قىتايعا ەكسپورتتاۋعا ونىمدەر تىزبەسىنە وسىمدىك جانە مال شارۋاشىلىعىنىڭ 29 ءتۇرى ەنگىزىلدى
استانا. KAZINFORM - جۇمىس ساپارى اياسىندا اۋىل شارۋاشىلىعى ءمينيسترى ايداربەك ساپاروۆ پەن قىتاي حالىق رەسپۋبليكاسىنىڭ باس كەدەن باسقارماسىنىڭ باسشىسى سۋن مەيتسزيۋن قازاقستان مەن قىتاي اراسىنداعى قۇس ەتىن يمپورتتاۋ جانە ەكسپورتتاۋ كەزىندە ۆەتەريناريالىق-سانيتاريالىق تەكسەرۋ، كارانتين جانە ازىق-تۇلىك قاۋىپسىزدىگى تالاپتارى جونىندەگى حاتتاماعا قول قويدى.
بۇل تۋرالى ا ش م باسپا ءسوز قىزمەتى حابارلادى.
اتالعان قۇجات ۆەدومستۆو تاراپىنان ەلىمىزدىڭ اگروونەركاسىپتىك كەشەنىنىڭ ەكسپورتتىق الەۋەتىن، اسىرەسە قىتاي باعىتى بويىنشا، جۇيەلى تۇردە ارتتىرۋ جۇمىستارىنىڭ ناتيجەسى. ق ح ر- دا قازاقستاندىق مال شارۋاشىلىعى ونىمدەرىنە دەگەن سۇرانىس جوعارى.
جالپى، ەت ونىمدەرى بويىنشا ەكىجاقتى ساۋدانى رەتتەيتىن ۆەتەريناريالىق تالاپتاردى كەلىسۋ جانە ءتيىستى حاتتامالارعا قول قويۋ جۇمىستارى 2019-جىلدان بەرى جۇرگىزىلىپ كەلەدى. بۇگىنگى كۇنگە دەيىن مال شارۋاشىلىعى ونىمدەرىنىڭ ءتۇرلى تۇرلەرىن قامتيتىن 11 حاتتاماعا قول قويىلدى. قىتايعا ەكسپورتتاۋعا رۇقسات ەتىلگەن ونىمدەر تىزبەسىنە وسىمدىك جانە مال شارۋاشىلىعىنىڭ 29 ءتۇرى ەنگىزىلدى. ەكسپورتتاۋشىلار تىزىلىمىنە 2483 قازاقستاندىق كاسىپورىن ەنگىزىلگەن. قۇجاتقا قول قويىلعاننان كەيىن تىزىلىمگە تاعى 88 ءوندىرۋشى ەنگىزىلەدى.
تاراپتار سونداي-اق اگرارلىق سالاداعى ەكىجاقتى ىنتىماقتاستىقتى كەڭەيتۋ جانە ساۋدا-ەكونوميكالىق بايلانىستاردى نىعايتۋ پەرسپەكتيۆالارىن تالقىلادى.
- مەملەكەت باسشىلارى اگروونەركاسىپتىك كەشەن سالاسىنداعى ىنتىماقتاستىقتى تەرەڭدەتۋدىڭ ستراتەگيالىق ماڭىزىن بىرنەشە مارتە اتاپ ءوتتى. ءبىزدىڭ باستى مىندەتىمىز - قىتاي نارىعىنا جەتكىزىلەتىن ءونىمنىڭ ساپاسى مەن قاۋىپسىزدىگىنە جوعارى تالاپتاردى قامتاماسىز ەتۋ ءۇشىن بارلىق جاعدايدى جاساۋ، - دەدى ايداربەك ساپاروۆ.
2024-جىلدىڭ قورىتىندىسى بويىنشا قازاقستان مەن قىتاي اراسىنداعى اوك ونىمدەرىنىڭ تاۋار اينالىمى 1,4 ميلليارد ا ق ش دوللار بولىپ، 10,5 پايىزعا ءوستى. سونىڭ ىشىندە ەكسپورت كولەمى 1,05 ميلليارد دوللار.
