قىتايعا گرانت ارقىلى وقۋعا تۇسكەن قازاقستاندىقتاردىڭ ءتىزىمى جاريالاندى

استانا. قازاقپارات - قىتايدىڭ جوعارى وقۋ ورىندارىندا وقۋعا گرانت يەگەرلەرىنىڭ ءتىزىمى جاريالاندى، دەپ حابارلايدى Baq. kz.

عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى تاراتقان اقپاراتقا سايكەس 2024-2025 اكادەميالىق وقۋ جىلىنا ارنالعان ۇكىمەتارالىق گرانتتار شەڭبەرىندە قىتايدىڭ جەتەكشى جوعارى وقۋ ورىندارىندا وقۋعا ارنالعان قازاقستاندىقتاردىڭ سوڭعى ءتىزىمى جاريالاندى. 151 ۇمىتكەرگە ستيپەنديا تاعايىنداۋ تۋرالى سوڭعى شەشىمدى قابىلداۋشى تاراپ - قىتاي حالىق رەسپۋبليكاسى قابىلدادى.

ەستەرىڭىزگە سالا كەتەيىك، قازاقستاندىق تاراپ بۇعان دەيىن ق ح ر جەتەكشى جوعارى وقۋ ورىندارىندا باكالاۆريات، ماگيستراتۋرا جانە دوكتورانتۋرا باعدارلامالارى بويىنشا وقۋعا 326 ۇمىتكەردى ۇسىنعان بولاتىن. گرانت اكادەميالىق وقۋ، جاتاقحانادا تۇرۋ، مەديتسينالىق ساقتاندىرۋ شىعىندارىن وتەيدى، سونىمەن قاتار ستۋدەنتتەرگە اي سايىن ستيپەنديا تولەنەدى. وقۋ اعىلشىن نەمەسە قىتاي تىلىندە وتەدى. ۇسىنىلعان ۇمىتكەرلەر تىزىمىمەن «حالىقارالىق باعدارلامالار ورتالىعى» ا ق bolashak.gov.kz سايتىندا تانىسۋعا بولادى.

ەگەر ءسىز وقۋعا ارنالعان ستيپەندياتتار تىزىمىندە بولساڭىز، وندا 60 كۇنتىزبەلىك كۇن ىشىندە وقۋعا شارت جاساسۋ ءۇشىن «حالىقارالىق باعدارلامالار ورتالىعى» ا ق-عا جۇگىنۋىڭىز قاجەت. شارت جاساسۋ ءۇشىن سايتتىڭ (bolashak.gov.kz) باستى بەتىندە كەزەكتى برونداۋ قاجەت جانە وزىڭىزبەن بىرگە جەكە كۋالىكتىڭ ءتۇپنۇسقاسىن الىپ كەلىڭىز. ەگەر شارت جاساسۋ كەزىندە جەكە قاتىسا الماساڭىز، وندا نوتاريالدى كۋالاندىرىلعان سەنىمحات بويىنشا ءۇشىنشى تۇلعا ءسىز ءۇشىن شارت جاساسا الادى. بۇل جاعدايدا ءۇشىنشى تۇلعادا ءسىزدىڭ جەكە كۋالىگىڭىزدىڭ كوشىرمەسى، سەنىمحاتتىڭ ءتۇپنۇسقاسى جانە جەكە كۋالىكتىڭ ءتۇپنۇسقاسى بولۋى قاجەت. شارت جاساسۋ بويىنشا ەگجەي- تەگجەيلى كەڭەس الۋ ءۇشىن نورماتيۆتىك قۇقىقتىق جانە شارتتىق قامتاماسىز ەتۋ باسقارماسىنا 87172769079 (ىشكى.170، 181) حابارلاسا الاسىز، - دەلىنگەن مينيسترلىك حابارلاماسىندا.

بۇعان دەيىن عىلىم جانە جوعارى ءبىلىم مينيسترلىگى قوسىمشا ءبىلىم بەرۋ گرانتتارىن تاعايىنداعانى حابارلاندى.