ءىس 35 جاستاعى فينتەح-كومپانيا قىزمەتكەرىنىڭ شاعىمى نەگىزىندە قارالعان. ول كومپانيادا جاساندى ينتەللەكت جۇيەلەرىنىڭ جۇمىسىن تەكسەرۋمەن اينالىسقان. قىزمەتكەر جالاقىسى مەن لاۋازىمىن تومەندەتۋگە كەلىسپەگەن سوڭ جۇمىستان بوساتىلعان. جۇمىس بەرۋشى ونىڭ فۋنكتسيالارى تولىقتاي اۆتوماتتاندىرىلعان جۇيەلەرگە بەرىلگەنىن العا تارتقان.
سوت جۇمىس بەرۋشىنىڭ ارەكەتىن زاڭسىز دەپ تانىدى. سوت شەشىمىندە قىزمەتكەرلەردى تەك شىعىندى ازايتۋ ماقساتىندا جاساندى ينتەللەكتىمەن الماستىرۋ «وبەكتيۆتى جاعدايلاردىڭ ەلەۋلى وزگەرىسى» رەتىندە قاراستىرىلمايتىنى اتاپ ءوتىلدى.
- ءبىز جاساندى ينتەللەكت تەحنولوگيالارى ادام ەڭبەگىن تولىققاندى الماستىراتىنداي دەڭگەيگە جەتتى دەپ ەسەپتەمەيمىز، - دەدى سۋديا شي گوچيان.
ناتيجەسىندە تالاپكەر بارلىق سوت ساتىسىندا جەڭىسكە جەتىپ، كومپانيا وعان 260 مىڭ يۋاننان استام (شامامەن 38 مىڭ دوللار) وتەماقى تولەۋگە مىندەتتەلدى.
حاڭجوۋ سوتىنىڭ دەرەكتەرىنە سايكەس، 2025 -جىلى قالادا ەڭبەك داۋلارىنىڭ سانى 61,7 پايىزعا ءوسىپ، 12359 ىسكە جەتكەن. جاساندى ينتەللەكت تەحنولوگيالارىنىڭ قارقىندى دامۋىنا بايلانىستى وسى سالاعا قاتىستى سوت ىستەرى دە ارتىپ كەلەدى.
ايتا كەتەيىك، بۇعان دەيىن قىتايدىڭ وڭتۇستىگىندە جاساندى ينتەللەكت سۋديالاردىڭ جۇمىس تيىمدىلىگىن ەكى ەسەگە ارتتىرعانى حابارلانعان ەدى.