قىتايعا جالپى استىق ەكسپورتى 5,5 ەسە ءوستى - قايرات تورەبايەۆ

استانا. KAZINFORM - قازاقستان يتالياعا 1 ميلليون توننا بيداي جەتكىزۋ ءۇشىن كەلىسسوز جۇرگىزىپ جاتىر. بۇل تۋرالى ۇكىمەت وتىرىسىندا ساۋدا جانە ينتەگراتسيا ۆيتسە-ءمينيسترى قايرات تورەبايەۆ ايتتى.

«قازاقستاننىڭ 2024 -جىلعا ارنالعان استىق داقىلدارى بويىنشا ەكسپورتتىق الەۋەتى 12 ميلليون توننا، ونىڭ ىشىندە 7-7,5 ميلليون توننا - بيداي، 1,3-1,4 ميلليون توننا - ارپا، 300 مىڭ توننا - جۇگەرى. سونىمەن قاتار، مايلى داقىلدار بويىنشا الەۋەت 1 ميلليون توننادان اسادى. ورتالىق ازيا مەن اۋعانستانعا 4,2 ميلليون توننا بيداي جەتكىزىلەدى دەپ كۇتىلۋدە. وتكەن جىلى قىتايعا جالپى استىق ەكسپورتى 1,43 ميلليون توننانى قۇراپ، 2022 -جىلمەن سالىستىرعاندا 5,5 ەسە ءوستى. ونىڭ ىشىندە بيدايدىڭ ۇلەسى - 538,8 مىڭ توننا، وتكەن جىلعى كورسەتكىشتەن 15 ەسە ارتىق. بۇل قىتايعا ەكسپورت كولەمىن 1,6 ميلليون تونناعا دەيىن ارتتىرۋعا مۇمكىندىك بەرەدى. دەگەنمەن، قىتاي شەكاراسىنداعى كىدىرىستەر مەن ليتسەنزيالاۋ شارتتارى ءالى دە شەشۋدى تالاپ ەتەدى»، - دەدى ۆيتسە-ميينستر.

ونىڭ اتاپ وتۋىنشە، جاھاندىق سۇرانىستىڭ ارتۋى جانە ونىمدىلىكتىڭ تومەندەۋىنە بايلانىستى يتاليا، لاتۆيا، يسپانيا سياقتى ە و ەلدەرى ماڭىزدى نارىقتار بولىپ وتىر. قازاقستان ءۇشىن بيدايدى رەسەي ارقىلى ترانزيتتەۋ جانە ترانسكاسپي حالىقارالىق كولىك باعىتى بويىنشا شىعىنداردى ازايتۋ وزەكتى. وسى باعىت ارقىلى تۇركيا مەن تاياۋ شىعىسقا شامامەن 1 ميلليون توننا بيداي ەكسپورتتاۋعا مۇمكىندىك بار.

«يرانعا ارپا جەتكىزۋدى قالپىنا كەلتىرۋ ماڭىزدى، ساۋدا جانە لوگيستيكا ماسەلەلەرى شەشىلۋدە. پاكىستان، يندونەزيا، برازيليا جانە مالايزيا نارىقتارىندا قازاقستاندىق بيداي برەندىن ىلگەرىلەتۋ جۇمىستارى جانداندىرىلادى. ازىق-تۇلىك كورپوراتسياسىمەن بىرلەسە وتىرىپ، ەكسپورتتىق لوگيستيكا مەن باعالار كورسەتىلگەن ەلدىك ۇسىنىستار ازىرلەندى. بۇل ۇسىنىستار قازاقستاننىڭ 14 تۇراقتى وكىلدىگىنە جىبەرىلىپ، بەلسەندى تۇردە جۇمىس جۇرگىزىلۋدە. ارمەنياعا 600 مىڭ توننا، يتالياعا 1 ميلليون توننا بيداي جونەلتۋ تۋرالى كەلىسسوزدەر جاسالىپ جاتىر. سونىمەن قاتار، سولتۇستىك افريكا ەلدەرىنە 200 مىڭ توننا ەكسپورت بويىنشا كەلىسىمدەر جۇرگىزىلۋدە»، - دەدى قايرات تورەبايەۆ.

اۆتور
مارلان جيەمباي