قىتايدا ءبىلىم العىسى كەلەتىن قازاق جاستارى ءۇشىن ۇكىمەتتىك گرانت سانى ارتۋى مۇمكىن
استانا. KAZINFORM - قازاقستاندا ەكىنشى لۋ بان شەبەرحاناسى اشىلادى. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
«ءبىز عىلىم جانە ءبىلىم سالاسىنداعى ىنتىماقتاستىقتى نىعايتىپ كەلەمىز. قازىرگى تاڭدا قىتايدىڭ جوعارى وقۋ ورىندارىندا 4 مىڭنان استام قازاق جاستارى ءبىلىم الىپ جاتىر. قازاقستان تەحنيكالىق ماماندار دايارلاۋ ماسەلەسىنە باسا ءمان بەرەدى. وعان قىتايداعى ارىپتەستەرىمىز قولداۋ كورسەتىپ وتىر. اتالعان سالاداعى ىنتىماقتاستىقتى ودان ارى دامىتۋعا كەلىستىك. قىتاي ءتوراعاسىنىڭ ساپارى اياسىندا ەكى تاريحي وقيعانىڭ كۋاسى بولدىڭىزدار. ءبىرىنشىسى - استانا حالىقارالىق ۋنيۆەرسيتەتىنىڭ جانىنان بەيجىڭ ءتىل جانە مادەنيەت ۋنيۆەرسيتەتىنىڭ فيليالى اشىلدى. سونداي-اق قۇرمەتتى شي جينپيڭ مىرزامەن قازاقستاندا ەكىنشى لۋ بان شەبەرحاناسىن اشۋعا كەلىستىك. بۇل ءتيىمدى ءارى ماڭىزدى جوبا ەلىمىزدە جوعارى كاسىبي ماماندار دايارلاۋعا مۇمكىندىك بەرەدى»، - دەدى قاسىم-جومارت توقايەۆ.
مەملەكەت باسشىسىنىڭ اتاپ وتۋىنشە، قىتايدىڭ جوعارى وقۋ ورىندارىندا ءبىلىم العىسى كەلەتىن قازاق جاستارىنىڭ سانى ارتتى.
«بۇل تۇرعىدا ۇكىمەتتىك گرانت سانىن كوبەيتۋ، قازاقستان اۋماعىندا قىتايدىڭ وزىق تەحنيكالىق ۋنيۆەرسيتەتتەرىنىڭ فيليالدارىن اشۋ ماسەلەسىنە ارنايى توقتالدىق»، - دەدى پرەزيدەنت.