قىتاي تىلىنە قازاقستان تاريحى اۋدارىلىپ جاتىر

 قىتاي قازاقستان تاريحىنىڭ 5 تومدىعىن اۋدارۋعا قولعا الدى. قىتاي جازۋشىلارى مەن تاريحشىلارى قازاقستان تاريحىن قىتاي تىلىنە اۋدارا باستادى. 

بۇل تۋرالى قىتايتانۋشى- عالىم، اقىن، پروفەسسور دۇكەن ءماسىمحان ۇلىنىڭ تۋعانىنا 60 جىل تولۋىنا وراي ۇيىمداستىرىلعان حالىقارالىق كونفەرەنتسيادا ايتىلدى.

Qazaqstan.tv مالىمەتىنشە، جيىنعا يران، تۇركيا، قىرعىستان، قىتاي مەن وزبەكستان ەلدەرىنىڭ عالىمدارى، شىعىستانۋشىلارى مەن ساياساتتانۋشىلارى قاتىستى. ولار قازاقستان مەن شىعىس ەلدەرىنىڭ اراسىنداعى مادەني، ساياسي بايلانىستاردى تالقىلاندى. ءىس-شارا بارىسىندا دۇكەن ءماسىمحان ۇلىنىڭ «قىتاي قالامگەرلەرىنىڭ تاڭدامالى شىعارمالارى» 5 تومدىعىنىڭ جانە «ۇلت پەن رۋح» دەپ اتالاتىن عىلىمي زەرتتەۋلەرگە ارنالعان كىتابىنىڭ تۇساۋى كەسىلدى.

«قىتاي جاعى قازاقستاندا جارىق كورگەن قازاقستان تاريحىنىڭ 5 تومدىعىن اۋدارۋعا قولعا الدى. ول ەندى ءبىراز ۋاقىت تالاپ ەتەدى، دەگەنمەن ول ەل كەزدەيسوق ەشتەڭەنى قولعا المايدى. پروتسەسس ءجۇرىپ جاتىر. جابىق تاقىرىپ ەمەس، ولار دا اۋدارادى، ءبىز دە اۋدارامىز»، - دەدى تاريح عىلىمدارىنىڭ دوكتورى، پروفەسسور حانگەلدى ءابجانوۆ.