قىتاي تايۆان پورتتارىن «بۇعاتتاۋ» بويىنشا جاتتىعۋ باستادى

استانا. KAZINFORM - قىتاي ارمياسى 14-قازاندا تايۆان ارالى اينالاسىندا جاتتىعۋ باستاپ، وسىلايشا ارالداعى «سەپاراتيستىك كۇشتەرگە قاتاڭ ەسكەرتۋ» جاسادى.

تايۆان قىتايدىڭ ارەكەتىن ارانداتۋ دەپ اتاپ، جاۋاپ رەتىندە ءتيىستى كۇش جىبەرگەنىن مالىمدەدى.

«شينحۋا» اگەنتتىگىنىڭ مالىمەتىنشە، تايۆان بۇعازىنداعى «بىرلەسكەن قىلىش-2024B» جاتتىعۋىنا قۇرلىقتاعى اسكەر، اسكەري-تەڭىز، اۋە جانە زىمىران كۇشتەرى قاتىسادى. قىتاي ساربازدارى ارالعا سولتۇستىك، وڭتۇستىك جانە شىعىس قاپتالىنان جاقىن كەلىپ، مانيەۆر جاسايدى دەپ ايتىلدى.

قىتاي ارمياسىنىڭ شىعىس ايماعى اسكەري قولباسشىلىعىنىڭ رەسمي وكىلى لي سيدىڭ سوزىنشە، پەكين ساربازدارى «نەگىزگى پورتتار مەن اۋدانداردى بۇعاتتاۋعا جانە باقىلاۋعا الۋعا، تەڭىزدەگى جانە قۇرلىقتاعى نىساندارعا سوققى بەرۋگە» نازار اۋدارۋدى جوسپارلاپ وتىر. جاتتىعۋ «سەپاراتيستىك كۇشتەردىڭ قۇتىن قاشىرىپ، سارى-ۋايىمعا سالادى» دەدى قىتاي قولباسشىلىعىنىڭ وكىلى.

تايۆان پرەزيدەنتى لاي تسيندە قاۋىپسىزدىك ماسەلەسى بويىنشا شۇعىل جينالىس شاقىرىپ، قۇزىرلى قۇرىلىمدارعا پەكيننىڭ ارەكەتتەرىنە جاۋاپ بەرۋدى تاپسىردى.

تىنىق مۇحيتتا سونداي-اق قىتاي مەن رەسەي اسكەري-تەڭىز كۇشتەرى بىرلەسكەن جاتتىعۋ وتكىزىپ جاتىر. 14-قازاندا رەسەي قورعانىس مينيسترلىگى بىرلەسكەن جاتتىعۋعا ەكى ەلدىڭ 6 كەمەسى قاتىسىپ جاتىر دەپ حابارلادى.

قىتاي تايۆاندى ءوز جەرى دەپ سانايدى. بيىل مامىردا تايۆاننىڭ جاڭا پرەزيدەنتى لاي تسيندەنىڭ يناۋگۋراتسياسى وتكەننەن كەيىن پەكين تايۆان جاعالاۋىنا جاقىن ماڭدا جاتتىعۋ وتكىزگەن. پەكين شەنەۋنىكتەرىنىڭ ايتۋىنشا، ارال شەكاراسىنا جاقىن ايماقتا ارميا، فلوت، اۆياتسيا جانە زىمىران اسكەرى قاتىساتىن مانيۆەرلەر «سەپاراتيستىك ارەكەتتەرگە» جاۋاپ رەتىندە وتەدى.

تايۆان رەسمي تۇردە ءوزىن قىتاي رەسپۋبليكاسى دەپ اتايدى، ويتكەنى تاريحي تۇرعىدان قىتايداعى كوممۋنيستەر جەڭىسكە جەتىپ، قىتاي حالىق رەسپۋبليكاسى جاريالانعاننان كەيىن تايۆان بيلىگى ءوزىن بۇكىل قىتايدىڭ زاڭدى ۇكىمەتى دەپ جاريالاعان. وسىعان بايلانىستى تايۆان قىتايدان تاۋەلسىزدىگىن رەسمي تۇردە جاريالامادى. تايۆاننىڭ سەرىكتەستەرى، سونىڭ ىشىندە ا ق ش «ءبىر قىتاي» ساياساتىنا ادال ەكەنىن مالىمدەسە دە، ولار ق ح ر- ءدىڭ كۇش قولدانۋىنا ءۇزىلدى-كەسىلدى قارسى.

ءىشىنارا تانىلعان قىتاي رەسپۋبليكاسىنىڭ استاناسى تايبەيدە كەيبىر ساياساتكەر «ەكى قىتاي» اراسىنداعى قارۋلى قاقتىعىس قاۋپى كەيىنگى قىرىق جىلدان استام ۋاقىتتا وتە قاتتى ۋشىعىپ تۇر دەپ ايتىپ ءجۇر. تايۆان قورعانىس جانە بارلاۋ دەپارتامەنتىنىڭ مالىمەتىنشە، پەكين 2025-جىلى تايۆانعا قارسى تولىقتاي اسكەري اگرەسسيا باستاۋدى جوسپارلاپ وتىر. بۇل تۋرالى ازاتتىق راديوسىنا سۇحباتىندا تايۆاننىڭ بۇرىنعى سىرتقى ىستەر ءمينيسترى دجوزەف ۆۋ دا مالىمدەگەن.

«ازاتتىق»