قىتاي حالىق رەسپۋبليكاسىنىڭ مەملەكەتتىك ستاتيستيكا بيۋروسىنىڭ مالىمەتىنشە، 2025 -جىلى ەلدەگى 65 جاستان اسقان تۇرعىنداردىڭ سانى 223,65 ميلليون ادامعا جەتكەن. ال 0 مەن 14 جاس ارالىعىنداعى بالالار سانى 212,76 ميلليون بولدى.
دەموگرافيالىق جۇكتەمەنىڭ جالپى كوەففيتسيەنتى 45,1 پايىز بولدى. بۇل رەتتە قارتتارعا تۇسەتىن جۇكتەمە كورسەتكىشى 23,1 پايىزعا دەيىن ءوسىپ، بالالارعا تۇسەتىن جۇكتەمەدەن (22 پايىز) اسىپ ءتۇستى.
ەلدىڭ ءبىرقاتار وڭىرىندە تۋۋ كورسەتكىشىنىڭ تومەندەۋى جانە بالاباقشالارعا باراتىن بالالار سانىنىڭ ازايۋى سالدارىنان بوس قالعان مەكتەپكە دەيىنگى مەكەمەلەر قارتتار ۇيلەرى مەن گەرونتولوگيالىق ورتالىقتارعا اينالدىرىلىپ جاتىر. بۇعان دەيىن تاربيەشىلەر دايارلاعان كوللەدجدەردە قازىر قارتتارعا كۇتىم جاساۋ قىزمەتتەرىن اقىلدى تەحنولوگيالار ارقىلى باسقارۋ جانە الەۋمەتتىك قىزمەت كورسەتۋ ماماندىقتارى اشىلۋدا.
ەگدە جاستاعى حالىق سانىنىڭ ارتۋى «كۇمىس ەكونوميكانىڭ» دامۋىنا ىقپال ەتتى. قىتايدا قارت ادامدار اراسىندا كالليگرافيا مەن ءان ايتۋدى، جاساندى ينتەللەكتىنى پايدالانۋدى، بەينەمونتاج جاساۋدى جانە ۇشقىشسىز ۇشۋ اپپاراتتارىن باسقارۋدى ۇيرەتەتىن ماماندارعا سۇرانىس ارتىپ كەلەدى.
بۇعان دەيىن قىتايدا حالىقتىڭ قارتايۋى جەدەلدەپ، وتباسىلىق كۇتىمنىڭ جەتىسپەۋشىلىگىن وتەۋگە باعىتتالعان «جالعا الىناتىن بالالار» قىزمەتىنىڭ تانىمال بولا باستاعانى حابارلانعان ەدى.