قىتاي تەمىرجول قۇرىلىسى كورپوراتسياسىنىڭ مالىمەتىنشە، قالقاندى ماشينا شاندۇڭ پروۆينتسياسىنداعى جياۋجوۋ شىعاناعىنىڭ تەڭىز تۇبىنەن 105 مەتر تەرەڭدىكتە جوبالىق مەجەگە جەتكەن.
جياۋجوۋ شىعاناعى ارقىلى وتەتىن ەكىنشى تۋننەل چيڭداۋ قالاسىنىڭ ورتالىق بولىگىن قالانىڭ باتىس جاعالاۋى جاڭا اۋدانىمەن بايلانىستىرادى.
جوبانىڭ جالپى ۇزىندىعى 17,48 شاقىرىمدى قۇرايدى. ونىڭ 14,37 شاقىرىمى نەگىزگى تۋننەل ۋچاسكەسىنە تيەسىلى. جوبا ەكى اۆتوجول تۋننەلى مەن ولاردىڭ اراسىنداعى قىزمەتتىك تۋننەلدەن تۇرادى. ءار باعىتتا ءۇش جولاق بولادى. كولىك قوزعالىسىنىڭ ەسەپتىك جىلدامدىعى ساعاتىنا 80 شاقىرىمعا دەيىن جەتەدى.
قىتاي تەمىرجول قۇرىلىسى كورپوراتسياسىنىڭ 14-بيۋروسىنىڭ وكىلى ۋاڭ جيۋنپيننىڭ ايتۋىنشا، قۇرىلىس كەزىندە بۇرعىلاپ-جارۋ جانە قالقاندى ادىستەرى قولدانىلعان. جۇمىس شىعاناقتىڭ شىعىس جانە باتىس جاعالاۋلارىنان قاتار جۇرگىزىلىپ، كەيىن تۋننەل ۋچاسكەلەرى سۋ استىندا تۇيىستىرىلگەن.
نەگىزگى تۋننەلدىڭ تەڭىز بەتىنەن ەڭ تومەنگى تەرەڭدىگى 95 مەتر بولسا، قىزمەتتىك تۋننەل 105 مەتر تەرەڭدىكتە ورنالاسادى. مۇنداي تەرەڭدىكتە قۇرىلىمعا سۋ قىسىمى قاتتى اسەر ەتەتىندىكتەن، تۋننەلدىڭ گەرمەتيكالىعى مەن گيدرووقشاۋلاۋىنا جوعارى تالاپ قويىلادى.
نىساندا توپىراقتى سىرتقا شىعارۋدىڭ جاڭا جۇيەسى العاش رەت قولدانىلدى. ونىڭ قۇرامىنا بۇراندالى كونۆەيەر، بۋنكەر جانە تاۋ جىنىستارىن ۇساتقىش كىرەدى. ۋاڭ جيۋنپيڭنىڭ ايتۋىنشا، بۇل جۇيە جۇمىس تيىمدىلىگىن ارتتىرىپ، جابدىقتىڭ بىتەلىپ قالۋ قاۋپىن ازايتقان. سونىمەن قاتار ماماندار تۋننەل قازۋ كەزىندە قالقاندى ماشينانى دىرىلدەن قورعايتىن تەحنولوگيا ازىرلەگەن. بۇل جابدىقتىڭ تۇراقتى جۇمىس ىستەۋىنە مۇمكىندىك بەرەدى.
قۇرىلىس اياقتالعاننان كەيىن جاڭا تۋننەل جياۋجوۋ شىعاناعى ارقىلى وتەتىن قولدانىستاعى تۋننەل جانە كوپىرمەن، سونداي-اق شىعاناق ماڭىنداعى اۆتوجول ينفراقۇرىلىمىمەن بىرىگىپ، چيڭداۋدىڭ ءار اۋدانىن بايلانىستىراتىن كوپدەڭگەيلى كولىك جۇيەسىن قالىپتاستىرادى.
بۇعان دەيىن شىلدە ايىندا قىتايدىڭ كولىك مينيسترلىگى 2026- 2030 -جىلدارعا ارنالعان 15-بەسجىلدىق كەزەڭىندە كولىك جۇيەسىن دامىتۋ جوسپارلارىن جاريالاعان ەدى. 2030 -جىلعا قاراي بيلىك زاماناۋي كولىك قىزمەتتەرىنىڭ جۇيەسىن نەگىزىنەن قالىپتاستىرۋدى كوزدەپ وتىر.
جوسپار اياسىندا كولىكتىڭ ءارتۇرلى تۇرلەرىنىڭ ءوزارا بايلانىسىن جاقسارتۋ، ءبىر كولىك تۇرىنەن ەكىنشىسىنە اۋىسۋدى جەڭىلدەتۋ جانە جۇك تاسىمالىنىڭ تيىمدىلىگىن ارتتىرۋ كوزدەلگەن. سونداي-اق قىتاي تۋريستىك باعىتتارداعى كولىك ينفراقۇرىلىمىن دامىتۋعا، كولىك توراپتارىنىڭ جۇمىسىن جەتىلدىرۋگە جانە اۋىلدىق جەرلەردەگى جولاۋشى، جۇك جانە كۋرەرلىك قىزمەتتەردى جاقسارتۋعا نيەتتى.
بۇعان دەيىن دۋبايدا يلون ماسكتىڭ كومپانياسى جوبالاعان جەراستى تۋننەلدەرى سالىناتىنى تۋرالى حابارلاعان بولاتىنبىز.