قىتايدا ءۇي جانۋارلارىن كلوندايتىندار كوبەيدى

استانا. KAZINFORM - ادامدار ءۇي جانۋارلارىن كلونداۋعا 52000 دوللارعا دەيىن جۇمسايدى، دەپ حابارلايدى South China Morning Post.

قىتايدا جانۋارلاردى كلونداۋ قىزمەتتەرىن قولدانۋدىڭ ارقاسىندا سۇيىكتى ءۇي جانۋارلارىنان ايىرىلىپ قالعاندارعا بىرەگەي مۇمكىندىك ۇسىنىلدى.

وسىنداي ءۇي جانۋارلارىن ۇناتاتىنداردىڭ ءبىرى، بەيجىڭدە تۇراتىن ديزاينەر - ليۋ سين بولدى. ول ون جىلدان استام ۋاقىت بۇرىن كوشەدەن تاۋىپ العان مىسىقتى اسىراپ، ونى تومكەت دەپ اتاعان، دەپ حابارلايدى Science and Technology Daily. 15 -جىل بويى تومكەت ونىمەن بىرگە شىنجننەن بەيجىڭگە كوشىپ كەلىپ، ونىڭ ادال سەرىگى بولدى.

مىسىق قارتايىپ، دەنساۋلىعى سىر بەرە باستاعاندىقتان، ليۋ ونىڭ مەديتسينالىق پروتسەدۋرالارىنا شامامەن 100000 يۋان ($14000) جۇمسادى. تومكەتتىڭ جاعدايى ناشارلاعان كەزدە، ليۋ ينتەرنەت ارقىلى ءۇي جانۋارلارىن كلونداۋ قىزمەتىنە جۇگىندى.

ءۇي جانۋارى ءولىپ قالعاننان كەيىن، كلونداۋ كومپانياسى تەز ارادا تەرى ۇلگىلەرىن جيناپ، ەمبريوندى سۋرروگات مىسىققا سالماق بولعان، دەگەنمەن بۇل پروتسەسس ەكى رەت ساتسىزدىككە ۇشىرادى. الايدا، ليۋ اقىرى ءوز مىسىعىنان اۋمايتىن كلوندالعان مارعاۋعا قول جەتكىزەدى.

ليۋ كلونداۋ قىزمەتى ءۇشىن شامامەن 140000 يۋان ($19000) جۇمساعان كورىنەدى. ءبىراق ونىڭ سوزىنشە، «بۇل سول اقشاعا تۇرارلىق شەشىم بولدى».

ليۋ - قىتايداعى ءۇي جانۋارلارىنا قامقورلىق كورسەتەتىندەردىڭ ءوسىپ كەلە جاتقان قاۋىمداستىعىنىڭ مۇشەسى اتاندى.

وتكەن جىلى قىتايداعى ءۇي جانۋارلارىنىڭ سانى 124 ميلليونعا جەتتى.

قىتايدا جانۋارلاردى كوممەرتسيالىق كلونداۋعا رۇقسات ەتىلگەن، ءبىراق قىزمەتتىڭ تانىمالدىعى ارتقان سايىن قوعامدا ەتيكا ماسەلەلەرى كوتەرىلە باستادى. سونىمەن قاتار، پروتسەدۋرانىڭ باعاسى ءدا وسىپ كەلەدى - قازىر كلونداۋ قۇنى $21- 52000 ارالىعىندا.

بۇعان دەيىن حابارلانعانداي، قىتايدا تاعى دا جۇمىسسىزدىق دەڭگەيى ءوستى.