بۇل تۋرالى Kazinform اگەنتتىگىنىڭ بەيجىڭدەگى مەنشىكتى ءتىلشىسى جەرگىلىكتى ب ا ق-قا سىلتەمە جاساپ حابارلايدى.
ق ح ر ۇلتتىق ستاتيستيكا بيۋروسىنىڭ مالىمەتىنشە، 2025-جىلدىڭ سوڭىنا قاراي قىتايدا 60 جاستان اسقان تۇرعىندار سانى 323 ميلليونعا جەتكەن. ولاردىڭ 130 ميلليوننان استامى وتباسىنان بولەك تۇرادى. قىتايدىڭ گەرونتولوگيا عىلىمي-زەرتتەۋ ورتالىعىنىڭ زەرتتەۋىنە سايكەس، ەلدەگى قارتتاردىڭ شامامەن 25 پايىزى قوعامنان شەت قالىپ، جالعىزدىقتى ءجيى سەزىنەدى.
سۇرانىستىڭ ارتۋىنا بايلانىستى حاڭجوۋ، نينبو جانە ليشۋي قالالارىنىڭ بيلىگى قارتتارعا كومەك كورسەتۋدىڭ ءۇش ۇلگىسىن ەنگىزدى. ولار: اقىسىز ۆولونتەرلىك باعدارلامالار، شاعىن سىياقىعا نەگىزدەلگەن كورشىلەردىڭ ءوزارا كومەگى جانە كوممەرتسيالىق قىزمەتتەر.
ەرىكتىلەر قىزمەتى جەرگىلىكتى بيلىك پەن قوعامدىق ۇيىمداردىڭ قارجىلاي قولداۋىمەن جۇزەگە اسىرىلادى. الايدا سالا وكىلدەرىنىڭ پىكىرىنشە، ۇيىمداستىرۋشىلارعا تۇسەتىن سالماقتىڭ اۋىرلىعى بۇل باستامانى كەڭىنەن تاراتۋعا مۇمكىندىك بەرمەيدى.
كورشىلەردىڭ ءبىر- بىرىنە قولداۋ كورسەتۋىنە نەگىزدەلگەن بۇل ۇلگى بويىنشا شاعىن كولەمدە سۋبسيديا تولەنەدى. نينبو قالاسىنىڭ فەنحۋا اۋدانىندا قارتتارعا كۇندەلىكتى كومەك كورسەتكەن كورشىلەرگە كۇنىنە 80-100 يۋان (11-14 ا ق ش دوللارى) كولەمىندە اقى بەرىلەدى.
كوممەرتسيالىق قىزمەتتەر نەگىزىنەن ينتەرنەتتەگى جەكە حابارلاندىرۋلار ارقىلى ۇسىنىلادى. بۇل سالادا كوبىنە جاستار جۇمىس ىستەيدى. قارتتارعا سەرىك بولىپ، كۇتىم كورسەتەتىن ماماننىڭ ەكى ساعاتتىق قىزمەتى شامامەن 150 يۋاندى (21 ا ق ش دوللارى) قۇرايدى. قىزمەت تۇرلەرىنە قان قىسىمىن ولشەۋ، ازىق-تۇلىك ساتىپ الۋ، مەديتسينالىق مەكەمەلەرگە ەرىپ بارۋ جانە كۇندەلىكتى اڭگىمەلەسىپ، كوڭىل ءبولۋ كىرەدى.
سالا ماماندارى «اقىلى سەرىك بالا» اتاۋىنىڭ قۇقىقتىق جانە ەتيكالىق تۇرعىدان ءبىرقاتار ماسەلە تۋىنداتاتىنىن ايتادى. ولاردىڭ پىكىرىنشە، وتباسى مۇشەلەرىنىڭ قامقورلىعى ءومىر بويعى جاۋاپكەرشىلىككە نەگىزدەلسە، اقىلى قىزمەت كەلىسىمشارت مەرزىمىمەن شەكتەلەدى. ال قىزمەتتىڭ كەنەتتەن توقتاتىلۋى قارتتاردىڭ كوڭىلىنە قاياۋ سالىپ، پسيحولوگيالىق كۇيىنە كەرى اسەر ەتۋى مۇمكىن.
سۇرانىس ارتقانىنا قاراماستان، كليەنتتەردىڭ سەنىمسىزدىگى مەن الاياقتىققا قاتىستى قاۋىپتەر كوممەرتسيالىق قىزمەتتەردىڭ كەڭ تارالۋىنا كەدەرگى كەلتىرىپ وتىر. سالا وكىلدەرىنىڭ ايتۋىنشا، جالدامالى كۇتۋشىلەردىڭ كوبى قارتتاردى الاڭداتپاۋ ءۇشىن وزدەرىن وتباسىنىڭ تانىستارى رەتىندە تانىستىرىپ، قىزمەتىنىڭ اقىلى ەكەنىن اشىپ ايتپايدى.