قىتايدا قار بارىسى جويىلىپ كەتۋ قاۋپى بار جابايى اڭداردىڭ تىزىمىنە ەنگەن. مەملەكەت ونى ەرەكشە قورعايدى. جىرتقىش 5 پروۆينتسيادا ءجيى كەزدەسەدى. ال ەڭ باسىم بولىگى شىنجاڭ وڭىرىندە مەكەندەيدى. جۋىردا وسى قازاقستانمەن شەكارالاس ايماقتا اداسقان قار بارىسى قۇتقارىلدى. ءبىر قىزىعى ءتۇز تاعىسى ادامدارعا تاۋدا ەمەس، شولدە كەزىككەن.
لي حۋنبياو، جەرگىلىكتى ورمان شارۋاشىلىعى باسقارماسىنىڭ ستانسيا ديرەكتورى:
- قورشاعان ورتاعا تالداۋ جاسالدى. ءبىزدىڭ ويىمىزشا، بۇل قار بارىسى تيان-شان تاۋلارىنان تۇسكەن. جەمتىگىنىڭ ىزىنە ءتۇسىپ، اداسىپ كەتكەن بولسا كەرەك. ۇرعاشى ەكەن. ابدەن السىرەگەن. اڭدى ءبىراز ۋاقىت ارنايى ورتالىقتا ۇستاپ، باقىلايمىز. ءال جيناعان سوڭ تابيعي مەكەندەيتىن ورتاسىنا جىبەرەتىن بولامىز.
ماماندار 3-4 مىڭ مەتر بيىكتىكتە مەكەندەيتىن اڭنىڭ قۇم ىشىنەن تابىلۋى سيرەك جاعداي دەپ وتىر. ابىروي بولعاندا، الدىنان شىققان ءبىر توپ ساياحاتشىعا ايبات شەگىپ، شابۋىل جاساماعان.
باي تجيۋين، شانشان ۋەزىنىڭ پوليتسيا قىزمەتكەرى:
- حابارلاما كۇندىزگى ساعات 14:00 شاماسىندا ءتۇستى. اڭمەن بىرنەشە ساعات ارپالىسىپ تورعا ارەڭ قامادىق. ەڭ باستىسى، توڭىرەكتەگى ادامدارعا زيانى تيمەدى. جىرتقىشتىڭ ءوزى دە ەشقانداي جاراقات المادى. شىنجاڭداعى جانۋارلاردى قورعاۋ ورتالىعىنا جەتكىزىلىپ، كاسىبي مامانداردىڭ قولىنا تاپسىرىلدى.
قىتايدىڭ ۇلتتىق ورمان شارۋاشىلىعى باسقارماسى قار بارىسى پوپۋلياتسياسىنىڭ ءوسىپ كەلە جاتقانىن مالىمدەدى. قازىر عالىمدار 1200 قار بارىسىنىڭ ساناعىن تۇراقتى تۇردە جۇرگىزىپ وتىر. عىلىمي زەرتتەۋلەرگە جاساندى ينتەللەكتىنى قولدانۋدا. سونىمەن قاتار جەرگىلىكتى مالشىلار مەن اۋىل تۇرعىندارى دا تارتىلعان. ولار كوشى-قون باعىتىن انىقتاپ، فوتوسۋرەتكە ءتۇسىرۋ ارقىلى قورىقشىلارعا جاردەم بەرەدى.