قىتاي تاسقىننان زارداپ شەككەن پروۆينتسياعا قوسىمشا 100 ميلليون يۋان ءبولدى

استانا. KAZINFORM - بۇل سوما 25 ماۋسىمدا بولىنگەن العاشقى 100 ميلليون يۋانعا قوسىلىپ، جالپى كومەك كولەمى 200 ميلليون يۋانعا جەتتى، دەپ جازادى شينحۋا.

قىتاي حالىق رەسپۋبليكاسىنىڭ مەملەكەتتىك دامۋ جانە رەفورمالار ىستەرى كوميتەتى سەنبى كۇنى قىتايدىڭ وڭتۇستىك-باتىسىنداعى سۋ تاسقىنىنان زارداپ شەككەن گۋيجوۋ پروۆينتسياسىنداعى توتەنشە جاعدايدىڭ سالدارىن جويۋ جانە قالپىنا كەلتىرۋ جۇمىستارىنا ورتالىق بيۋدجەتتەن قوسىمشا 100 ميلليون يۋان (شامامەن 13,96 ميلليون ا ق ش دوللارى) بولگەنىن حابارلادى.

بولىنگەن قاراجات نەگىزىنەن قاتتى زارداپ شەككەن جۋجيان، تسۋنتسزيان جانە ساندۋ ۋەزدەرىندەگى ينفراقۇرىلىم مەن قوعامدىق قىزمەت نىساندارىن شۇعىل قالپىنا كەلتىرۋگە باعىتتالادى. بۇل قاراپايىم تۇرعىنداردىڭ ءومىر ءسۇرۋى مەن وندىرىستىك قىزمەتتىڭ قالىپتى جاعدايعا تەزىرەك ورالۋىنا كومەكتەسپەك.

سوڭعى كۇندەرى توقتاۋسىز جاۋعان جاڭبىر سالدارىنان گۋيجوۋ پروۆينتسياسىندا كۇشتى سۋ تاسقىندارى بولدى. اسىرەسە، جۋنتسزيان ۋەزىندە قايتالانعان تاسقىندارعا بايلانىستى جەرگىلىكتى بيلىك سەنبى كۇنى 12:30 دان باستاپ ەلدەگى ءتورت دەڭگەيلى جۇيە بويىنشا ەڭ جوعارى دەڭگەيدەگى شۇعىل ارەكەت ەتۋ رەجيمىن قايتا ەنگىزۋگە ءماجبۇر بولدى.

ەسكە سالساق، سەيسەنبى كۇنى ساعات 14:30 داعى مالىمەت بويىنشا جۋنتسزيان جانە تسۋنتسزيان ۋەزدەرىندە تيىسىنشە 48900 جانە 32000 ادام ۋاقىتشا ەۆاكۋاتسيالاندى.