قىتاي يوردانيا ارقىلى گازاعا گۋمانيتارلىق كومەك جىبەردى
استانا. KAZINFORM - قىتايدىڭ يوردانياداعى ەلشىلىگى مەن يورداندىق حاشيميتتىك قايىرىمدىلىق ۇيىمى (JHCO) گازا سەكتورىنا گۋمانيتارلىق كومەك جونەلتۋ ءراسىمىن وتكىزدى.
شينحۋا اقپارات اگەنتتىگى حابارلاعانداي، قىتايدىڭ قازىرگى گۋمانيتارلىق كومەگى يوردانيادان قۇرلىق شەكاراسى ارقىلى گازا سەكتورىنا تۇسەدى. وندا 60 مىڭ ازىق- تۇلىك پاكەتى بار جانە ول التى پارتيامەن جەتكىزىلەدى.
گازا سەكتورىنا كەلگەننەن كەيىن شامامەن 12 مىڭ ازىقتىڭ ءبىرىنشى پارتياسى دۇنيەجۇزىلىك ازىق-تۇلىك باعدارلاماسىنا، پالەستينا قىزىل جارتى اي قوعامىنا جانە باسقا دا ۇيىمدارعا تاراتۋ ءۇشىن بەرىلەدى.
ءراسىم كەزىندە قىتايدىڭ يوردانياداعى ەلشىسى چەن چۋاندۋن قىتايدىڭ پالەستينا حالقىنىڭ دوسى رەتىندە گازاعا بىرنەشە رەت گۋمانيتارلىق جۇك جونەلتكەنىن جانە پالەستينا حالقىنا ودان ءارى قولداۋ كورسەتەتىنىن مالىمدەدى.
JHCO باس حاتشىسى حۋسەين شيبلي ءوز تاراپىنان قىتايعا گازا سەكتورىنىڭ حالقىنا كورسەتكەن قولداۋى ءۇشىن ۇلكەن العىسىن ءبىلدىرىپ، جاقىن بولاشاقتا بۇل ايماقتاعى بارلىق مۇقتاج ادامدارعا كومەك كورسەتۋ ءۇشىن قىتايمەن ودان ءارى ىنتىماقتاستىققا ءۇمىت ءبىلدىردى.
ەسكە سالا كەتسەك، بۇعان دەيىن يوردانيانىڭ اسكەري-اۋە كۇشتەرى اتىستى توقتاتقاننان كەيىن جەتكىزىلىم كولەمىن ۇلعايتۋ جونىندەگى كەلىسىم اياسىندا گازا سەكتورىنا قاجەتتى مەديتسينالىق زاتتاردى جەتكىزۋ ءۇشىن ەڭ ءىرى اۋە تاسىمالى جۇمىسىن باستادى.