بۇدان بولەك روبوتتاردى 6G تەحنولوگياسىنا نەگىزدەيدى. قىتايدا روبوت ءوندىرىسى جاڭا دەڭگەيگە شىقتى. نارىقتا اقىلدى، جىلدام شەشىم قابىلداپ، تاپسىرمانى ءدال ورىندايتىن قۇلتەمىرلەرگە سۇرانىس ارتقان. قازىر ولاردى وقىتاتىن ارنايى وقۋ ورىندارى كوبەيدى.
جاڭ تياڭي، روبوتتاردى سىناقتان وتكىزەتىن الاڭنىڭ عىلىمي قىزمەتكەرى:
- روبوتتار قورشاعان ورتاعا فيزيكالىق تۇرعىدا بەيىمدەلۋى ءتيىس. مودەلىنە قاراي ءارتۇرلى تاپسىرما بەرىلەدى. ءبىز ولاردى شىنايى كەدەرگىلەرمەن جۇرگىزۋ ارقىلى سىناقتان وتكىزەمىز. ءالسىز تۇستارىن انىقتاپ جەتىلدىرەمىز. جاساندى ينتەللەكتىمەن باسقارۋ كەزىندەگى يكەمدەلىگى ماڭىزدى. الايدا قاتەسىز ءارى تۇراقتى جۇمىس ىستەۋ ءۇشىن قازىرگى قولدانىستاعى ينتەرنەتتىڭ جىلدامدىعى جەتكىلىكسىز.
قىتايلار روبوتتاردى وقىتۋعا العاش رەت 6G ينتەرنەتتى قولداندى. جاڭا تەحنولوگيا قۇلتەمىرلەردىڭ شاپشاڭدىعى مەن يكەمدىلىگىن ارتتىرۋعا جول اشتى.
ليۋ گۋاڭي، روبوتتاردى سىناقتان وتكىزەتىن الاڭنىڭ جەتەكشىسى:
- سيگنال سەكۋندتان از ۋاقىتقا كەشىكسە روبوتتىڭ قابىلەتى تومەندەيدى. اقپارات جيناقتاۋدان بولەك جىلدام شەشىم قابىلداپ ونى ءدال ورىنداۋ ءۇشىن قازىرگى 5G جانە 5G- A تەحنولوگياسى باياۋ بوپ تۇر. اسىرەسە جاساندى ينتەللەكتىمەن باسقارۋ كەزىندە جۇيەنىڭ تەجەلۋى جيىلەدى. ءبىز العاش رەت 6g ينتەرنەتكە نەگىزدەلگەن ارنايى زەرتحانا جاساپ شىعاردىق. بۇل جەلىگە بىردەن بىرنەشە قۇرىلعىنى قوسىپ جۇمىس ىستەۋگە مۇمكىندىك بەردى.
تىڭ تەحنولوگيا ارقىلى ۇيرەتىلگەن روبوتتارعا سۇرانىس بىردەن ارتتى. العاشقى اپتانىڭ وزىندە 100 داناسىنا تاپسىرىس تۇسكەن. ەندى جوبا اۆتورلارى ءوندىرۋشى كومپانيالارعا روبوتتاردى وقىتىپ، ۇيرەتۋ قىزمەتىن ۇسىنا باستادى. ايتا كەتۋ كەرەك، كەدەن باسقارماسىنىڭ مالىمەتىنە سايكەس قىتاي بيىل العاشقى جارتى جىلدىقتىڭ وزىندە ءتۇرلى ماقساتتاعى 10 ميلليوننان استام روبوت ەكسپورتتاعان. جالپى قۇنى 3 ميلليارد ا ق ش دوللارىنا جۋىق زاماناۋي قۇلتەمىرلەر 150-دەن استام ەل مەن ايماققا ساتىلدى.
24.kz