قىتاي ستراتەگيالىق پايدالى قازبالار كونترابانداسىمەن كۇرەستى كۇشەيتەدى
استانا. KAZINFORM - سەنبى كۇنى قىتاي بيلىگى ستراتەگيالىق ماڭىزى بار پايدالى قازبالاردىڭ كونترابانداسىنا قارسى كۇرەس ناۋقانىن ودان ءارى كۇشەيتەتىنىن مالىمدەدى، دەپ حابارلايدى شينحۋا.
بۇل تۋرالى وڭتۇستىك قىتايداعى گۋانسي-چجۋان اۆتونوميالىق اۋدانىنىڭ اكىمشىلىك ورتالىعى ناننين قالاسىندا وتكەن جينالىستا ايتىلدى. جيىندى ەكسپورتتىق باقىلاۋ سالاسىنداعى ۇلتتىق ۇيلەستىرۋ مەحانيزمى كەڭسەسى ۇيىمداستىردى. وعان ق ح ر ساۋدا مينيسترلىگى، قوعامدىق قاۋىپسىزدىك مينيسترلىگى، باس كەدەن باسقارماسى جانە باسقا دا مەكەمەلەردىڭ وكىلدەرى قاتىستى.
جيىندا بۇل ناۋقان باستالعان كۇننەن باستاپ «نولدىك توزىمدىلىك» قاعيداتىن باسشىلىققا الىپ، ستراتەگيالىق ماڭىزدى پايدالى قازبالاردىڭ كونترابانداسىنا قارسى اۋىر سوققى بەرىپ جاتقانى ايتىلدى. سالاعا جاۋاپتى مەكەمەلەر زاڭسىز ەكسپورت دەرەكتەرىن تەكسەردى.
الايدا، جيىنعا قاتىسۋشىلار ستراتەگيالىق پايدالى قازبالاردىڭ زاڭسىز ەكسپورتىمەن كۇرەستەگى جاعدايدىڭ ءالى دە كۇردەلى ەكەنىن اتاپ ءوتتى، ويتكەنى مۇنداي جاعدايلار ءالى دە تىركەلۋدە جانە ولاردى انىقتاۋ بارعان سايىن قيىنداپ بارادى. وسىعان بايلانىستى ءتيىستى ورگاندارعا قاتاڭ تەكسەرۋلەردى ساقتاپ، ستراتەگيالىق رەسۋرستار مەن ولارعا قاتىستى تەحنولوگيالاردىڭ زاڭسىز سىرتقا شىعۋىنا جول بەرمەۋ تاپسىرىلدى.
كامپانيانى جالعاستىرا وتىرىپ، ءتيىستى مەكەمەلەر قوسارلى ماقساتتاعى تاۋارلاردى ەكسپورتتىق باقىلاۋعا قاتىستى قۇقىق قورعاۋ ورگاندارىنىڭ بىرلەسكەن ۇيلەستىرۋ ورتالىعىن قۇرۋ ماسەلەسىن قاراستىرۋى ءتيىس. سونىمەن قاتار، مەملەكەتتىك ەكسپورتتىق باقىلاۋ شارالارىنان جالتارعان شەتەلدىك تۇتىنۋشىلاردى ەكسپورتتىق رەتتەۋ تىزىمىنە ەنگىزۋ ۇسىنىلدى.
سونداي-اق، ەكسپورتپەن اينالىساتىن كاسىپورىندارعا كەشەندى تەكسەرۋلەردى دۇرىس جۇرگىزۋ قاجەتتىلىگى تۋرالى نۇسقاۋ بەرۋ جانە ولاردىڭ ونىمدەرىنىڭ اسكەري ماقساتتا نەمەسە اسكەري تۇتىنۋشىلارعا زاڭسىز پايدالانىلۋىنا جول بەرمەۋ تۋرالى ەسكەرتۋ ماڭىزدى ەكەنى اتاپ ءوتىلدى.
بۇعان دەيىن «ءبىر بەلدەۋ، ءبىر جول» باستاماسى اياسىنداعى قىتاي ينۆەستيتسيالارى رەكوردتىق دەڭگەيگە جەتكەنى بەلگىلى بولدى. ال قازاقستان - قىتاي ينۆەستيتسيالارىن ەڭ كوپ تارتقان ەل اتاندى.