ەكسپورت قۇرىلىمىنىڭ نەگىزى جەم-ءشوپ، ءداندى جانە مايلى داقىلدار، وسىمدىك مايلارى بولدى: 2024-جىلى ق ح ر- عا جەم ەكسپورتى 485 پايىزعا، وسىمدىك مايلارى - 26 پايىزعا، راپس مايى - 57 پايىزعا ارتتى.
2025-جىلعى قاڭتار- ناۋرىز ارالىعىندا ا و ك ونىمدەرىنىڭ ءوزارا ساۋدا كولەمى 430,5 ميلليون دوللار بولىپ، 45 پايىزعا ءوستى. ونىڭ ىشىندە ەكسپورت كولەمى 301,9 ميلليون دوللار بولدى (ءوسىم - 42 پايىز).
اۋىل شارۋاشىلىعى ساۋداسى سالاسىنداعى وزەكتى ماسەلەلەردى شەشۋ ماقساتىندا 2024-جىلعى قاراشادا ۋاقىتشا جۇمىس توبى قۇرىلدى.
قازاقستان تاراپى قولدانىستاعى ۆەتەريناريالىق جانە فيتوسانيتاريالىق حاتتامالاردى وزەكتەندىرۋدى، قازاقستاندىق مال شارۋاشىلىعى كاسىپورىندارىنا ينسپەكتسيا جۇرگىزۋدى، سونداي-اق كۇرىش، ماقتا تۇقىمى، باقشا داقىلدارى مەن ماش ونىمدەرىن قىتاي نارىعىنا ەكسپورتتاۋ مۇمكىندىكتەرىن كەڭەيتۋدى ۇسىندى.
باستى باسىمدىقتاردىڭ ءبىرى - ءداندى داقىلدار ەكسپورتىنىڭ كولەمىن ۇلعايتۋ. سوڭعى ەكى جىلدا (2023/2024) ق ح ر- عا جىل سايىن 1,4 ميلليون توننا استىق جونەلتىلدى. ال 2024-جىلعى قىركۇيەكتەن 2025-جىلعى ساۋىرگە دەيىنگى ارالىقتا ەكسپورت كولەمى 27 پايىزعا ارتىپ، 1,859 ميلليون توننا بولدى.
- قىتاي مەن قازاقستان - تاتۋ كورشى، سەنىمدى ءارى ستراتەگيالىق ارىپتەستەر. مەملەكەتتەر باسشىلارى ءوزارا ساۋدا-ەكونوميكالىق ىنتىماقتاستىقتى جاڭا ساپالى دەڭگەيگە كوتەرۋ، ءوزارا ساۋدا كولەمىن ايتارلىقتاي ۇلعايتۋ جونىندە ناقتى باعىت بەردى. ءبىزدىڭ ۆەدومستۆولاردىڭ ۇيلەسىمدى جۇمىسىنىڭ ارقاسىندا اۋىل شارۋاشىلىعى ونىمدەرىمەن ساۋدا وڭ سەرپىن كورسەتىپ وتىر. بۇگىنگى كەزدەسۋ - فيتوسانيتاريالىق جانە ۆەتەريناريالىق باقىلاۋ، ازىق-تۇلىك قاۋىپسىزدىگىن قامتاماسىز ەتۋ سىندى نەگىزگى باعىتتار بويىنشا ءوزارا ىقپالداستىقتى تەرەڭدەتۋگە دەگەن ورتاق مۇددەنىڭ جارقىن كورىنىسى، - دەپ اتاپ ءوتتى ق ح ر باس كەدەن باسقارماسىنىڭ باسشىسى سۋن مەيتسزيۋن.
- ءبىز بىرلەسكەن كۇش-جىگەرىمىز مەملەكەت باسشىلارى جۇكتەگەن مىندەتتەردى ورىنداۋعا جانە ءوزارا ساۋدانى دامىتۋدا جاڭا ناتيجەلەرگە قول جەتكىزۋگە سەپتىگىن تيگىزەتىنىنە سەنىمدىمىز، - دەپ تۇيىندەدى مينيستر.
ايتا كەتەلىك وتاندىق عالىمدار قىزىلورداعا ءتوزىمدى كۇرىشتىڭ 2 ءتۇرىن ازىرلەپ جاتقانى تۋرالى جازعان ەدىك.