سوت مالىمەتىنشە، لۋ كىحۋا 1997 -جىلدان 2024 -جىلعا دەيىنگى ارالىقتا قىزمەتتىك وكىلەتىن جۇيەلى تۇردە پايدالانىپ، زاڭسىز تابىس تاۋىپ كەلگەن. ول ءار كەزەڭدە ماڭىزدى لاۋازىمداردى، سونىڭ ىشىندە چۇڭچيڭ قالاسى اكىمىنىڭ ورىنباسارى قىزمەتىن اتقارعان. بۇل وعان قىزمەتتىك مۇمكىندىكتەرىن اسىرا پايدالانۋعا جول اشقان.
- سىچۋان پروۆينتسياسىنداعى لۋجوۋ قالاسىنىڭ ورتا دەڭگەيلى حالىق سوتى ۇكىمدى جاريا تۇردە وقىدى. سوتتالۋشى اسا ءىرى كولەمدە پارا الدى دەپ تانىلدى. وعان ەكى جىلعا شەگەرىلگەن ءولىم جازاسىمەن قاتار ءومىر بويىنا ساياسي قۇقىقتارىنان ايىرۋ جانە جەكە مۇلكىن تولىق تاركىلەۋ جازاسى تاعايىندالدى، - دەپ حابارلادى قىتايدىڭ ورتالىق تەلەارناسى - CCTV.
حابارلامادا لۋ كىحۋانىڭ ءوز كىناسىن تولىق مويىنداپ، تەرگەۋمەن بەلسەندى ىنتىماقتاستىق ورناتقانى اتاپ وتىلگەن. ءدال وسى جاعداي ءولىم جازاسىن كەيىنگە قالدىرۋعا نەگىز بولعان. قىتايدىڭ قۇقىقتىق جۇيەسىندە مۇنداي كەيىنگە قالدىرۋ كوبىنە سوتتالۋشى ءتارتىبىن جاقسى ۇستاسا، جازانى ءومىر بويعى تۇرمە جازاسىنا اۋىستىرۋعا مۇمكىندىك بەرەدى.
شەنەۋنىكتىڭ زاڭسىز جولمەن العان قاراجاتىنىڭ جالپى كولەمى 189 ميلليون يۋاندى (شامامەن 27,7 ميلليون ا ق ش دوللارى) قۇراعان. بۇل قاراجاتتىڭ بارلىعى مەملەكەت كىرىسىنە تاركىلەنەدى.
لۋ كىحۋا ءىسى قىتايداعى سىبايلاس جەمقورلىققا قارسى ساياساتتىڭ كۇشەيىپ كەلە جاتقانىن تاعى ءبىر مارتە كورسەتتى. ق ح ر ءتوراعاسى شي جينپيڭ 2026 -جىلدىڭ قاڭتارىندا جەمقورلىقپەن كۇرەس ءالى دە كۇردەلى ءارى شيەلەنىستى كۇيدە قالىپ وتىرعانىن مالىمدەگەن ەدى. ونىڭ ايتۋىنشا، «جەمقورلىقتىڭ وشاقتارى مەن وعان جاعداي جاسايتىن فاكتورلاردى» تۇبەگەيلى جويۋ ءالى قيىن بولىپ وتىر.
بۇعان دەيىن قىتايدىڭ اسكەري سوتى بۇرىنعى قورعانىس مينيسترلەرى ۆەي فەنحى مەن لي شانفۋنى ۇكىم شىعارعان. ەكس-شەنەۋنىكتەر پارا الۋ جانە پارا بەرۋ ءىسى بويىنشا كىنالى دەپ تانىلىپ، ەكى جىلعا كەيىنگە قالدىرىلعان ءولىم جازاسىنا كەسىلدى. سونىمەن قاتار لي شانفۋ مەن ۆەي فەنحى ءومىر بويىنا ساياسي قۇقىقتارىنان ايىرىلىپ، بارلىق جەكە مۇلكى تاركىلەنەدى. ەگەر ەكى جىلدىق مەرزىم وتكەن سوڭ ۇكىم ورىندالماسا، جازا ءومىر بويعى باس بوستاندىعىنان ايىرۋمەن الماستىرىلادى. بۇل رەتتە مەرزىمىنەن بۇرىن بوساتۋ نەمەسە جازانى جەڭىلدەتۋ ماسەلەسى قاراستىرىلمايدى.
اۆتورلار
جاسۇلان باقىتبەك ۇلى