر. بۇل - قىتايدا قۇم كوشكىنىن توقتاتۋ ءۇشىن كەڭىنەن قولدانىلاتىن ءادىس، دەپ ءتۇسىندىردى لي جيۋن.

بۇدان بۇرىن قىتايداعى ەڭ ءىرى تەڭىز گاز كەن ورنىنىڭ ەكىنشى كەزەڭى پايدالانۋعا بەرىلگەنىن جازعان ەدىك.